ຫຼວງນໍ້າທາ ເຝົ້າລະວັງໄຂ້ຍຸງລາຍ

  ຕາມການລາຍງານຂອງທ່ານ ດຣ ຄຳຈັນ ອິນທອງ ຫົວໜ້າພະແນກສາທາລະນະສຸກແຂວງຫຼວງນໍ້າທາໃຫ້ຮູ້ໃນວັນທີ 4 ມິຖຸນາ 2020 ວ່າ: ກ່ຽວກັບການລະບາດຂອງພະຍາດໄຂ້ຍຸງລາຍແມ່ນໄດ້ເລີ່ມແຕ່ເດືອນມັງກອນ-ມິຖຸນາ ປີ 2020, ຢູ່ເມືອງວຽງພູຄາມີ 15 ບ້ານ, 32 ກໍລະນີ, ໄດ້ກວດຢັ້ງຢືນຈາກຫ້ອງວິເຄາະ 18 ກໍລະ ນີ, ສ່ວນ 14 ກໍລະນີແມ່ນ ສົງໄສ, ເມືອງສິງມີ 2 ບ້ານ 3 ກໍລະນີ ແລະເມືອງຫຼວງນໍ້າທາ 1 ບ້ານ, ມີ 1 ກໍລະນີ.

   ພະຍາດໄຂ້ຍຸງລາຍມີອາການຄື: ໄຂ້ຂຶ້ນສູງ 38-39 ອົງສາ, ເຈັບກະໂບງຕາ, ເຈັບປວດຕາມກ້າມຊີ້ນ, ພະຍາດໄຂ້ຍຸງລາຍແມ່ນນີ້ມີຄວາມອັນຕະລາຍຖ້າບໍ່ໄດ້ຮັບການປິ່ນປົວຢ່າງຖືກຕ້ອງ ແລະເໝາະສົມ ແລະຈະກ້າວໄປເຖິງຂັ້ນເສຍຊີວິດໄດ້ເພາະວ່າເຊື້ອຈຸລະໂລກນີ້ແມ່ນຍັງບໍ່ທັນມີຢາວັກຊີນປ້ອງກັນເທື່ອຕ້ອງປິ່ນປົວຕາມອາການ ໂດຍສະເພາະແມ່ນການປະເມີນສະພາບຄົນເຈັບ ແລະການສົ່ງນໍ້າເຂົ້າໃນຮ່າງກາຍເພື່ອໄປປ້ອງກັນບໍ່ໃຫ້ເມັດເລືອດຈັບກຸ່ມກັນ ຫຼືເລືອດມີຄວາມເຂັ້ມຂຸ້ນຂຶ້ນ.

  ວິທີປ້ອງກັນພະຍາດໄຂ້ຍຸງລາຍທີ່ເກີດມາຈາກພາຫະນະນຳເຊື້ອຕ້ອງທຳລາຍແຫຼ່ງເພາະພັນຂອງຍຸງລາຍເຊັ່ນ: ອຸແອ່ງ, ກະໂປະ, ກະປອງທີ່ເປັນພາຊະນະກັກຂັງນໍ້າເພື່ອບໍ່ໃຫ້ຍຸງລາຍວາງໄຂ່ໄດ້ປະຕິບັດຕາມຫຼັກອະນາໄມ 5 ປໍ ເປັນປະຈຳ.

 ທ່ານຍັງຮຽກຮ້ອງມາຍັງພະນັກງານ, ທະຫານ, ຕຳຫຼວດ ແລະປະຊາຊົນຈົ່ງພ້ອມກັນເອົາໃຈໃສ່ໃນການຕິດຕາມອາການທີ່ເຈັບເປັນ, ແນະນຳໃຫ້ໄປສະຖານທີ່ບໍລິການສາທາລະນະສຸກທີ່ຢູ່ໃກ້ບ້ານຂອງທ່ານເພື່ອກວດ ແລະ ບົ່ງມະຕິໃນເບື້ອງຕົ້ນ, ບໍ່ໃຫ້ຊື້ຢາກິນເອງຖ້າເຈັບເປັນຍ້ອນພະຍາດດັ່ງກ່າວ, ເພາະຢາບາງຊະນິດອາດຈະໄປທຳ ລາຍເມັດເລືອດແດງໃນຮ່າງກາຍເຮົາເພີ່ມຄວາມອັນຕະລາຍຮ້າຍແຮງຂຶ້ນ, ດັ່ງນັ້ນຈິ່ງຕ້ອງເພີ້ມທະວີເອົາໃຈໃສ່ໃນການທຳລາຍແຫຼ່ງເພາະພັນຂອງຍຸງລາຍ ແລະ ເອົາໃຈໃສ່ເບີ່ງແຍງຕົນເອງຄອບຄົວກໍ່ຄືຄົນທີ່ທ່ານຮັກໃຫ້ມີສຸຂະພາບແຂງແຮງປາສະຈາກໂລກໄພໄຂ້ເຈັບຕ່າງໆ, ເປັນຕົ້ນແມ່ນພະຍາດໄຂ້ຍຸງລາຍທີ່ພວມລະບາດໃນຊ່ວງລະດູຝົນນີ້.

_____________

ຂຽນໂດຍ: ອຸ້ມ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์