ຈີນ ເປີດສາຍການບິນຕ່າງຊາດເຂົ້າປະເທດແບບຈຳກັດ

  ສປ ຈີນ ເປີດໃຫ້ສາຍການບິນຕ່າງປະເທດເຂົ້າປະເທດແບບຈຳກັດຖ້ຽວບິນເລີ່ມຕັ້ງແຕ່ວັນທີ 8 ມິຖຸນາເປັນຕົ້ນໄປຫຼັງຈາກອາເມລິກາສັ່ງບໍ່ໃຫ້ຖ້ຽວບິນຈີນເຂົ້າປະເທດ.

   ຕາມຂ່າວຕ່າງປະເທດລາຍງານວ່າສຳນັກງານການບິນພົນລະເມືອງແຫ່ງຊາດຈີນ (CAAC) ອອກຖະແຫຼງການໃນທ້າຍອາທິດທີ່ຜ່ານມາວ່າຈີນຈະອະນຸຍາດໃຫ້ສາຍການບິນຕ່າງປະເທດສາມາດບິນເຂົ້າຈີນໄດ້ຫຼາຍຂຶ້ນໂດຍຖະແຫຼງການດັ່ງກ່າວມີຂຶ້ນບໍ່ດົນຫຼັງຈາກອາເມລິກາສັ່ງຫ້າມສາຍການບິນຂອງຈີນເດີນທາງເຂົ້າສູ່ອາເມລິ ການັບຕັ້ງແຕ່ກາງເດືອນມິຖຸນາເປັນຕົ້ນໄປ, ຊຶ່ງຖະແຫຼງການລະບຸວ່າສາຍການບິນຕ່າງປະເທດທີ່ປະຈຸບັນໄດ້ສັ່ງຫ້າມບໍ່ໃຫ້ເດີນທາງເຂົ້າ-ອອກຈີນນັ້ນຈະໄດ້ຮັບອະນຸ ຍາດໃຫ້ເປີດບໍລິການຖ້ຽວບິນໄປຍັງຈີນໄດ້ອາທິດລະເທື່ອໂດຍຈະເລີ່ມຕັ້ງແຕ່ວັນທີ 8 ມິຖຸນານີ້ເປັນຕົ້ນໄປ, ມີການລາຍງານວ່າຄະນະຂອງ ທ່ານ ໂດນັລ ທຣຳ ປະທາ ນາທິບໍດີຂອງອາເມລິກາໄດ້ສັ່ງຫ້າມສາຍການບິນຂອງຈີນເດີນທາງເຂົ້າສູ່ອາເມລິການັບຕັ້ງແຕ່ວັນທີ 16 ມິຖຸນານີ້ເປັນຕົ້ນໄປ ເພື່ອກົດ ດັນໃຫ້ຈີນເປີດທາງໃຫ້ສາຍການບິນຂອງອາເມລິກາເດີນທາງເຂົ້າໄປຍັງຈີນ, ທັງນີ້ສາຍການບິນເດລຕາແອລາຍ ແລະຢູໄນເຕັດ ແອລາຍຂອງອາເມລິກາຕ່າງພາກັນຮຽກຮ້ອງໃຫ້ຈີນເປີດເສັ້ນທາງບິນໃນເດືອນມິຖຸນາ ຂະນະທີ່ສາຍການບິນຂອງຈີນຍັງສາມາດເດີນທາງໄປຍັງອາເມລິກາໄດ້ໃນໄລຍະມີການລະບາດຂອງເຊື້ອໂຄວິດ-19.

   ຢ່າງໃດກໍຕາມການປະກາດຂອງລັດຖະບານອາເມລິກາຖືເປັນການໂຕ້ຕອບຈີນຕໍ່ການທີ່ຈີນປະຕິເສດທີ່ຈະປະຕິບັດຕາມຂໍ້ຕົກລົງສະບັບປະຈຸບັນກ່ຽວກັບຖ້ຽວບິນຂອງທັງສອງປະເທດ.

_____________

ໜັງສືພິມເສດຖະກິດ-ສັງຄົມ

แชร์