ມອບ-ຮັບຫ້ອງການຫຼັງໃໝ່ອົງການໄອຍະກາປະຊາຊົນແຂວງໄຊສົມບູນ

  ພິທີມອບ-ຮັບອາຄານຫ້ອງການຫຼັງໃໝ່ຂອງອົງການໄອຍະການປະຊາຊົນ ແຂວງໄຊສົມບູນ ລະຫວ່າງອົງການໄອຍະການປະຊາຊົນສູງສຸດ ແລະບໍລິສັດ ດາວເໜືອ ພັດທະນາຄົບວົງຈອນໄດ້ຈັດຂຶ້ນໃນວັນທີ 29 ພຶດສະພາ ຜ່ານມາໂດຍການເຂົ້າຮ່ວມຂອງ ທ່ານ ບຸນສຸກ ຈອມວິສານ ປະທານສະພາປະຊາຊົນແຂວງ, ທ່ານ ນາງ ບຸນໄທ ປັນແກ້ວ ຫົວໜ້າກົມແຜນການ ແລະການຮ່ວມມືຕ່າງປະເທດອົງການໄອຍະການປະຊາຊົນສູງສຸດ, ມີຫົວໜ້າ-ຮອງຫົວໜ້າພະແນກການອ້ອມຂ້າງແຂວງພ້ອມດ້ວຍພະນັກງານອົງການໄອຍະການປະຊາຊົນແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.


  ທ່ານ ພູວົງ ພຸດທະລາດ ຮອງອໍານວຍການບໍລິສັດດາວເໜືອ ພັດທະນາລາຍງານກ່ຽວກັບການກໍ່ສ້າງອາຄານຫ້ອງການຫຼັງໃໝ່ຂອງອົງການໄອຍະການປະຊາຊົນແຂວງຊຶ່ງໄດ້ເຊັນສັນຍາຮັບເໝົາກໍ່ສ້າງມາແຕ່ວັນທີ 8 ມິຖຸນາ 2018 ໄລຍະເວລາກໍ່ສ້າງ 18 ເດືອນ, ມູນຄ່າການກໍ່ສ້າງທັງໝົດ 6,53 ຕື້ກີບ, ໝົດກໍານົດກໍ່ສ້າງໃນວັນທີ 8 ທັນວາ 2019 ໃຫ້ສໍາເລັດ 100% ແຕ່ສະພາບຕົວຈິງການກໍ່ສ້າງແມ່ນບໍ່ສາມາດປະຕິບັດໄດ້ຕາມສັນຍາຍ້ອນພື້ນທີ່ປຸກສ້າງຫ້ອງການມີສິ່ງກີດຂວາງເປັນຕົ້ນແມ່ນເຮືອນປະຊາຊົນຈົນແກ່ຍາວມາຮອດ ວັນທີ 28 ກັນຍາ 2018 ຈຶ່ງໄດ້ເລີ່ມລົງມືກໍ່ສ້າງ ແລະມາຮອດວັນ 25 ກຸມພາ 2020 ຈຶ່ງສຳເລັດ 100%, ອາຄານຫຼັງດັ່ງກ່າວນີ້ເປັນອາຄານ 2 ຊັ້ນ, ມີຫ້ອງທັງໝົດ 20 ຫ້ອງ, ຫ້ອງປະຊຸມ 2 ຫ້ອງ ແລະມີຫ້ອງນໍ້າ 4 ຫ້ອງ.
   ຫຼັງຈາກນັ້ນຮອງອໍານວຍການບໍລິສັດ ດາວເໜືອ ພັດທະນາ ໄດ້ກ່າວມອບອາຄານຫ້ອງການຫຼັງໃໝ່ໃຫ້ອົງການໄອຍະການປະຊາຊົນສູງສຸດ, ເພື່ອມອບຕໍ່ໃຫ້ອົງການໄອຍະການປະຊາຊົນ ແຂວງໄຊສົມບູນ ເປັນຜູ້ນໍາໃຊ້ ແລະປົກປັກຮັກສາ, ຈາກນັ້ນໄດ້ມີພິທີເຊັນບົດບັນທຶກມອບ-ຮັບ ອາຄານຫຼັງໃໝ່ລະຫວ່າງອົງການໄອຍະການປະຊາ ຊົນສູງສຸດຊຶ່ງຕາງໜ້າເຊັນໂດຍ ທ່ານ ນາງ ບຸນໄທ ປັນແກ້ວ ແລະທ່ານ ພູວົງ ພຸດທະລາດ.

-------------------

ໜັງສືພິມເສດຖະກິດ-ສັງຄົມ

แชร์