ສ ເກົາຫຼີສະເໜີມາດຕະການກະຕຸ້ນເສດຖະກິດ

ລັດຖະບານສ ເກົາຫຼີສະເໜີມາດຕະການກະຕຸ້ນເສດຖະກິດຄັ້ງໃຫຍ່ທີ່ສຸດເທົ່າທີ່ເຄີຍມີມາ ເພື່ອຫາທາງກະຕຸ້ນເສດຖະກິດທີ່ລໍຕົວເພາະການລະບາດຂອງເຊື້ອໂຄວິດ-19.

   ຕາມຂ່າວຕ່າງປະເທດລາຍງານວ່າ ພະຍາດໂຄວິດ-19 ເຮັດໃຫ້ເສດຖະກິດໃຫຍ່ອັນດັບທີ 12 ຂອງໂລກຫົດຕົວ 1,3% ຕໍ່ໄຕມາດໃນໄຕມາດເດືອນມັງກອນ-ມີນາ ຫຼາຍທີ່ສຸດນັບຈາກວິກິດການເງີນໂລກປີ 2008 ລັດຖະບານສະເໜີມາດຕະການກະຕຸ້ນເສດຖະກິດມູນຄ່າ 35,3 ພັນຕື້ວອນ ເປັນມາດຕະການຄັ້ງທີສາມ ຫຼັງຈາກອອກມາດຕະການມູນຄ່າ 11,7 ພັນຕື້ວອນ ແລະ12,2 ພັນຕື້ວອນໄປໃນເດືອນມີນາ ແລະເມສາ ມີຄວາມເປັນໄປໄດ້ສູງທີ່ຈະຜ່ານຄວາມເຫັນດີຈາກລັດຖະສະພາ. ກະຊວງການເງີນສ ເກົາຫຼີຖະແຫຼງວ່າ ມາດຕະການໃໝ່ຄວບຄຸມການສ້າງວຽກໃໝ່ 550.000 ຕຳແໜ່ງ ການຈັດສັນທຶນສຸກເສີນໃຫ້ກັບເຈົ້າຂອງທຸລະກິດ ແລະທຸລະກິດຂະໜາດກາງ ແລະນ້ອຍທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອໂຄວິດ ໂດຍຈັດສັນເງິນສຳລັບສ້າງວຽກເຮັດ ແລະສ້າງມາດຕະການຮອງຮັບທາງສັງຄົມປະມານ 10 ພັນຕື້ວອນ. ທະນາຄານກາງສ ເກົາຫຼີຄາດວ່າ ເສດຖະກິດຈະຫົດຕົວ 0,2% ໃນປີນີ້ຫຼຸດລົງຫຼາຍຈາກການຄາດຄະເນໃນເດືອນກຸມພາທີ່ຜ່ານມາວ່າຈະຂະຫຍາຍຕົວ 2%.

------

ໜັງສືພິມເສດຖະກິດ-ສັງຄົມ

แชร์