ປະກາດແຕ່ງຕັ້ງຮັກສາການຫົວໜ້າພະແນກພະລັງງານແຂວງສາລະວັນ

  ພິທີມອບ-ຮັບຫົວໜ້າພະແນກພະລັງງານ ແລະບໍ່ແຮ່ແຂວງສາລະວັນ ລະຫວ່າງທ່ານ ແພງສີ ເມືອງຈັນ ຫົວໜ້າພະແນກພະລັງງານ ແລະບໍ່ແຮ່ (ຜູ້ເກົ່າ) ກັບທ່ານ ຈັດຕຸພົນ ນາຄະວິດ ເປັນຮັກສາການຫົວໜ້າພະແນກພະລັງງານ ແລະບໍ່ແຮ່, ໄດ້ຈັດຂຶ້ນໃນວັນທີ 3 ມິຖຸນາ ທີ່ແຂວງດັ່ງກ່າວ.

  ທ່ານ ເພັດສະໝອນ ພາສີ ຮອງຫົວໜ້າຄະນະຈັດຕັ້ງແຂວງສາລະວັນ ໄດ້ຜ່ານຂໍ້ຕົກລົງຂອງທ່ານເຈົ້າແຂວງໆສາລະວັນສະ ບັບເລກທີ 346/ຈຂ.ສວ ສາລະວັນ, ລົງວັນທີ 2 ມິຖຸນາ 2020 ວ່າດ້ວຍການອະນຸມັດໃຫ້ທ່ານ ແພງສີ ເມືອງຈັນ ຫົວໜ້າພະແນກພະລັງງານ ແລະບໍ່ແຮ່ແຂວງສາລະວັນ( ຜູ້ເກົ່າ) ເຂົ້າຮັບອຸດໜູນບໍານານ ແລະຜ່ານຂໍ້ຕົກລົງສະບັບເລກທີ 322/ຈຂ.ສວ ສາລະວັນ, ລົງວັນທີ 22 ພຶດສະພາ 2020 ວ່າດ້ວຍການແຕ່ງຕັ້ງ ທ່ານ ຈັດຕຸ ພົນ ນາຄະວິດ ເປັນຜູ້ຮັກສາການຫົວໜ້າພະແນກພະລັງງານ ແລະບໍ່ແຮ່ແຂວງສາລະວັນ, ຈາກນັ້ນທ່ານຫົວໜ້າພະແນກຜູ້ເກົ່າກໍ່ໄດ້ຜ່ານບົດບັນທຶກມອບວຽກໃນການຈັດຕັ້ງປະຕິບັດໜ້າທີ່ວຽກ ງານໃນໄລຍະຜ່ານມາເປັນຕົ້ນວຽກງານທີ່ໄດ້ຮັບຜົນສຳເລັັດ,ວຽກງານທີ່ຈະສືບຕໍ່ປະຕິບັດໃນຕໍ່ໜ້າ, ຂໍ້ຄົງຄ້າງ ແລະບັນຫາອື່ນໆ ໃນການຊີ້ນຳໆພາໃນໄລຍະສະໄໝຜ່ານມາເປັນຕົ້ນ:  ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ພະນັກງານສະມາຊິກພັກ, ພະນັກງານລັດຖະກອນ, ກຳມະກອນຕິດພັນກັບການເຊີດຊູຄວາມຮັບ ຜິດຊອບຕໍ່ໜ້າທີ່ວຽກງານ, ມີຄວາມຮັບຜິດຊອບສູງຕໍ່ການຈັດຕັ້ງປະຕິບັດຄຳສັ່ງຂອງຂັ້ນເທິງໃນການຜັນຂະຫຍາຍແນວທາງຂອງພັກ-ລັດ ກໍ່ຄືການນໍາພາກັນຈັດຕັ້ງປະຕິບັດແຜນຍຸດທະສາດການພັດທະນາດ້ານພະລັງງານ ແລະບໍ່ແຮ່ຂອງກະຊວງ, ຂອງແຂວງດ້ານວຽກງານວິຊາການ ແລະ ວຽກງານການເມືອງແນວຄິດເຫັນວ່າມີຜົນສຳເລັດເປັນຢ່າງດີ.

  ໃນພິທີກໍ່ໄດ້ມີການເຊັນບົດບັນທຶກ-ມອບຮັບໜ້າທີ່ຢ່າງເປັນທາງການເຊັນໂດຍ ທ່ານ ແພງສີ ເມືອງຈັນ ກັບ ທ່ານ ຈັດຕຸພົນນາຄະວິດ, ໂດຍຊ່ອງໜ້າ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ແລະ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

  _______________

  ຂຽນໂດຍ: ທິດລານີ ໂຄດໂຍທາ

  ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์