ສຶກສາຫຼວງພະບາງ ລົງຕິດຕາມ ການຮຽນ-ການສອນຄືນໃໝ່

   ເມື່ອບໍ່ດົນມານີ້ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກີລາແຂວງພ້ອມດ້ວຍທີມງານໄດ້ລົງເຄື່ອນໄຫວຕິດຕາມຊຸກຍູ້ການເປີດການຮຽນ-ການສອນທີ່ໂຮງຮຽນເປົ້າໝາຍຂອງເມືອງປາກແຊງ ເນື່ອງໃນໂອກາດທີ່ແຂວງຫຼວງພະບາງ ເປີດການຮຽນ-ການ ສອນຄືນໃໝ່ຂອງສາຍສາມັນສຶກສາຂັ້ນ ປ5, ມ4 ແລະ ມ7 ພາຍຫຼັງທີ່ໄດ້ໂຈະການຮຽນ-ການສອນມາແຕ່ວັນທີ 19 ມີນາ 2020 ຜ່ານມາຍ້ອນການແຜ່ລະບາດຂອງເຊື້ອພະຍາດຈຸລະໂລກສາຍພັນໃໝ່ ຫຼືໂຄວິດ-19.

  ການລົງເຄື່ອນໄຫວຕິດຕາມຂອງຄະນະທີມງານໃນຄັ້ງນີ້ໄດ້ເຂົ້າຢ້ຽມພົບປະພະນັກງານຄູ-ອາຈານທີ່ໂຮງຮຽນມັດທະຍົມສົມບູນ ແລະປະຖົມສຶກສົມບູນປາກເກັງ, ມັດ ທະຍົມສົມບູນ ແລະປະຖົມສົບແຈກ, ປະຖົມສົມບູນໜອງຟ້າແດດ,ປະຖົມສົມບູນວັງເງິນ ແລະ ໂຮງຮຽນມັດທະຍົມສົມບູນປາກແຊງເພື່ອຕິດຕາມການຈັດຕັ້ງປະຕິບັດການຮຽນ-ການສອນຂອງບັນດາໂຮງຮຽນໃນການຈັດຕັ້ງປະຕິບັດຂໍ້ກຳນົດແຈ້ງການຂອງກະຊວງສຶກສາທິການ ແລະກີລາ, ແຈ້ງການຂອງຄະນະສະເພາະກິດແຫ່ງຊາ ດວ່າດ້ວຍການປ້ອງກັນ, ຄວບຄຸມ ແລະແກ້ໄຂການແຜ່ລະບາດ ຂອງພະຍາດອັກເສບປອດໂຄວິດ-19.

  ໂອກາດດັ່ງກ່າວ, ທ່ານ ຊາຍສະຫວັນ ຈັນມານິດ ໄດ້ເນັ້ນໜັກໃຫ້ຜູ້ບໍລິຫານການສຶກສາຄູ-ອາຈານທຸກຂັ້ນຈົ່ງເພີ່ມທະວີເປັນເຈົ້າການເອົາໃຈໃສ່ແນະນຳໃຫ້ນ້ອງນັກ ຮຽນພໍ່ແມ່ປະຊາຊົນໃຫ້ຮູ້ເຖິງຜົນຮ້າຍ ແລະອັນຕະລາຍຂອງເຊື້ອພະຍາດດັ່ງກ່າວພ້ອມກັນນັ້ນໃຫ້ຄູຊ່ວຍແນະນຳເຖິງວິທີການປ້ອງກັນໂດຍການສ້າງອ້າງລ້າງມືພາຍໃນໂຮງຮຽນຕາມເງື່ອນໄຂຂອງແຕ່ລະໂຮງຮຽນ, ກວດກາຕິດຕາມການວັດແທກອຸນຫະພູມຂອງນ້ອງນັກຮຽນກ່ອນເຂົ້າຫ້ອງຮຽນພ້ອມຈັດຕັ້ງປະຕິບັດຮັກສາໄລຍະຫ່າງບ່ອນນັ່ງ, ຄວາມແອອັດຂອງຫ້ອງຮຽນຢ່າງເຂັ້ມງວດ ແລະສືບຕໍ່ຕິດຕາມແຈ້ງການຂອງກະຊວງສຶກສາທິການ ແລະກີລາໃນການກຽມຄວາມພ້ອມໃນທຸກໆດ້ານ.

--------------------

ໜັງສືພິມເສດຖະກິດ-ສັງຄົມ

แชร์