ເຊກອງລົງກວດທຽບມາດຕະຖານໝໍ້ນັບໄຟ, ນໍ້າປະປາ ແລະຫົວຈ່າຍນໍ້າ

  ໃນວັນທີ 2 ມິຖຸນາ 2020 ພະແນກວິທະຍາສາດ ແລະເຕັກໂນໂລຊີແຂວງເຊກອງຮ່ວມກັບລັດວິສາຫະກິດໄຟຟ້າລາວສາຂາແຂວງເຊກອງ, ລັດວິສາຫະກິດນໍ້າປະປາ ແລະຄະນະກໍາມະການກວດກາມາດຕະຖານ ແລະວັດແທກຈາກຂະແໜງການກ່ຽວຂ້ອງໄດ້ລົງເຄື່ອນໄຫວຕິດຕາມກວດກາ, ກວດທຽບມາດຕະຖານໝໍ້ນັບກະແສໄຟ ຟ້າ, ໝໍ້ແທກນໍ້າປະປາ ແລະຫົວຈ່າຍນໍ້າມັນເຊື້ອໄຟຢູ່ພາຍໃນເທສະບານແຂວງໂດຍມີທ່ານ ເຫຼັກໄຫຼ ສວິໄລ ຮອງເຈົ້າແຂວງໆເຊກອງ, ທ່ານ ສຸລະພົນ ໝື່ນວິເສດ ຫົວ ໜ້າພະແນກວິທະຍາສາດ ແລະເຕັກໂນໂລຊີແຂວງເຂົ້າຮ່ວມ.

 ທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະເຕັກໂນໂລຊີແຂວງເຊກອງກ່າວວ່າ: ການລົງເຄື່ອນໄຫວຕິດຕາມກວດກາ, ກວດທຽບມາດຕະຖານໝໍ້ນັບກະແສໄຟຟ້າ, ໝໍ້ແທກນໍ້າປະປາ ແລະຫົວຈ່າຍນໍ້າມັນເຊື້ອໄຟຄັ້ງນີ້ແມ່ນເປັນການກວດທຽບລະບົບປົກກະຕິປະຈຳປີ ແລະວິທີການກວດແມ່ນປະຕິບັດຕາມລະບຽບ ຫຼັກການຂອງກະຊວງວິທະຍາສາດແລະເຕັກໂນໂລຊີກໍຄືກົມມາດຕະຖານ ແລະການວັດແທກວາງອອກ, ທັງນີ້ກໍເພື່ອໃຫ້ມີຄວາມລະອຽດຊັດເຈນ, ຖືຕ້ອງຕາມເຕັກນິກມາດຕະຖານແນໃສ່ປົກປ້ອງສິດຜົນປະໂຫຍດ, ຊັບສິນຂອງຜູ້ຊົມໃຊ້ ແລະຜູ້ໃຫ້ບໍລິການບໍ່ໃຫ້ມີການເອົາລັດເອົາປຽບເຊິ່ງກັນ ແລະກັນ.

  ດ້ານທ່ານ ວຽງໄຊ ວໍລະສິງ ຮອງຫົວໜ້າພະແນກວິທະຍາສາດ ແລະເຕັກໂນໂລຊີແຂວງລາຍງານວ່າ: ຜ່ານການຈັດຕັ້ງປະຕິບັດໜ້າວຽກຕົວຈິງຢູ່ພາກສະໜາມກ່ຽວກັບການກວດສອບ, ກວດທຽບໝໍ້ແທກນໍ້າປະປາທີ່ຕິດຕັ້ງໃນສຳນັກງານລັດແລະຄົວເຮືອນຂອງປະຊາຊົນທີ່ຢູ່ພາຍໃນເມືອງລະມາມພາກສະໜາມໃນ 17 ບ້ານ, ມີຈຳນວນ 4.965 ໜ່ວຍ ຊຶ່ງເລີ່ມແຕ່ວັນທີ 11-22 ພຶດສະພາ 2020; ຊຶ່ງຫຼັກການກວດສອບແມ່ນນຳໃຊ້ຖັງຜອງບໍລິມາດຂະໜາດ 10-50 ລິດ ກວດສອບ 2 ຂັ້ນຕອນ, ສາມາດກວດຊຸ່ມໄດ້ຈຳນວນ 17 ບ້ານ, ມີຈຳນວນ 151 ໜ່ວຍ ແມ່ນກຳນົດເອົາຄ່າຕາມມາດຕະຖານຂອງກະຊວງ ວຕ ຄື: ກຳນົດເອົາຕາມຈຸດເປົ້າໝາຍທີ່ມີກົງເຕີປະມານ 100 ໜ່ວຍ ສາມາດຊຸ່ມເອົາ 3% ແລະເລືອກເອົາ 3 ຈຸດ ມີທັງໝົດ 4.965 ໜ່ວຍ ຊຶ່ງໃນນີ້ ມີ 4.957 ໜ່ວຍ ທີ່ຖືກຕ້ອງຕາມມາດຕະຖານແຫ່ງຊາດກຳນົດໄວ້ ແລະມີຈຳນວນ 8 ໜ່ວຍ ທີ່ບໍ່ໄດ້ມາດຕະຖານຈຶ່ງໄດ້ມອບໃຫ້ລັດວິສາຫະກີດນໍ້າປະປາປ່ຽນຖ່າຍໝໍ້ແທກນໍ້າປະປາຄືນໃໝ່ໃຫ້ແກ່ປະຊາຊົນໂດຍບໍ່ໄດ້ເສຍຄ່າ.

  ສຳລັບການກວດສອບທຽບຫົວຈ່າຍນໍ້າມັນເຊື້ອໄຟແມ່ນໄດ້ເລີ່ມແຕ່ວັນທີ 16-26 ມີນາ 2020 ຜ່ານມາຊຶ່ງກວດສອບຕົວຈິງ 3 ເມືອງຄື: ເມືອງລະມາມ, ທ່າແຕງ ແລະດາກຈຶງລວມມີ 29 ປໍ້າ, 160 ຫົວຈ່າຍ, ສາມາດກວດສອບຕົວຈິງໄດ້ 106 ຫົວຈ່າຍ ໃນນັ້ນມີການຄາດເຄື່ອນ 32 ຫົວຈ່າຍ ແລະໄດ້ດັດປັບໃຫ້ຢູ່ໃນການມາດ ຕະຖານທີ່ລັດກຳນົດໄວ້, ໃນຈຳນວນ 54 ຫົວຈ່າຍແມ່ນໄດ້ປິດບໍລິການຊົ່ວຄາວ, ນອກນີ້ຍັງຈະໄດ້ສືບຕໍ່ລົງກວດສອບໝໍ້ນັບໄຟຟ້າທີ່ເມືອງລະມາມຕື່ມອີກ; ຊຶ່ງເລີ່ມແຕ່ວັນທີ 2 -25 ມິຖຸນານີ້, ຊຶ່ງມີໝໍ້ນັບກະແສໄຟຟ້າທັງໝົດຈານວນ 8.435 ໜ່ວຍ, ກວດຊຸ່ມ3% ມີຈານວນທັງໝົດ 276 ໜ່ວຍ, ລວມມີ 66 ໝູ່ບ້ານໃຫ້ສຳ ເລັດຕາມຄາດໝາຍທີ່ວາງໄວ້.

________________

ຂຽນໂດຍ: ພຸດທະສອນ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์