ສະຫວັນນະເຂດ ເປີດລະດູການປູກຕົ້ນໄມ້

 ເມື່ອວັນທີ 1 ມິຖຸນາ 2020 ແຂວງສະຫວັນນະເຂດ ໄດ້ຈັດພິທີເປີດລະດູການປູກຕົ້ນໄມ້ປະຈໍາປີ 2020 ເນື່ອງໃນວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນທີ່ສວນສາທາລະນະໄກສອນ ພົມວິຫານ ໂດຍການເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ,ມີການນຳຂັ້ນແຂວງ,ນະຄອນໄກສອນ ພົມວິ ຫານ, ພະແນກການອ້ອມຂ້າງແຂວງ, ນ້ອງນ້ອຍເຍົາວະຊົນ ແລະນັກທຸລະກິດເຂົ້າຮ່ວມນໍາ.

  ທ່ານ ລໍາສັກ ແກ້ວມໍລະກົດ ຮອງຫົວໜ້າຂະແໜງປ່າໄມ້ທີ່ຂຶ້ນກັບພະແນກກະສິກໍາ ແລະປ່າໄມ້ແຂວງໄດ້ລາຍງານການກະກຽມໃນການຈັດຕັ້ງປະຕິບັດເປີດລະດູການປູກໄມ້ ແລະຟື້ນຟູປ່າໄມ້ປະຈໍາປີ 2020 ຊຶ່ງທົ່ວແຂວງມີແຜນເກັບແກ່ນພັນໄມ້ໃຫ້ໄດ້ 1.500 ກິໂລ, ຜະລິດເບ້ຍໄມ້ໃຫ້ໄດ້ 1,5 ລ້ານເບ້ຍ, ປູກໄມ້ໃຫ້ໄດ້ 1.500 ເຮັກຕາ ແລະ ຟື້ນຟູປ່າໃຫ້ໄດ້ 23.650 ເຮັກຕາ ໂດຍແມ່ນຂະແໜງປ່າໄມ້ເປັນໃຈກາງໃນການປະສານສົມທົບ ແລະ ຈັດຕັ້ງປະຕິບັດກັບບັນດາກອງຄຸ້ມຄອງປ່າສະ ຫງວນ, ຫ້ອງການກະສິກໍາ ແລະປ່າໄມ້ເມືອງ, ບໍລິສັດການລົງທຶນດ້ານການປູກໄມ້, ບັນດາໂຮງງານ, ຜູ້ປະກອບການ ແລະປະຊາຊົນຊາວແຂວງສະຫວັນນະເຂດ, ມາ ຮອດປະຈຸບັນການປະຕິບັດແຜນເກັບແກ່ນພັນໄມ້ໄດ້ທັງໝົດແລ້ວ 2.100 ກິໂລ, ກ້າເບ້ຍໄດ້ແລ້ວ 2.000 ກວ່າເບ້ຍ, ສ່ວນການປູກໄມ້ໄດ້ 1.500 ເຮັກຕາ, ໃນນັ້ນລັດຕ້ອງປູກໃຫ້ໄດ້ 105 ເຮັກຕາ, ບໍລິສັດ 1.225  ເຮັກຕາແລະປະຊາຊົນ 170 ເຮັກຕາ.

 ສຳລັບກິດຈະກຳເນື່ອງໃນວັນປູກຕົ້ນໄມ້ແຫ່ງຊາດແຂວງສະຫວັນນະເຂດໄດ້ກໍານົດສະຖານທີ່ປູກ 2 ຈຸດ ຄື: ຈຸດສວນສາທາລະນະໄກສອນ ພົມວິຫານ (ບໍລິເວນຕໍ່ໜ້າຫ້ອງວ່າການປົກຄອງແຂວງ) ແລະບໍລິເວນຕະຝັ່ງເຈື່ອນແຄມຂອງ (ຕໍ່ໜ້າວັດໃຫຍ່ໄຊຍະພູມ) ໂດຍການສົມທົບລະຫວ່າງພະແນກກະສິກໍາ ແລະປ່າໄມ້ແຂວງ, ຫ້ອງວ່າການປົກຄອງແຂວງ, ພະແນກໂຍທາທິການ ແລະຂົນສົ່ງແຂວງ ແລະບໍລິສັດຮັບເໝົາກໍ່ສ້າງຕະຝັ່ງເຈື່ອນ, ໄດ້ນຳເອົາຕົ້ນໄມ້ອຸດສະຫະກໍາທີ່ມີເສັ້ນຜ່ານສູນກາງ 30 ຊັງຕີແມັດຂຶ້ນໄປຈຳນວນ 117 ຕົ້ນ, ໃນນັ້ນປະກອບມີ: ໄມ້ດູ່ 44 ຕົ້ນ, ຕົ້ນສາມສາ 10 ຕົ້ນ, ເຫຼືອນັ້ນແມ່ນຕົ້ນໄຮ ແລະຕົ້ນພ້າວ, ນອກນັ້ນຍັງມີຕົ້ນໄມ້ທີ່ມີເສັ້ນຜ່າສູນກາງນ້ອຍກວ່າ 5 ຊັງຕີແມັດ ຈຳນວນ 200 ຕົ້ນ, ທີ່ນຳມາປູກສະຫຼັບກັນໄປ.

  ໂອກາດດັ່ງກ່າວ ທ່ານ ບຸນເລດ ຈັນທອງທິບ ຮັກສາການຫົວໜ້າພະແນກກະສິກໍາ ແລະປ່າໄມ້ແຂວງໃຫ້ສໍາພາດຕໍ່ວ່າ: ຈຸດປະສົງຂອງການປູກຕົ້ນໄມ້ຄັ້ງນີ້ກໍ່ເພື່ອເປັນການສ້າງສະຕິຄວາມຫວງແຫນ ແລະຄວາມເປັນເຈົ້າການໃນການປົກປັກຮັກສາສິ່ງແວດລ້ອມທຳມະຊາດ, ການພັດທະນາປ່າໄມ້ ແລະທີ່ດິນປ່າໄມ້ໃຫ້ເປັນຂະບວນການຟົດຟື້ນທົ່ວປວງຊົນ, ແນໃສ່ການພັດທະນາປ່າໄມ້ໃຫ້ມີຄວາມອຸດົມສົມບູນ ແລະຍືນຍົງດັ່ງຄຳຂວັນທີ່ວ່າ “ປູກຕົ້ນໄມ້ໃນວັນນີ້ເພື່ອຊີວິດທີ່ດີໃນວັນໜ້າ, ປູກຕົ້ນໄມ້ໃຫ້ເປັນປ່າເພື່ອພັດທະນາປະເທດຊາດ”. ທ່ານ ບຸນເລດ ຈັນທອງທິບ ຍັງໄດ້ຮຽກຮ້ອງມາຍັງບັນດາອົງການຈັດຕັ້ງພັກ-ລັດ, ນັກທຸລະກິດ, ຜູ້ປະກອບການຕະຫຼອດຮອດປະຊາ ຊົນລາວບັນດາເຜົ່າໂດຍສະເພາະກໍ່ຄືປະຊາຊົນຊາວແຂວງສະຫວັນນະເຂດ ຈົ່ງພ້ອມກັນອະນຸລັກ,ປົກປັກຮັກສາປ່າໄມ້ ແລະຫັນມາປູກຕົ້ນໄມ້ໃຫ້ເປັນປ່າໃຫ້ຫຼາຍຂຶ້ນເພື່ອຮັກສາຄວາມອຸດົມສົມບູນຂອງທຳມະຊາດ ແລະຊີວະນາໆພັນໄວ້ຕະຫຼອດໄປ.    

________________

ໜັງສືພິມເສດຖະກິດ-ສັງຄົມ

แชร์