ຕາດນົກເຄົ້າ ອີກໜຶ່ງສະຖານທ່ອງທ່ຽວເມືອງລະມາມ

  ໃນໄລຍະນີ້ກ້າວເຂົ້າສູ່ລະດູຝົນຫຼາຍທ່ານຫຼາຍຄົນກຳລັງຊອກຫາທີ່ພັກໃຈພັກກາຍດ້ວຍບັນຍາກາດທີ່ອົບອຸ່ນ,    ເພື່ອເຮັດໃຫ້ຮ່າງກາຍໄດ້ສຳຜັດກັບສະພາບແວດລ້ອມທີ່ດີ, ອາກາດສົດຊື່ນເຕັມໄປດ້ວຍຄວາມເປັນທຳມະຊາດແຕ່ຍັງຫາສະຖານທີ່ບໍ່ໄດ້ ຫຼືບໍ່ຮູ້ຈະໄປທ່ຽວໃສດີຊຶ່ງບາງຄົນກຳລັງຄິດຢາກໄປອາບນໍ້າແຕ່ກໍຍັງຄິດບໍ່ອອກວ່າສະຖານທີ່ໃດເໝາະສົມດັ່ງນັ້ນ, ຈຶ່ງຢາກຂໍສະເໜີແຫຼ່ງທ່ອງທ່ຽວທີ່ເໝາະສົມໃຫ້ກັບບັນດາທ່ານນັ້ນກໍຄືແຫຼ່ງທ່ອງ ທ່ຽວຕາດນົກເຄົ້າ ເມືອງລະມາມ ແຂວງເຊກອງ.

  ນໍ້າຕົກຕາດແຫ່ງນີ້ມີຕຳນານເລົ່າຂານປາກຕໍ່ປາກສືບຕໍ່ກັນມາວ່າແມ່ນຊາວບ້ານໄດ້ພາກັນມາຫາກິນແລ້ວກໍໄດ້ພົບເຫັນໝູ່ນົກເຄົ້າມາເຮັດຮັງໃສ່ຢູ່ຕົ້ນໄມ້ໃຫຍ່ເທິງຕາດຕົ້ນໜຶ່ງຢ່າງຜິດປົກກະຕິ, ດັ່ງນັ້ນຊາວບ້ານຈຶ່ງໄດ້ເອີ້ນຊື່ຕາດນີ້ວ່າ: ຕາດນົກເຄົ້າຈົນມາຮອດປະຈຸບັນນີ້, ຕາດແຫ່ງນີ້ຕັ້ງຢູ່ບ້ານໜອງບົງ ເມືອງລະມາມ ແຂວງເຊກອງ ຫ່າງຈາກເທສະບານເມືອງໄປ 14 ກິໂລແມັດ ແລະຫ່າງຈາກເສັ້ນທາງເລກທີ 16B ປະມານ 2 ກິໂລແມັດ ຊຶ່ງໄດ້ເລີ່ມເປີດບໍລິການນໍາໃຊ້ແຕ່ປີ 2008 ເປັນຕົ້ນມາ.

  ນໍ້າຕົກຕາດແຫ່ງນີ້ມີທຳມະຊາດອັນສວຍສົດງົດງາມ, ອ້ອມຮອບດ້ວຍປ່າດົງດິບ, ມີຕົ້ນໄມ້ນ້ອຍ-ໃຫຍ່ຂຽວງາມຕະຫຼອດປີ ແລະເຕັມໄປດ້ວຍສັດປ່ານາໆຊະນິດ, ມີນໍ້າໄຫຼຜ່ານຕະຫຼອດປີມີອາກາດເຢັນສົດຊື່ນແຕ່ຈະສັງເກດເຫັນວ່າທີ່ມີນັກທ່ອງທ່ຽວເຂົ້າໄປທ່ຽວຊົມຫຼາຍທີ່ສຸດແມ່ນໄລຍະລະດູແລ້ງເພາະໄລຍະດັ່ງກ່າວນໍ້າຈະໃສສະ ອາດແນມເຫັນສັດນໍ້ານາໆ ຊະນິດ ແລະກະແສນໍ້າກໍຈະບໍ່ໄຫຼ ແຮງເໝາະແກ່ການລົງໄປຫຼິ້ນນໍ້າເພື່ອຜ່ອນຄາຍຄວາມອິດເມື່ອຍ. 

-------

ໂດຍ: ວົງມະນີ

แชร์