ບໍລິຄຳໄຊໃຫ້ເອກະຊົນສຳປະທານດິນ 150 ເຮັກຕາ ປູກກ້ວຍຫອມຢູ່ບໍລິຄັນ

  ເພື່ອແນໃສ່ເຮັດໃຫ້ການຈັດຕັ້ງປະຕິບັດບັນດາໂຄງການຕ່າງໆໃຫ້ດຳເນີນໄປຕາມກິດຈະການ ແລະຖືກຕ້ອງຕາມລະບຽບ-ກົດໝາຍທີ່ໄດ້ກຳນົດໄວ້ ແລະທັງເປັນການປະຕິບັດຕາມຂໍ້ຕົກລົງຂອງທ່ານເຈົ້າແຂວງສະບັບເລກທີ 015/ຄລທ.ຂບຊ ລົງວັນທີ 5 ກຸມພາ 2019 ວ່າດ້ວຍການມອບສິດໃຫ້ພະແນກແຜນ ການ ແລະ ການລົງທຶນແຂວງເປັນຜູ້ຕາງໜ້າໃຫ້ແກ່ອຳນາດການປົກຄອງແຂວງໃນການເຈລະຈາ ແລະ ເຊັນສັນຍາສຳປະທານຮ່ວມກັບບໍລິສັດວີເອັສອຸດສາ ຫະກຳການຄ້າ ແລະ ກະສິກຳຄົບວົງຈອນຈຳກັດຜູ້ດຽວທີ່ມີຈຸດປະສົງສຳປະທານທີ່ດິນເຮັດໂຄງການປູກໝາກກ້ວຍຫອມປອດສານພິດຢູ່ເຂດບ້ານທ່າເຮືອ-ຫ າດຢື້ນເມືອງບໍລິຄັນ.

  ໃນວັນທີ 6 ກຸມພານີ້ ຢູ່ຫ້ອງປະຊຸມພະແນກແຜນການ ແລະການລົງທຶນແຂວງກໍໄດ້ມີພິທີເຊັນສັນຍາອະນຸຍາດໂຄງການດັ່ງກ່າວລະຫວ່າງທ່ານ ເລື່ອນ ວິໄລ ຈັນທະລາພັນ ຫົວໜ້າພະແນກແຜນການ ແລະການລົງທຶນແຂວງເຊັນໃນນາມຕາງໜ້າອຳນາດການປົກຄອງແຂວງ ແລະທ່ານ ນາງ ຄຳແຍງ ວິວັນໄຊ ອຳນວຍການບໍລິສັດວີເອັດອຸດສາຫະກຳການຄ້າ ແລະກະສິກຳຄົບວົງຈອນຈຳກັດຜູ້ດຽວໂດຍຊ້ອງໜ້າທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ພ້ອມດ້ວຍຫົວໜ້າພະແນກ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

  ໂຄງການດັ່ງກ່າວນີ້ກວມເອົາເນື້ອທີທັງໝົດ 150 ເຮັກຕາ ແລະໄລຍະສໍາປະທານ 15 ປີ, ໂດຍຈະເລີມລົງມືພັດທະນານັບແຕ່ມື້ເຊັນສັນຍາເປັນຕົ້ນໄປ.

แชร์