5 ປີນໍ້າປະປາໄຊຍະບູລີ ມອບພັນທະໃຫ້ລັດ 8,5 ຕື້ກີບ

  ສະຫາຍ ອາລິຍະ ຂັນຕິ ເລຂາໜ່ວຍພັກ ຫົວໜ້າບໍລິສັດລັດວິສາຫະກິດນໍ້າປະປາແຂວງໄຊຍະບູລີ ໄດ້ລາຍງານໃນກອງປະຊຸມໃຫຍ່ຄັ້ງທີ IV ຂອງໜ່ວຍພັກບໍລິສັດລັດວິສາຫະກິດນໍ້າປະປາວ່າ: ໜ່ວຍພັກບໍລິສັດລັດວິສາຫະກິດນໍ້າປະປາແມ່ນເຄື່ອນໄຫວຕາມພາລະບົດບາດບໍລິການສະໜອງນໍ້າປະປາພາຍໃນເທສະບານແຂວງ ແລະເທສະບານເມືອງ, ເຂດກຸ່ມບ້ານພັດທະນາໃຫ້ມີນໍ້າປະປາຊົມໃຊ້ຕາມແນວທາງນະໂຍບາຍການພັດທະນາຂອງພັກ ແລະໃຫ້ໄດ້ຕາມແຜນຍຸດທະສາດເຮັດໃຫ້ປະຊາຊົນໃນຕົວເມືອງໄດ້ມີນໍ້າປະປາຊົມໃຊ້ 80% ໃນປີ 2020 ຕະຫຼອດໄລຍະ 5 ປີການຈັດຕັ້ງນໍາພາ ແລະຜັນຂະຫຍາຍມະຕິກອງປະຊຸມໃຫຍ່ຄັ້ງທີ II ຂອງຄະນະພັກຮາກ ຖານມະຕິກອງປະຊຸມໃຫຍ່ຄັ້ງທີ III ຂອງຕົນໄດ້ມີທັງກາລະໂອກາດທີ່ເອື້ອອໍານວຍ,ມີທັງຂໍ້ສະດວກ,ຂໍ້ຫຍຸ້ງຍາກ ແລະສິ່ງທ້າທາຍທົດສອບຫຼາຍປະການແຕ່ດ້ວຍຈິດໃຈບຸກທະລຸໃນການນໍາພາຂອງຄະນະພັກ, ຄະນະນໍາ ແລະຂອງສະມາຊິກພັກ, ພະນັກງານ, ກໍາມະກອນຈຶ່ງເຮັດໃຫ້ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຕິດພັນກັບຂະບວນການແຂ່ງຂັນຮັກຊາດ ແລະພັດທະນາໄດ້ມີຜົນສໍາເລັດເປັນຢ່າງດີ.


   ນອກນີ້ຄະນະພັກໄດ້ນໍາພາສະມາຊິກພັກພະນັກງານ ແລະກໍາມະກອນເຂົ້າຮ່ວມການເຜີຍແຜ່ບັນດາແນວທາງນະໂຍບາຍ, ມະຕິຄໍາສັ່ງ ແລະເອກະສານສໍາຄັນຂອງຊາດ, ຂອງພັກທີ່ຄະນະພັກ, ຄະນະພະແນກ, ອົງການປົກຄອງແຂວງຈັດຂຶ້ນອັນໄດ້ເຮັດໃຫ້ສະມາຊິກພັກພະນັກງານໄດ້ຮັບຮູ້ເຂົ້າໃຈ, ສາມາດກໍາແໜ້ນແນວທາງຂອງພັກ ແລະ ນະໂຍບາຍຂອງລັດວາງອອກໃນແຕ່ລະໄລຍະເຊິ່ງສາມາດຕອບໂຕ້ ແລະ ຕ້ານໄດ້ທຸກເລ່ລ່ຽມກົນອຸບາຍຂອງພວກສັດຕູ ແລະ ກຸ່ມຄົນບໍ່ດີເຮັດໃຫ້ພາຍໃນໜ່ວຍພັກປາສະຈາກ ແລະຫຼີກລ້ຽງບັນຫາປາກົດການຫຍໍ້ທໍ້ຕ່າງໆໃນສັງຄົມ;ຄຽງຄູ່ກັນນີ້ຄະນະພັກສະມາຊິກພັກໄດ້ເປັນເຈົ້າການເອົາໃຈໃສ່ປັບປຸງກໍ່ສ້າງຕົນເອງ ແລະກໍ່ສ້າງໜ່ວຍຕາມຫຼັກການ, ທິດນໍາຂອງພັກວາງອອກໄດ້ເປັນຢ່າງດີ.
  ພ້ອມດຽວກັນນີ້ຄະນະໜ່ວຍພັກໄດ້ເອົາໃຈໃສ່ຊີ້ນໍາ-ນໍາພາດ້ານດ້ານວິຊາສະເພາະເປັນບັນຫາສໍາຄັນທັງພາຍໃນບໍລິສັດ, ສາຂາ ແລະໜ່ວຍງານບໍລິການທີ່ຂຶ້ນກັບໃຫ້ດໍາເນີນທຸລະກິດໄດ້ຢ່າງມີປະສິດທິຜົນຊຶ່ງສະແດງອອກທົ່ວແຂວງມີລະບົບນໍ້າປະປາຊົມໃຊ້ແລ້ວ 9 ຕົວເມືອງ, ທຽບໃສ່ປີ 2014 ເພີ່ມຂຶ້ນ 2 ຕົວເມືອງ ແລະ 2 ພື້ນທີ່, ກຸ່ມບ້ານພັດທະນາມີຜູ້ຊົມໃຊ້ນໍາປະປາຈາກ 69.430 ຄົນ ໃນປີ 2014 ຂຶ້ນມາເປັນ 83.904 ຄົນ, ໃນປີ 2019 ສາມາດເພີ່ມອັດຕາສ່ວນປົກຄຸມພື້ນທີ່ບໍລິການຈາກ 65% ຂຶ້ນມາເປັນ 71% ໃນປີ 2019 ສາມາດຜະລິດ ນໍ້າສົ່ງອອກຈາກໂຮງງານໄດ້ທັງ ໝົດ 18.388 m3 ແລະຈໍາໜ່າຍຮັບໃຊ້ພໍ່ແມ່ປະຊາຊົນບັນດາເຜົ່າ ໄດ້ເຖິງ 16.512m3 ຄຸ້ມຄອງຫຼຸດຜ່ອນປະລິມານນໍ້າເສຍບໍ່ເກີນ 25% ໃນປະຈຸບັນທົ່ວແຂວງມີໝໍ້ແທກນໍ້າທັງໝົດ 19.157 ໜ່ວຍສາມາດເກັບລາຍຮັບໄດ້ທັງໝົດ 69,5 ຕື້ກີບ ແລະປະຕິບັດລາຍຈ່າຍໄດ້ທັງໝົດ 68 ຕື້ກີບ.
 ໂດຍລວມການດໍາເນີນທຸລະກິດນໍ້າປະປາແມ່ນມີທ່າອ່ຽງດີຂຶ້ນມີຜົນກໍາໄລໃນແຕ່ລະປີຮັບປະກັນສະຖຽນລະພາບທາງດ້ານການເງິນ, ສາມາດຊໍາລະຕົ້ນທຶນ ແລະ ດອກ ເບ້ຍເງິນກູ້ໄດ້ຢ່າງເປັນປົກກະຕິພ້ອມທັງພັນທະຕໍ່ລັດໄດ້ຕາມແຜນການ ແລະ ຖືກຕ້ອງຕາມລະບຽບໄດ້ທັງໝົດ 8,5 ຕື້ກີບ ແລະ ຈ່າຍປັນຜົນຈາກການດໍາເນີນທຸລະ ກິດໃຫ້ແກ່ລັດທັງໝົດ 982 ລ້ານກີບ; ຈາກຜົນງານດັ່ງກ່າວໄດ້ເຮັດໃຫ້ລັດວິສາຫະກິດນໍ້າປະປາມີການ ເຕີບໃຫຍ່ເຂັ້ມແຂງຊຶ່ງສະແດງອອກໃນການດໍາເນີນຊີວິດການເມືອງຕີລາຄາແບ່ງປະເພດສະມາຊິກພັກ ແລະໜ່ວຍພັກ. ປະເພດສະມາຊິກພັກໄດ້ແຂງ 100%, ຂະ ແໜງການໄດ້ແຂງ 100%, ອົງການຈັດຕັ້ງຊາວໝຸ່ມ, ແມ່ຍິງໄດ້ ແຂງກວມ 100%, ໜ່ວຍພັກເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ບໍລິສັດວິສາຫະກິດນໍ້າປະປາມີສະມາຊິກພັກພະນັກງານ-ລັດຖະກອນທັງໝົດ 41 ສະຫາຍ,ຍິງ 13 ສະຫາຍ,ພະນັກງານ 90% ມີ 5 ສະຫາຍ, ຍິງ 1 ສະຫາຍ, ສະມາຊິກພັກທັງໝົດ 28 ສະຫາຍ, ຍິງ 7 ສະຫາຍ, ສໍາຮອງ 3 ສະຫາຍ, ປະກອບມີ 4 ຂະແໜງການ ແລະ 3 ອົງການຈັດຕັ້ງ.
  ຈາກນັ້ນກອງປະຊຸມຍັງໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກເອົາຄະນະໜ່ວຍພັກຊຸດໃໝ່ມີຜູ້ໝັກຮັບເລືອກຕັ້ງ 7 ສະຫາຍ, ຍິງ 2 ສະຫາຍ ເລືອກເອົາ 5 ສະຫາຍ. ກອງປະຊຸມຄັ້ງປະຖົມມະລຶກເຫັນດີເປັນເອກະສັນກັນເລືອກເອົາ ສະຫາຍ ອາລິຍະ ຂັນຕິ ເປັນເລຂາໜ່ວຍພັກ, ສະຫາຍ ລັກຊະນະ ແກ້ວແສງທິດ ເປັນ ຮອງເລຂາທັງເລືອກເອົາປະທານກວດກາ ແລະຜູ້ຊ່ວຍວຽກກວດກາຄົບຊຸດ.


  ກອງປະຊຸມຄັ້ງນີ້ໄດ້ຈັດຂຶ້ນໃນທ້າຍເດືອນພຶດສະພາ ປີ 2020 ນີ້ຢູ່ທີ່ຫ້ອງປະຊຸມລັດວິສາຫະກິດນໍ້າປະປາແຂວງໂດຍການເປັນປະທານຂອງ ສະຫາຍ ອາລິຍະ ຂັນຕິ ເລຂາໜ່ວຍພັກຫົວໜ້າບໍລິສັດລັດວິສາຫະກິດນໍ້າປະປາແຂວງ,ເຂົ້າຮ່ວມມີ ສະຫາຍ ຄໍາເພັດ ພົມມະລາດ ເລຂາຄະນະພັກຮາກຖານຫົວໜ້າພະແນກ ຍທຂ, ມີໜ່ວຍປະຕິບັດງານຂອງແຂວງ, ແຂກຖືກເຊີນພ້ອມດ້ວຍສະມາຊິກພັກສົມບູນ ແລະສໍາຮອງເຂົ້າຮ່ວມ.

________________

ຂຽນໂດຍ: ບຸນທີ

  ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์