ສກຂ ຫຼວງພະບາງ ຈັດກິດຈະກຳປູກຕົ້ນໄມ້

  ພະແນກສຶກສາທິການ ແລະກີລາແຂວງຫຼວງພະບາງ ຈັດກິດຈະກຳປູກຕົ້ນໄມ້ເພື່ອຄຳນັບຮັບຕ້ອນວັນທີ 1 ມິຖຸນາ ວັນເດັກນ້ອຍສາກົນ ແລະວັນປູກຕົ້ນໄມ້ແຫ່ງຊາດການຈັດກິດຈະກຳດັ່ງກ່າວໄດ້ຈັດຂຶ້ນເມື່ອວັນທີ 29 ພຶດສະພາ 2020 ຜ່ານມາທີ່ເຮືອນພັກນັກສຶກສາຫວຽດນາມ ແຂວງຫຼວງພະບາງ ໂດຍການນຳພາຂອງທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກີລາແຂວງພ້ອມດ້ວຍຄະນະ, ມີຫົວໜ້າ-ຮອງຫົວໜ້າຂະແໜງ, ສູນພະນັກງານພາຍໃນພະແນກເຂົ້າຮ່ວມຢ່າງພ້ອມພຽງ.

   ການປູກຕົ້ນໄມ້ໃນຄັ້ງນີ້ປະກອບມີຕົ້ນໄມ້ໃຫ້ໝາກ ແລະຕົ້ນໄມ້ໃຫ້ຮົ່ມຊຶ່ງນຳມາປູກຕາມບໍລິເວນເດີ່ນເຮືອນພັກນັກສຶກສາຫວຽດນາມ, ທ່ານ ຊາຍສະຫວັນ ຈັນມານິດ ກ່າວໃຫ້ຮູ້ຕື່ມວ່າ: ສໍາລັບການຈັດກິດຈະກຳຄັ້ງນີ້ແມ່ນເພື່ອເປັນການສ້າງຂະບວນການຄຳນັບຮັບຕ້ອນວັນທີ່ມີຄວາມໝາຍສຳຄັນຂອງຊາດໂດຍສະເພາະວັນທີ 1 ມິ ຖຸນາ ວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດໃຫ້ເປັນຂະບວນຟົດຟື້ນທັງເປັນການຮັດແໜ້ນຄວາມສາມັກຄີລະຫວ່າງອ້າຍ-ເອື້ອຍນ້ອງພະນັກງານພາຍໃນພະ ແນກຕື່ມອີກນອກນີ້ກໍ່ເພື່ອເປັນການຮັກສາສິ່ງແວດລ້ອມທຳມະຊາດສ້າງປ່າໄມ້ໃຫ້ກາຍເປັນປ່າພື້ນທີ່ສີຂຽວພ້ອມທັງເຮັດເປັນແບບຢ່າງທີ່ດີໃຫ້ກັບສັງຄົມໂດຍສະເພາະລູກຫຼານນັກຮຽນ-ນັກສຶກສານ້ອງໆເຍົາວະຊົນຈະໄດ້ສືບຕໍ່ປະຕິບັດ ແລະສ້າງປະໂຫຍດອັນດີງາມໃຫ້ກັບສັງຄົມກໍ່ຄືປະເທດຊາດໃນອະນາຄົດ.

__________

ໜັງສືພິມເສດຖະກິດ-ສັງຄົມ

แชร์