ຮອງນາຍົກ ລົງຊຸກຍູ້ທາງລົດໄຟ ລາວ-ຈີນ ດຽວນີ້ໂຄງການສ້າງສຳເລັດ 89,43%

  ທ້າຍອາທິດຜ່ານມານີ້ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ແລະອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ພ້ອມດ້ວຍຄະນະລົງເຄື່ອນໄຫວຊຸກຍູ້ໂຄງການກໍ່ສ້າງທາງລົດໄຟລາວ-ຈີນຊ້ວງນະຄອນຫຼວງວຽງຈັນ ແລະແຂວງວຽງຈັນ.
  ທ່ານ ຊຽວກົວເວິນ ຜູ້ອໍານວຍການໃຫຍ່ບໍລິສັດທາງລົດໄຟ ລາວ-ຈີນ ໄດ້ລາຍງານໃຫ້ຊາບກ່ຽວກັບຄວາມຄືບໜ້າໃນການກໍ່ສ້າງທາງລົດໄຟ ລາວ-ຈີນ ວ່າ: ມາຮອດທ້າຍເດືອນພຶດສະພາ 2020 ສາມາດປະຕິບັດໜ້າວຽກທັງໝົດໄດ້ສໍາເລັດ 89,43%, ການກໍ່ສ້າງພື້ນຖານໂຄງລ່າງທາງລົດໄຟປະກອບມີ: ການເຈາະອຸມົງໄດ້ 75 ອຸມົງ,ໃນນີ້ສາມາດເຈາະທະລຸແລ້ວ 65 ອຸມົງ,ກໍ່ສ້າງຂົວໄດ້ 164 ແຫ່ງ,ສ້າງເສົາຂົວສໍາເລັດເກືອບ 2 ພັນເສົາ,ວາງຂາງຂົວໄດ້ 746 ຊ່ວງ ເສົາກວມເອົາ 36,60% ຂອງການອອກແບບ.
  ສ່ວນການວາງລາງລົດໄຟແມ່ນເລີ່ມແຕ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ ຫາ ແຂວງຫຼວງພະບາງ ແມ່ນສໍາເລັດເກືອບ 50 ກິໂລຂອງ ຄວາມຍາວທັງໝົດຂອງການອອກແບບສໍາລັບຄວາມຄືບໜ້າໃນການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນໄລຍະ 2 ແຕ່ສະຖານີໂດຍສານນະຄອນຫຼວງວຽຈັນ ຫາສະຖານີສິນຄ້າວຽງຈັນໃຕ້ (ເຂດທ່ານາແລ້ງ) ແມ່ນເຮັດສໍາເລັດການປັກຫຼັກເຂດສະຖານີໂດຍສານໃນເນື້ອທີ່ 150 ເຮັກຕາ, ປັກຫຼັກເຂດສະຫງວນທາງລົດໄຟຍາວ 17 ກິໂລແມັດ;ປັກຫຼັກເຂດສະຖານີວຽງຈັນໃຕ້ຈໍານວນ 3 ຈຸດ,ໃນນີ້ສາມາດເຮັດສໍາເລັດແລ້ວ 2 ຈຸດຄື: ຈຸດສູນເຕັກນິກໃນເນື້ອທີ່ 57 ເຮັກຕາ ແລະຈຸດສາງພັກສິນຄ້າ 50 ເຮັກຕາ;ສ່ວນຈຸດຄ່ຽນຖ່າຍສິນຄ້າກໍາລັງຢູ່ໃນຂັ້ນຕອນອອກແບບ ແລະວຽກງານອື່ນໆກໍມີຄວາມຄືບໜ້າເຊັ່ນດຽວກັນ ແລະຄາດວ່າໂຄງການນີ້ຈະໃຫ້ສໍາເລັດທ້າຍປີ 2021.
  ໂອກາດນີ້ ທ່ານ ບຸນທອງ ຈິດມະນີ ກໍໄດ້ເນັ້ນໜັກໃຫ້ຄະນະນໍາຂອງບໍລິສັດ ແລະຄະນະຮັບຜິດຊອບໂຄງການຈົ່ງພ້ອມກັນເອົາໃຈໃສ່ສືບຕໍ່ຕິດຕາມ, ກວດກາ ແລະຄຸ້ມຄອງວຽກງານໃຫ້ໄປຕາມແຜນ ແລະທິດຊີ້ນໍາຂອງຂັ້ນເທິງ; ສືບຕໍ່ປຶກສາຫາລືກັນໃນການຍົກຍ້າຍປະຊາຊົນຈໍານວນໜຶ່ງໃນ 4 ຈຸດຂອງໂຄງການໄລຍະ 2 ໃຫ້ສໍາເລັດໂດຍໄວ, ສ່ວນກິດຈະກໍາຕ່າງໆທີ່ທາງບໍລິສັດໄດ້ມອບໃຫ້ແກ່ສັງຄົມໃນໄລຍະຜ່ານມາໃຫ້ສືບຕໍ່ຈັດຕັ້ງປະຕິບັດຕໍ່ທີ່ສໍາຄັນມາຮອດປະຈຸບັນການ ແຜ່ລະບາດຂອງພະຍາດໂຄວິດ-19 ຍັງສືບຕໍ່ແຜ່ລະບາດນັ້ນໃຫ້ທາງບໍລິສັດສືບຕໍ່ຈັດຕັ້ງປະຕິບັດມາດຕະການປ້ອງກັນຕ່າງໆທີ່ລັດຖະບານກໍຄືຄະນະສະເພາະກິດວາງອອກໃນແຕ່ລະໄລຍະຢ່າງເຂັ້ມງວດເພື່ອປ້ອງກັນການລະບາດຂອງພະຍາດນີ້ໃນຂອບເຂດຂອງໂຄງການເຊັ່ນ: ໃຫ້ພະນັກງານກໍາມະກອນໃສ່ຜ້າອັດປາກ-ດັງ, ລ້າງມືດ້ວຍເຈວທີ່ມີທາດເຫຼົ້າ, ກ່ອນຈະເຂົ້າທີ່ພັກໃຫ້ອະນາໄມຮ່າງກາຍໃຫ້ສະອາດ ແລະອື່ນໆ.


  ໂອກາດດຽວກັນ, ທ່ານຮອງນາຍົກລັດຖະມົນຕີພ້ອມດ້ວຍຄະນະຍັງໄດ້ລົງເຄື່ອນໄຫວເບິ່ງການກໍ່ສ້າງຢູ່ພາກສະໜາມຂອງໂຄງການກໍ່ສ້າງທາງດ່ວນວຽງຈັນ-ວັງວຽງ ທີ່ມີຄວາມຍາວ 109 ກິໂລແມັດ ໃນມູນຄ່າການກໍ່ສ້າງທັງໝົດ ເກືອບ 1,3 ຕື້ໂດລາສະຫະລັດຕື່ມອີກ.

________________

ໜັງສືພິມເສດຖະກິດ-ສັງຄົມ

แชร์