ຣາຊ-ລາວ ສືບຕໍ່ຊຸກຍູ້ຜູ້ທີ່ໄດ້ຮັບທຶນຈາກໂຄງການ

 ໃນວັນທີ 4 ມິຖຸນາ 2020 ທາງຄະນະຮັບຜິດຊອບໂຄງການ “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ນຳໂດຍທ່ານ ນາງ ແສງອ່ອນ ປວງມະນີວັນ ຮອງຫົວໜ້າກົມພັດທະນາວິຊາຊີບຊາວໜຸ່ມສູນກາງຊາວໜຸ່ມປະຊາຊົນປະຕິບັດລາວ, ທ່ານ ນະລົງວິດ ຄອງສິນ ຜູ້ຈັດການອົງກອນສຳພັນບໍລິສັດ ຣາຊ-ລາວ ບໍລິການຈຳກັດ ພ້ອມຄະ ນະໄດ້ລົງຕິດຕາມຊຸກຍູ້ຄອບຄົວຂອງ ນາງ ສຸພາພອນ ພຸດສະນີ ຊາວໜຸ່ມຜູ້ທີ່ໄດ້ຮັບທຶນຈາກໂຄງການຢູ່ບ້ານຊ່າງຄ້ອງນະຄອນຫຼວງພະບາງ ແຂວງຫຼວງພະບາງ.

  ໂຄງການ “ກ້າໄມ້ ແຕກໃບ, ສົດໃສ, ຢືນຕົ້ນ, ໃຫຍ່ງາມ” ເປັນການຮ່ວມມືລະຫວ່າງບໍລິສັດ ຣາຊ-ລາວ ບໍລິການຈຳກັດ ແລະກົມພັດທະນາວິຊາຊີບຊາວໜຸ່ມສູນກາງຊາວໜຸ່ມປະຊາຊົນປະຕິວັດລາວໄດ້ສະໜັບສະໜູນເງິນທຶນໝູນວຽນຈຳນວນໜຶ່ງໃຫ້ແກ່ສູນກາງຊາວໜຸ່ມປະຊາຊົນປະຕິວັດລາວເພື່ອສ້າງໂອກາດ ແລະ ມອບທຶນບໍ່ມີດອກເບ້ຍດ້ານການພັດທະນາ, ຍົກລະດັບຄວາມຮູ້ດ້ານວິຊາການທັກສະສີມືແຮງງານສຳລັບປະກອບອາຊີບໃຫ້ແກ່ນັກຮຽນທີ່ຈົບການສຶກສາຈາກສູນຝຶກອົບຮົມວິຊາຊີບຊາວໜຸ່ມຜູ້ທີ່ດ້ອຍໂອກາດບໍ່ມີວຽກເຮັດງານທຳໃຫ້ມີອາຊີບທີ່ໝັ້ນຄົງໂດຍໄດ້ເລີ່ມຮ່ວມມືນຳກັນມາແຕ່ຕົ້ນເດືອນເມສາ 2012 ເປັນຕົ້ນມາ.

  ນາງ ສຸພາພອນ ພຸດສະນີ ກ່າວວ່າ: ກ່ອນອື່ນຂອບໃຈມາຍັງກົມພັດທະນາວິຊາຊີບຊາວໜຸ່ມກໍຄືຄະນະນໍາຊາວໜຸ່ມ ນະຄອນຫຼວງພະບາງ ແຂວງຫຼວງພະບາງ ແລະບໍລິສັດຣາຊ-ລາວບໍລິການ ຈຳກັດທີ່ໃຫ້ໂອກາດ ແລະມອບທຶນຈຳນວນເງິນ 10 ລ້ານກີບ ຊຶ່ງເງິນດັ່ງກ່າວ ຕົນເອງໄດ້ນໍາໄປຊື້ອຸປະກອນຕັດຫຍິບທີ່ຈຳເປັນເຂົ້າຮ້ານ ແລະເປີດກິດຈະການຕັດຫຍິບເຄື່ອງນຸ່ງຂອງແມ່ຍິງຢູ່ເຮືອນ ຂອງຕົນ ພ້ອມຮັບສອນຜູ້ສົນໃຈໃນການຕັດຫຍິບເສື້ອຜ້າຂອງແມ່ຍິງຄືດັ່ງຕົນເອງທີ່ໄດ້ຮຽນຈາກສູນຝຶກອົບຮົມວິຊາຊີບຊາວໜຸ່ມດອນບອສໂກມາອິນ ນະຄອນຫຼວງວຽງຈັນ ມາແຕ່ 2015 ຊຶ່ງມາຮອດປະຈຸບັນສາມາດສິດສອນໃຫ້ຜູ້ທີ່ສົນໃຈເຂົ້າມາສຶກສາຮໍ່າຮຽນນຳຈຳນວນ 3 ຄົນ ແລະທັງ 3 ກໍໄດ້ຮັບການຝຶກຝົນຮໍ່າຮຽນພ້ອມທັງໄດ້ເປີດກິດຈະການເປັນຂອງຕົນເອງນຳອີກ ແລະອີກບໍ່ເທົ່າໃດວັນກໍ່ຈະຄົບກຳນົດຂອງການຄືນຕົ້ນທຶນໃຫ້ກັບໂຄງ ການໃນງວດທີ 1 ຈຳນວນ 3 ລ້ານກີບແຕ່ເນື່ອງຈາກໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ໄດ້ມີການຜ່ອນຜັນໃຫ້ຍືດເວລາຂອງການຊຳລະຄືນອອກໄປແຕ່ເຖິງຢ່າງໃດກໍຕາມເພື່ອເປີດໂອກາດໃຫ້ກັບຊາວໜຸ່ມຄົນອື່ນໆໃຫ້ໄດ້ຮັບໂອກາດຄືດັ່ງຕົນເອງໄດ້ຮັບມາກໍຈະສູ້ຊົນເກັບອອມທຶນຮອນດັ່ງກ່າວຄືນໃຫ້ກັບໂຄງການຄົບຕາມຈຳນວນເວລາທີ່ກຳນົດໄວ້.

  ທ່ານນາງ ພຽງແກ້ວ ຂຸນທອງດາວົງ ຫົວໜ້າຂະແໜງພັດທະນາວິຊາຊີບຊາວໜຸ່ມ ແຂວງຫຼວງພະບາງ ກ່າວວ່າ: ໂຄງການ “ກ້າໄມ້, ແຕກໃບ, ສົດໃສ, ຢືນຕົ້ນ, ໃຫຍ່ງາມ” ເປັນການປະກອບສ່ວນຊຸກຍູ້ສົ່ງເສີມຊາວໜຸ່ມລາວໃນການສ້າງວຽກເຮັດງານທຳ ເພື່ອພັດທະນາຄຸນ ນະພາບຊີວິດຂອງພໍ່ແມ່ປະຊາຊົນກໍຄືຊາວໜຸ່ມລາວໃຫ້ຫຼຸດພົ້ນອອກຈາກຄວາມທຸກຍາກໂດຍໄດ້ຄັດເລືອກເອົາຊາວໜຸ່ມກຸ່ມເປົ້າໝາຍໂດຍສະເພາະໄດ້ມອບທຶນໃຫ້ ນາງ ສຸພາພອນ ພຸດສະນີ ຈາກທຶນຮອນດັ່ງກ່າວໄດ້ຊ່ວຍພັດ ທະນາຄຸນນະພາບຊີວິດຂອງລາວດີຂຶ້ນມີລາຍຮັບເພີ່ມກາຍເປັນຕົວແບບຂອງຊາວໜຸ່ມໃນການສ້າງຢູ່ທຳກິນພັດທະນາອາຊີບນຳໄປສູ່ການພັດທະນາຄອບຄົວເຮັດໃຫ້ ຊີວິດການເປັນຢູ່ນັບມື້ດີຂຶ້ນພ້ອມທັງໄດ້ນຳໃຊ້ຄວາມຮູ້ທີ່ໄດ້ຮໍ່າຮຽນມານັ້ນຖ່າຍຖອດສູ່ຊາວໜຸ່ມຜູ້ຮັກໃນອາຊີບຕັດຫຍິບ ແລະສ້າງອາຊີບໃຫ້ກັບຊາວໜຸ່ມອີກຫຼາຍຄົນສືບຕໍ່ໄປ.

_______________

  ຂຽນໂດຍ: ຟ້າ

  ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์