ຕາດຕະແລ ແຫຼ່ງທ່ອງທ່ຽວທາງທໍາມະຊາດທີ່ງົດງາມ

  ປະຈຸບັນນີ້ແຂວງອຸດົມໄຊມີຫຼາຍສິ່ງສາມາດອໍານວຍຄວາມສະດວກເປັນຕົ້ນຖະໜົນຫົນທາງຊ່ວຍເຮັດໃຫ້ຜູ້ຄົນທີ່ເດີນທາງໄປມາໄດ້ສໍາຜັດກັບທໍາມະຊາດ, ນໍ້າຕົກຕາດທີ່ສາມາດສ້າງຄວາມປະທັບໃຈແກ່ນັກທ່ອງທ່ຽວທັງພາຍໃນ ແລະຕ່າງປະເທດເປັນຈໍານວນບໍ່ໜ້ອຍ, ບໍ່ວ່າຈະເປັນແຫຼ່ງທ່ອງທ່ຽວທີ່ສ້າງຂຶ້ນມາເອງ ຫຼືທຳມະຊາດສ້າງມາ, ໂດຍເຮົາຈະສາມາດສໍາຜັດກັບສິ່ງໃໝ່ໆ ແລະທໍາມະຊາດ ອັນໂດດເດັ່ນ ແລະສວຍສົດງົດງາມເພື່ອຜ່ອນຄາຍສະບາຍໃຈ, ດັ່ງຕາດຕະແລຖືເປັນແຫຼ່ງທ່ອງທ່ຽວທາງທໍາມະຊາດທີ່ງົດງາມອີກແຫ່ງໜຶ່ງຂອງແຂວງອຸດົມໄຊທີ່ມີອາກາດສົດຊື່ນເໝາະແກ່ການພັກຜ່ອນຢ່ອນໃຈໃນຍາມວັນພັກໂດຍການໄປນັ່ງຊົມວິວສູບເອົາອາກາດສົດໆ ແລະກິ່ນຫອມຂອງດອກທໍາມະຊາດ, ຟັງສຽງນົກໜູປູປີກ,ຊຸມແຊວກິນເຂົ້າປ່າສາມັກຄີກັບຄອບຄົວ, ໝູ່ຄູ່ດ້ວຍຄວາມສຳລານໃຈ.

  ຕາດຕະແລ ເປັນນໍ້າຕົກຫຼາຍຊັ້ນຕໍ່ກັນລົງມາ 7 ຊັ້ນດ້ວຍກັນໂດຍມີທັງໃຫຍ່-ນ້ອຍແຕກຕ່າງກັນ ແລະມີຄວາມສູງ 161 ແມັດ ແລະກວ້າງເປັນແຕ່ລະຊັ້ນຕ່າງກັນຄື: ຊັ້ນ (1) ສູງ 7 ແມັດ, ກວ້າງ 8 ແມັດ; ຊັ້ນ (2) ສູງ 15 ແມັດ, ກວ້າງ 7 ແມັດ; ຊັ້ນ (3) ສູງ 15 ແມັດ, ກວ້າງ 11ແມັດ; ຊັ້ນ (4) ສູງ 16 ແມັດ, ກວ້າງ 27 ແມັດ; ຊັ້ນ (5) ສູງ 40 ແມັດ, ກວ້າງ 27 ແມັດ; ຊັ້ນ (6) ສູງ 13 ແມັດ, ກວ້າງ 28 ແມັດ; ແລະຊັ້ນ (7) ສູງ 55 ແມັດ, ກວ້າງ 35 ແມັດ ,ຕາດຕະແລຕັ້ງຢູ່ຫ່າງຈາກເທສະບານເມືອງຮຸນ ແຂວງອຸດົມໄຊ ປະມານ 40 ກວ່າກິໂລແມັດ ດ້ວຍທາງດິນແດງ.

ມີເລື່ອງເລົ່າສູ່ກັນຟັງວ່າ: ຕາດດັ່ງກ່າວໃນເມື່ອກ່ອນວ່າມີບ່າວເງືອກຊື່ທ້າວພັກໄດ້ລົງໄປຫຼິ້ນບຸນຢູ່ຫຼວງພະບາງ,ໄປເຫັນສາວເງືອກຊື່ວ່ານາງ ຄຳຜິວ ທີ່ອາໄສຢູ່ນໍ້າຄານ, ທ້າວ ພັກ ເກີດມີຄວາມຮັກມັກກັບ ນາງ ຄຳຜິວ ແລະໄດ້ລັກເອົານາງຄຳຜິວມານຳ, ຕໍ່ຈາກນັ້ນມາມີບ່າວເງືອກທີ່ຢູ່ຫຼວງພະບາງເຄີຍຮັກມັກກັບນາງ ຄຳຜິວມາກ່ອນໄດ້ນຳໄປເອົານາງຄືນຈົນເກີດມີການຕໍ່ສູ້ກັນຂຶ້ນຢ່າງດຸເດືອດ, ທ້າວພັກເຫັນດັ່ງນັ້ນ, ຈຶ່ງໄດ້ກໍ່ສ້າງດ່ານຕ້ານກັນໄວ້ເປັນຈຸດໆຢູ່ທີ່ນໍ້າຕະແລ ແລະດ່ານແຕ່ລະດ່ານດັ່ງກ່າວກໍ່ກາຍໄປຕາດຕະແລໃນປະຈຸບັນ.

___________

ໂດຍ: ວົງມະນີ

แชร์