ສຶກສາອຸດົມໄຊ ລົງຊຸກຍູ້ຕິດຕາມການເຂົ້າຮຽນໃໝ່

 ເພື່ອເຮັດໃຫ້ການເຂົ້າຮຽນໃໝ່ໃນໄລຍະພັກຮຽນຍ້ອນພະຍາດໂຄວິດ-19 ໄດ້ດຳເນີນການ ຮຽນ-ການສອນເປັນປົກກະຕິຕາມ ແຈ້ງການແນະນຳຂອງຂັ້ນເທິງ ແລະເພື່ອຮັບປະກັນວິທີການປ້ອງ ກັນໃນຕໍ່ໜ້າ, ທາງຄະນະນຳພະແນກສຶກສາທິການ ແລະກີລາກໍ ໄດ້ລົງຕິດຕາມຊຸກຍູ້ພ້ອມທັງຮັບຟັງການລາຍງານມາດຕະການຈັດຕັ້ງປະຕິບັດເພື່ອປ້ອງກັນພະຍາດໂຄວິດ-19 ຈາກບັນດາຜູ້ອຳນວຍການໂຮງຮຽນແຕ່ລະແຫ່ງພ້ອມທັງສັງເກດການຈັດຕັ້ງປະຕິບັດດຳເນີນການຮຽນ-ການສອນ ແລະມາດຕະການປ້ອງກັນພະຍາດໂຄວິ-19 ຕາມແຈ້ງການແນະນຳທີ່ໄດ້ວາງອອກ.

ການລົງຕິດຕາມຊຸກຍູ້ເຂົ້າຮຽນໃໝ່ຂອງບັນດາໂຮງຮຽນແຫ່ງຕ່າງໆ ໃນຄັ້ງນີ້ແມ່ນໄດ້ຈັດແບ່ງ ເປັນຫຼາຍທີມ, ສຳລັບພາຍໃນເທ ສະບານນຳໂດຍທ່ານ ສົມສັກສຸ ພິໄລ ຮອງຫົວໜ້າພະແນກສຶກສາທິການ ແລະກີລາແຂວງ, ມີທ່ານນາງ ນີວັນ ໄຊຍະສິດ ຫົວໜ້າຂະແໜງສາມັນ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມ.

ນອກຈາກນີ້ຍັງໄດ້ແຕ່ງຕັ້ງຄະນະທິມງານລົງຕິດຕາມຊຸກຍູ້ການເຂົ້າຮຽນໃໝ່ຢູ່ໃນບັນດາໂຮງຮຽນແຫ່ງຕ່າງໆຕື່ມອີກເຊັ່ນ:ໂຮງຮຽນປະຖົມ ແລະມັດທະຍົມໂພນໂຮມ, ປະຖົມ ແລະມັດທະຍົມກໍນ້ອຍ, ປະຖົມຫຼັກ 10, ປະຖົມ ແລະມັດທະຍົມໂຮມໄຊ,ປະຖົມຫ້ວຍຍຳ, ປະຖົມໂຮມສຸກ,ປະຖົມພູຂຽວ; ປະຖົມ ແລະມັດທະຍົມຫຼັ້ກ 17, ປະຖົມປຸງຫຽງ, ປະຖົມ ແລະມັດທະຍົມນໍ້າກັດ,ປະຖົມຫ້ອຍຊາງ, ປະຖົມ ບ້ານແຟນ, ປະຖົມບ້ານໃໝ່,ປະຖົມ ແລະມັດທະຍົມບ້ານບໍ່, ໂຮງຮຽນເຂດຫຼັກ 32, ຫຼັກ 28, ນາຊາຍທອງ, ໂຮງຮຽນເຂດບ້ານ ຫ້ວຍຂຸມ ແລະແຫ່ງອື່ນໆອີກຈຳ ນວນໜຶ່ງ.

ທັງນີ້ກໍເພື່ອຕິດຕາມຊຸກຍູ້ການເຂົ້າຮຽນໃໝ່ຂອງແຕ່ລະໂຮງຮຽນໃຫ້ມີຄວາມເປັນເອກະພາບ ແລະ ໄດ້ດຳເນີນການຮຽນ-ການສອນເປັນປົກກະຕິ,ຮັບຟັງມາດຕະການປ້ອງກັນ ແລະກຽມຮັບມືກ່ຽວກັບການແຜ່ລະບາດຂອງພະຍາດໂຄວິດ-19 ຂອງໂຮງຮຽນ, ພ້ອມທັງນຳເອົາບັນດາແຈ້ງການ,ຄຳສັ່ງ ແນະນຳຂອງຂັ້ນເທິງໄປຜັນຂະຫຍາຍໃຫ້ຄູ-ອາຈານ, ນັກຮຽນໄດ້ຮັບຮູ້ເຂົ້າໃຈ ແລະໄດ້ແນະນຳການຈັດຕັ້ງປະຕິບັດບາງວຽກງານຂອງໂຮງຮຽນໃຫ້ມີການປັບປຸງດີຂຶ້ນ.

   ຜ່ານການລົງຕິດຕາມເຫັນໄດ້ວ່າຫຼາຍໂຮງຮຽນໄດ້ມີຄວາມພ້ອມເປີດຮຽນຄືນໃໝ່ແລະຈັດຕັ້ງການຮຽນ-ການສອນຕາມແຈ້ງການແນະນຳຂອງຂັ້ນເທິງວາງອອກໄດ້ຮັບຜົນດີ, ແຕ່ລະໂຮງຮຽນໄດ້ຈັດແບ່ງຫ້ອງຮຽນຂອງຕົນຫ້ອງ 1 ໄດ້ແບ່ງອອກເປັນ 2 ຫ້ອງເພື່ອໃຫ້ນັກຮຽນໄດ້ນັ່ງຫ່າງກັນຕາມທີ່ ໄດ້ກຳນົດ ແລະຈັດຄູ-ອາຈານສອນຊ່ວຍກັນຕາມຕາຕະລາງຮຽນ,ບາງໂຮງຮຽນມີເງື່ອນໄຂໄດ້ຈັດສັນບ່ອນລ້າງມື, ຊື້ເຈວແອວກໍຮໍ, ສະບູໃຫ້ນັກຮຽນ ແລະຄູ-ອາຈານ ໄດ້ຊົມໃຊ້, ໂຮງຮຽນທີ່ມີເຂດບໍລິການຂອງໂຮງໝໍນ້ອຍແມ່ນມີທ່ານ ໝໍມາໃຫ້ຄວາມຮູ້ດ້ານວິທີປ້ອງກັນພະຍາໂຄວິດ-19 ແລະແທກອຸນຫະພູມຮ່າງກາຍໃຫ້ຄູ,ນັກຮຽນ ແລະທຸກພາກສ່ວນມີຄວາມເຂົ້າໃຈພ້ອມກັນໃຫ້ການຮ່ວມມືເປັນຢ່າງດີ.

  ແຕ່ກໍຍັງມີຫຼາຍສິ່ງຫຼາຍຢ່າງເປັນບັນຫາທ້າທາຍທີ່ຈະພ້ອມກັນຊອກວີທີທາງປັບປຸງແກ້ໄຂໃຫ້ດີຂຶ້ນເຊັ່ນວ່າ:ບາງໂຮງຮຽນແມ່ນຂາດນໍ້າໃຊ້ ໂດຍສະເພາະໂຮງຮຽນ ເຂດຫ່າງໄກສອກຫຼີກ, ນໍ້າລິນແຫ້ງແລ້ງ, ນໍ້າແມ່ຢູ່ໄກເຮັດໃຫ້ການລ້າງມືບໍ່ເປັນປົກກະຕິ, ໂຮງຮຽນຂາດງົບປະມານໃນການຊື້ອຸປະກອນເພື່ອຊ່ວຍປ້ອງກັນພະຍາດໂຄວິດ-19, ນັກຮຽນຈຳນວນໜຶ່ງຍັງບໍ່ມີຄວາມຮູ້ ແລະຍັງຖືເບົາໃນການປ້ອງກັນພະຍາດໂຄວິດ; ເຖິງແນວໃດກໍຕາມໂດຍລວມແລ້ວແຂວງອຸດົມໄຊພວກເຮົາແມ່ນສາມາດສືບຕໍ່ດຳເນີນການຮຽນ-ການສອນຕາມແຈ້ງການແນະນຳຂອງກະຊວງສຶກສາທິການ ແລະກີລາວາງອອກໄດ້ຢ່າງມີປະສິດທິພາບ ແລະປະສິດທິຜົນດີ.

--------

ໜັງສືພິມເສດຖະກິດ-ສັງຄົມ

แชร์