ຍທຂ 9 ແຂວງເຊື່ອມຊຶມປື້ມຄູ່ມືກວດກາພາຍໃນ

  ວັນທີ 5 ກຸມພາ 2019 ນີ້, ກະຊວງໂຍທາທິການ ແລະຂົນສົ່ງໄດ້ຈັດຕັ້ງກອງປະຊຸມເພື່ອເຜີຍປຶ້ມຄູ່ມືກວດກາພາຍໃນສຳລັບຂະແໜງໂຍທາທິການ ແລະ ຂົນສົ່ງຂຶ້ນທີ່ຫ້ອງປະຊຸມພະແນກ ຍທຂ ແຂວງສະຫວັນນະເຂດ ໂດຍການເປັນປະທານຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີກະຊວງ ຍທຂ, ຈາກນີ້ກໍມີ ທ່ານ ລົດ ສຸກສີວົງໄຊ ຮອງຫົວໜ້າກົມກວດກາ, ມີບັນດາຄະນະກົມ, ຄະນະພະແນກ ແລະຜູ້ຮັບຜິດຊອບວຽກງານກວດກາໃນ 9 ແຂວງຄື: ໄຊສົມບູນ, ບໍລິຄຳໄຊ, ຊຽງຂວາງ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ, ອັດຕະປືເຂົ້າຮ່ວມ.

  ທ່ານ ນາງ ວິໄລຄຳ ໂພສາລາດ ກ່າວວ່າ: ໃນຊຸມປີຜ່ານມາ, ຄະນະພັກແຕ່ລະຂັ້ນພາຍໃນກະຊວງໂຍທາທິການ ແລະ ຂົນສົ່ງໄດ້ເອົາໃຈໃສ່ນຳພາວຽກງານ ກວດກາການຈັັດຕັ້ງປະຕິບັດແນວທາງຂອງພັກ, ກົດໝາຍ ແລະລະບຽບການຂອງລັດ, ແກ້ໄຂປະກົດການຫຍໍ້ທໍ້ຕ່າງໆສາມາດສະກັດກັ້ນຂໍ້ຂາດຕົກບົກຜ່ອງຄວາມຜິດພາດຂອງສະມາຊິກພັກ, ພະນັກງານ-ລັດຖະກອນ, ປະກອບສ່ວນສຳຄັນເຂົ້າໃນການປັບປຸງການຈັດຕັ້ງ, ການກໍ່ສ້າງພັກ ແລະ ພະນັກງານຕະ ຫຼອດມາ; ສະແດງໃຫ້ເຫັນໃນແຕ່ລະໂຄງການລົງທຶນຂອງລັດກໍສາມາດປະຢັດງົບປະມານໄດ້ຫຼາຍຕື້ກີບ.

  ຄຽງຄູ່ກັບຜົນງານດັ່ງກ່າວກໍຍັງມີຂໍ້ຄົງຄ້າງຈຳນວນໜຶ່ງຢູ່ເປັນຕົ້ນ: ບັນດານິຕິກຳຕ່າງໆໃນການກວດກາສະເພາະຂອງຂະແໜງ ຍທຂ ພວກເຮົາຍັງບໍ່ທັນ ຫຼາຍ; ຍ້ອນເຫັນໄດ້ຄວາມສຳຄັນດັ່ງກ່າວ, ຄະນະພັກ-ຄະນະນຳກະຊວງ ຍທຂ ຈຶ່ງໄດ້ມອບໃຫ້ກົມກວດກາເປັນເຈົ້າການສົມທົບກັບພາກສ່ວນກ່ຽວຂ້ອງເພື່ອສ້າງບັນດານິຕິກຳທີ່ສຳຄັນໃນການກວດກາສະເພາະຂະແໜງ ຍທຂ ແລະນີ້ກໍ່ເປັນໂອກາດອັນດີຈະໄດ້ເລີ່ມດຳເນີນກອງປະຊຸມເຜີຍແຜ່ປຶ້ມຄູ່ມືກວດກາພາຍ ໃນສຳລັບຂະແໜງ ຍທຂ ເຊິ່ງປຶ້ມຄູ່ມືດັ່ງກ່າວນີ້, ສ້າງຂຶ້ນເພື່ອຜັນຂະຫຍາຍເນື້ອໃນຂອງກົດໝາຍວ່າດ້ວຍການຕ້ານການສໍ້ລາດ ບັງຫຼວງ (ສະບັບປັບປຸງ) ເລກທີ 039/ ສພຊ, ລົງວັນທີ 17 ທັນວາ 2012 ເຂົ້າໃນການກວດກາທາງດ້ານເຕັກນິກ-ວິສະວະກຳເຊັ່ນ: ກວດກາການລົງທຶນໂຄງການ, ກວດກາການຄຸ້ມຄອງສຳຫຼວດ-ອອກແບບ, ກວດກາການປະມູນ, ກວດກາມູນຄ່າໂຄງການ, ກວດກາຄຸນນະພາບໂຄງການ ແລະອື່ນໆ.

  ກອງປະຊຸມດັ່ງກ່າວໄດ້ດຳເນີນໄປເປັນເວລາ 3 ວັນນັບແຕ່ວັນທີ 5-7 ກຸມພາຈຶ່ງສຳເລັດເຊິ່ງຜູ້ທີ່ເຂົ້າຮ່ວມຈະໄດ້ຮັບຟັງ, ຄົ້ນຄວ້າ, ເຊື່ອມຊຶມບັນດາເອກະ ສານສຳຄັນຕ່າງໆ ທີ່ກ່ຽວພັນກັບວຽກ ງານກວດກາພາຍໃນຂອງຂະແໜງ ຍທຂ ທັງຍັງຈະໄດ້ປະກອບຄຳຄິດເຫັນຢ່າງກົງໄປກົງມາຕໍ່ກັບວຽກງານດັ່ງກ່າວນຳອີກແນໃສ່ເຮັດວຽກງານກວດກາພາຍໃນຂະແໜງ ຍທຂ ມີຄວາມໜັກແໜ້ນເຂັ້ມແຂງ ແລະມີປະສິດທິພາບປະສິດທິຜົນດີຂຶ້ນກວ່າເກົ່າ.

แชร์