ບ້ານດົກບາກໃໝ່ຫີນຄໍາ ໄດ້ຮັບໂຮງຮຽນ ມັດທະຍົມຕອນຕົ້ນຫຼັງໃໝ່

  ບ້ານດົງບາກໃໝ່ຫີນຄໍາ ເມືອງສະໜາມໄຊ ແຂວງອັດຕະປື ໄດ້ຮັບໂຮງຮຽນມັດທະຍົມຕອນຕົ້ນຫຼັງໃໝ່ພາຍຫຼັງສຳເລັດການກໍ່່ສ້າງຕາມບົດບັນທຶກສັນຍາໂຄງການກໍ່ສ້າງໄດ້ 100%, ໂດຍນໍາໃຊ້ງົບປະມານແຜນຟື້ນຟູໄພພິບັດປີ 2019 ຂອງກະຊວງສຶກສາທິການ ແລະກີລາ,ໃນມູນຄ່າ 4 ຕື້ກວ່າກີບ, ໂດຍແມ່ນພະແນກສຶກສາ ທິການ ແລະກີລາແຂວງອັດຕະປື ເປັນຜູ້ຮັບຜິດຊອບຕິດຕາມ ໂຄງການ ແລະບໍລິສັດຄໍາພວງກໍ່ ສ້າງ ແລະສ້ອມແປງເຄຫະສະຖານ ເປັນຜູ້ຮັບເໝົາການກໍ່ສ້າງ, ຊຶ່ງ ການກໍ່ສ້າງໂຮງຮຽນຫຼັງດັ່ງກ່າວ ໄດ້ເລີ່ມຕົ້ນຈັດຕັ້ງປະຕິບັດແຕ່ທ້າຍ ເດືອນເມສາປີ 2019 ຫາ 12 ກຸມພາປີ 2020 ຈຶ່ງສໍາເລັດການ ກໍ່ສ້າງລວມໄລຍະການກໍ່ສ້າງ 10 ເດືອນ,ໂຮງຮຽນມັດທະຍົມຕອນຕົ້ນບ້ານໃໝ່ຫີນຄໍາ ເມືອງສະໜາມ ໄຊ ຫຼັງໃໝ່ນີ້ເປັນອາຄານ 2 ຊັ້ນ ໂຄງສ້າງເຮັດດ້ວຍເບຕົງເສີມເຫຼັກ, ຫຼັງຄາເຮັດດ້ວຍໂຄງເຫຼັກ ແລະມຸງດ້ວຍກະເບື້ອງ,ມີລວງກວ້າງ 15 ແມັດກວ່າ, ມີຍາວ 38 ແມັດ ກວ່າ,ມີ 8 ຫ້ອງຮຽນ, ມີ 1 ຫ້ອງການຄູ,ມີຫ້ອງນໍ້າສໍາລັບຄູ ແລະນັກຮຽນ, ພາຍໃນອາຄານມີ ການຕົບແຕ່ງສີ, ມີລະບົບໄຟຟ້າພ້ອມເຄື່ອງໃຊ້ເຟີນີເຈີໂຕະຕັ່ງຄູ, ໂຕະຕັ່ງນັກຮຽນ ແລະສິ່ງອໍານວຍຄວາມສະດວກອື່ນໆ.

   ພິທີມອບ-ຮັບໄດ້ຈັດຂຶ້ນຢ່າງເປັນທາງການໃນວັນທີ 29 ພຶດສະພາ 2020 ນີ້ທີ່ບ້ານດັ່ງກ່າວ, ໂດຍການເຂົ້າຮ່ວມຂອງທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະກີລາແຂວງອັດຕະປື, ມີຕາງໜ້າອໍານາດການປົກຄອງເມືອງ, ຕາງໜ້າບໍລິສັດຜູ້ຮັບເໝົາການກໍ່ສ້າງ, ອໍານາດການປົກຄອງບ້ານຕະຫຼອດຮອດພໍ່ແມ່ປະຊາຊົນພາຍໃນບ້ານປາກບໍເຂົ້າຮ່ວມ.

___________

ໂດຍ: ພົມວິຫານ ໄຊຊະນະ

แชร์