ແຕ່ງຕັ້ງຮອງປະທານສານປະຊາຊົນພາກເໜືອ

  ພິທີປະກາດແຕ່ງຕັ້ງຮອງປະທານສານປະຊາຊົນພາກເໜືອ, ປະທານ-ຮອງປະທານສານປະຊາຊົນແຂວງຫຼວງພະບາງໄດ້ຈັດຂຶ້ນໃນວັນທີ 4 ມິຖຸນາ ຜ່ານມາທີ່ແຂວງຫຼວງພະບາງ ໂດຍມີທ່ານ ຄຳພັນ ບຸນພາຄົມ ຮອງປະທານສານປະຊາຊົນສູງສຸດ, ທ່ານ ສິງຕັນ ໄຊລືຊົ່ງ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ, ມີປະທານສານພາກ, ແຂກຖືກເຊີນຈາກພາກສ່ວນກ່ຽວຂ້ອງພ້ອມດ້ວຍພະນັກງານພາຍໃນສານປະຊາຊົນແຂວງຫຼວງພະບາງເຂົ້າຮ່ວມ.
  ທ່ານ ເທບພະກອນ ຜາພູ ປະທານສານປະຊາຊົນແຂວງຫຼວງພະບາງຜູ້ເກົ່າໄດ້ຂຶ້ນຜ່ານບົດສະຫຼຸບຜົນງານການເຄື່ອນໄຫວໃນການຊີ້ນຳໆພາ 5 ປີຜ່ານມາ ຊຶ່ງໄດ້ຍົກໃຫ້ເຫັນຜົນງານຫຼາຍດ້ານທີ່ພົ້ນເດັ່ນ ແລະເປັນແບບຢ່າງໃນການຊີ້ນໍາວຽກງານວິຊາສະເພາະໃນການແກ້ໄຂບັນຫາຕ່າງໆອັນໄດ້ເຮັດໃຫ້ວຽກງານໄດ້ຮັບຜົນສໍາເລັດຕາມລະດັບຄາດໝາຍຂອງຂັ້ນເທິງວາງອອກ.
  ຈາກນັ້ນ, ຫົວໜ້າກົມຈັດຕັ້ງ-ພະນັກງານສານປະຊາຊົນສູງສຸດກໍໄດ້ຂຶ້ນຜ່ານຂໍ້ຕົກລົງຂອງຄະນະປະຈຳສະພາແຫ່ງຊາດເລກທີ 56, 57, 58/ຄປຈ ລົງວັນທີ 15 ພຶດສະພາ 2020 ວ່າດ້ວຍການແຕ່ງຕັ້ງພະນັກງານສານປະຊາຊົນທ້ອງຖິ່ນໂດຍເຫັນດີຕົກລົງແຕ່ງຕັ້ງ ທ່ານ ເທບພະກອນ ຜາພູ ປະທານສານປະຊາຊົນແຂວງຫຼວງພະບາງ ເປັນຮອງປະທານສານປະຊາຊົນພາກເໜືອ, ແຕ່ງຕັ້ງທ່ານ ແສງຈັນ ອິນສີມີໄຊ ປະທານສານປະຊາຊົນເຂດ 2 ແຂວງຫຼວງພະບາງເປັນປະທານສານປະຊາຊົນແຂວງຫຼວງພະບາງ ແລະແຕ່ງຕັ້ງ ທ່ານ ວຽງໄຊ ແສງນາລີ ປະທານສານປະຊາຊົນເຂດ 3 ແຂວງຫຼວງພະບາງ ເປັນຮອງປະທານສານປະຊາຊົນແຂວງຫຼວງພະບາງ.    ຈາກນັ້ນປະທານສານປະຊາຊົນແຂວງ ຜູ້ເກົ່າ ແລະຜູ້ໃໝ່ໄດ້ລົງນາມເຊັນບົດບັນທຶກມອບ-ຮັບໜ້າທີ່ໂດຍນຊອງໜ້າຄະນະປະທານ, ແຂກຖືກເຊີນເຂົ້າຮ່ວມເປັນສັກຂີພະຍານ.
 ໃນຕອນທ້າຍພິທີ ທ່ານຄຳພັນ ບຸນພາຄົມ ໄດ້ມີຄຳເຫັນໂອ້ລົມໂດຍເນັ້ນໃຫ້ຄະນະທີຖືກແຕ່ງຕັ້ງຈົ່ງພ້ອມກັນສືບຕໍ່ຍົກສູງການຊີ້ນຳໆພາທາງດ້ານວຽກງານການເມືອງ-ແນວຄິດໃຫ້ຖັນແຖວສະມາຊິກພັກ, ພະນັກງານໃຫ້ມີຄວາມປອດໃສເຂັ້ມແຂງໜັກແໜ້ນ, ສືບຕໍ່ປັບປຸງກົງຈັກການຈັດຕັ້ງໃຫ້ສອດຄ່ອງ ແລະພັດທະນາບຸກຄະລາກອນທາງດ້ານກົດໝາຍໃຫ້ມີຄຸນນະພາບ, ເອົາໃຈໃສ່ຕັ້ງໜ້າປະຕິບັດໜ້າທີ່ວຽກງານວິຊາສະເພາະຂອງຕົນດ້ວຍຄວາມຜິດຊອບສູງ ແລະມີຜົນສຳເລັດ, ເປັນເຈົ້າການປະຕິ ບັດແນວທາງ ນະໂຍບາຍຂອງພັກ-ລະບຽບກົດໝາຍຂອງລັດຢ່າງເຂັ້ມງວດຮັບປະກັນເຮັດໃຫ້ການປະຕິບັດໜ້າທີ່ມີຄວາມຍຸຕິທຳ, ໂປ່ງໃສ ແລະກາຍເປັນທີ່ເພິ່ງຂອງປະ ຊາຊົນຢ່າງແທ້ຈິງ.

------------------

ຂຽນໂດຍ: ສີສຸວັນ   

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์