ມສ ສຸກສະຫວັດ ເຂັ້ມງວດການປ້ອງກັນໂຄວິດ-19 ພ້ອມງົດກິດຈະກຳເຕົ້າໂຮມກັນ

 ໂຮງຮຽນ ມສ ສຸກສະຫວັດ ມີຄວາມພ້ອມທຸກດ້ານໃນການເປີດການຮຽນ-ການສອນຄືນໃໝ່ທຸກຊັ້ນຮຽນພ້ອມວາງມາດຕະການປ້ອງກັນການຕິດເຊື້ອໂຄວິດ-19 ຢ່າງເຄັ່ງຂັດເປັນຕົ້ນໄດ້ງົດບາງກິດຈະກຳທີ່ເປັນການໂຮມຊຸມນຸມເຊັ່ນ: ການເຄົາລົບທູງຊາດ, ການຫຼິ້ນກີລາ,  ການອະນາໄມລວມ ແລະອື່ນໆ ພ້ອມທັງຍັງໄດ້ວາງມາດຕະການຢ່າງເຂັ້ມງວດ.

  ທ່ານ ບຸນຈັນ ສີດວງໄຊ ຜູ້ອຳນວຍການໂຮງຮຽນ ມສ ສຸກສະຫວັດໃຫ້ສຳພາດວ່າ: ການເປີດການຮຽນ-ການສອນຄືນໃໝ່ນີ້, ທາງເຮົາໄດ້ມີຄວາມພ້ອມໃນທຸກດ້ານບໍ່ວ່າຈະເປັນຄູ-ອາຈານ, ຫ້ອງຮຽນກໍມີຄວາມພຽງພໍ ແລະໄດ້ວາງມາດຕະການຕ່າງໆ ເພື່ອປ້ອງກັນການຕິດເຊື້ອຂອງພະຍາດນີ້ໂດຍໄດ້ແນະນຳໃຫ້ນັກຮຽນທຸກຄົນຕ້ອງໃສ່ຜ້າອັດປາກ-ດັງ, ລ້າງມື້ໃສ່ສະບູເຈວລ້າງມືພ້ອມນັ້ນຍັງໄດ້ມີຈຸດວັດແທກອຸນຫະພູມ, ຈຸດລ້າງມື ແລະອະນາໄມອ້ອມຮອບບໍລິເວນໂຮງຮຽນເປັນປະຈຳສຳລັບມາດຕະການຮັກສາໄລຍະຫ່າງ ທາງໂຮງຮຽນໄດ້ຈັດແບ່ງໃຫ້ນັກຮຽນນັ່ງໂຕະລະຄົນຫ້ອງໜຶ່ງ, ບໍ່ໃຫ້ເກີນ 27 ຄົນ.

  ສຳລັບໃນການເປີດການຮຽນ-ການສອນຄືນໃໝ່ໂຮງຮຽນກໍໄດ້ປະຕິບັດຕາມແຈ້ງການຂອງກະຊວງສຶກສາທິການ ແລະກີລາກໍຄືຄະນະສະເພາະກິດວາງອອກຢ່າງ ຈິງ ຈັງດ້ວຍສະເພາະມາດຕະການປ້ອງກັນການຕິດເຊື້ອໂຄວິດ-19 ຊຶ່ງເຫັນໄດ້ວ່າບັນດານ້ອງນັກຮຽນກໍໃຫ້ການຮ່ວມມືເປັນຢ່າງດີໂດຍໄດ້ໃສ່ຜ້າອັດປາກ-ອັດດັງ, ບໍ່ຊຸມນຸມກັນເປັນກຸ່ມເປັນກ້ອນພ້ອມດຽວກັນນັ້ນໂຮງຮຽນຍັງໄດ້ຕິດປ້າຍໂຄສະນາເຜີຍແຜ່ກ່ຽວກັບການປ້ອງກັນການຕິດເຊື້ອພະຍາດດັ່ງກ່າວຢູ່ຕາມອາຄານ, ແຕ່ລະ ຫ້ອງອ້ອມ ຮອບບໍລິເວນໂຮງຮຽນ.

-------------

ໜັງສືພິມເສດກິດ-ສັງຄົມ

แชร์