ມາລີນີຈະນຳເອົາດີນຕົກຕະກອນໃຕ້ນ້ຳມາເຮັດຝຸ່ນຊີວະພາບເພື່ອຊາວກະສິກອນ

  ກຸ່ມບໍລິສັດ ມາລີນີ ຈຳກັດ ກຽມຈະສ້າງໂຮງງານຝຸ່ນຊີວະພາບຂະໜາດໃຫຍ່ແຫ່ງໃໝ່ຢູ່ເຂດເມືອງໄຊເສດຖາ ເພື່ອນຳໃຊ້ດິນຕົກຕະກອນໃຕ້ນໍ້າຂອງຮ່ອງລະບາຍນໍ້າອອກຈາກຕົວເມືອງນະຄອນຫຼວງວຽງຈັນ ມາເຮັດເປັນຝຸ່ນຊີວະພາບຕິດພັນກັບການບຳບັດນໍ້າສະໜອງໃຫ້ແກ່ຊາວກະສິກອນພາຍໃນປະເທດ; ຫຼ້າສຸດໃນວັນທີ 28 ພຶດສະພາຜ່ານມານີ້ບໍລິສັດດັ່ງກ່າວກໍ່ໄດ້ເຊັນສັນຍາຮ່ວມມືກັບພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ ເພື່ອສຳປະທານດິນຢູ່ຮ່ອງລະບາຍນໍ້າ ແລະ ສຳລັບສ້າງໂຮງງານຢູ່ເຂດບ້ານສ້າງໄພ ແລະບ້ານຂາມງອຍ, ເມືອງໄຊເສດຖາ ຈຳນວນ 10 ເຮັກຕາ ເປັນບ່ອນພັດທະນາ.

  ໃຫ້ກຽດລົງນາມໂດຍທ່ານ ປອ ດຣ ຫຼ້າສາຍ ນວນທາສິງ ຫົວຫ້າພະແນະກະສິກຳ ແລະ ປ່າໄມ້ນຄອນຫຼວງວຽງຈັນ ແລະ ທ່ານ ພຸດສະດຸ ອິນທະວົງ ປະທານກຸ່ມບໍລິສັດ ມາລີນີ ຈຳກັດ. ພາຍໃຕ້ການເປັນສັກຂີພິຍານຂອງທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ, ພ້ອມດ້ວຍທ່ານເຈົ້າເມືອງ, ຫົວ ໜ້າພະແນກຈາກຂະແໜງການທີ່ກ່ຽວຂ້ອງເຂົ້າຮ່ວມ.

  ທ່ານ ຄຳວົງ ໄຊປັນຍາ ຮອງປະທານກຸ່ມບໍລິສັດ ມາລີນີ ຈຳກັດ ກ່າວວ່າ: ບໍລິສັດໄດ້ຮ່ວມມືກັບພາກລັດກໍ່ຄືພະແນກກະສິກຳແລະປ່າໄມ້ນະຕອນຫຼວງວຽງຈັນເພື່ອຜະ ລິດຝຸ່ນຊີວະພາບທີ່ມີຄຸນນະພາບ, ສ້າງເມາດຕະຖານ, ສ້າງແບຣນສິນຄ້ານະຄອນຫຼວງວຽງຈັນແລ້ວກໍ່ໄດ້ສຳປະທານດິນລັດຈຳນວນ 10 ເຮັກຕາ ເຂດບ້ານນາສ້າງໄພ ແລະບ້ານຂາມງອຍເພື່ອສ້າງຕັ້ງໂຮງງານຜະລິດຝຸ່ນຊີວະພາບ ແລະນຳເອົາດິນຕົກຕະກອນໃຕ້ນໍ້າຈາກຮ່ອງລະບາຍນໍ້າອອກຈາກຕົວເມືອງເປັນວັດຖຸດິບຜະລິດຝຸ່ນຊີວະພາບຕິດພັນກັບການບຳບັດນໍ້າເປື້ອນກ່ອນໄຫຼລົງສູ່ນໍ້າໃຫຍ່ຊຶ່ງຄວາມສາມາດໃນການຜະລິດຝຸ່ນປີໜຶ່ງ 15 ພັນໂຕນ ຕອບສະໜອງຕາມຄວາມຕ້ອງການຂອງຕະຫຼາດໃນທົ່ວປະເທດເພື່ອຫັນໄປສູ່ການຜະລິດກະສິກຳສະອາດຕາມທິດສີຂຽວ ແລະຍືນຍົງໃນຂອບເຂດທົ່ວປະເທດ.

  ທ່ານ ວາດສະໜາ ສີຈາເລີນ ຮອງຫົວໜ້າພະແນກສະສິກຳ ແລະປ່າໄມ້ນະຄອນຫຼວງວຽງຈັນກ່າວວ່າ: ເດີນຕາມນະໂຍບາຍຮ່ວມມືກັບພາກທຸລະກິດພາຍໃນ ແລະຈ່າງປະເທດໃນການຊຸກຍູ້ສົ່ງເສີມການຜະລິດສະບຽງອາຫານ ແລະຜະລິດເປັນສິນຄ້າໂດຍນຳໃຊ້ເຕັກນິກວິທະຍາສາດເຄື່ອງຈັກທັນສະໄໝເຂົ້າໃນການຜະລິດເພື່ອຍົກສູງຄຸນນະພາບ ແລະປຸງແຕ່ງເພີ່ມມູນຄ່າໃຫ້ຜົນຜະລິດ, ຫຼຸດຜ່ອນຕົ້ນທຶນການຜະລິດບບົນພື້ນຖານກະສິກຳສະອາດຕາມທິດພັດທະນາສີຂຽວແລະຍືນຍົງ ແລະການຮ່ວມມືກັບບໍລິສັດມາລີນີ ໃນຄັ້ງນີ້ຖືວ່າເປັນໂອກາດທີ່ດີສຳລັບຂະແໜງກະສິກຳ ແລະ ປ່າໄມ້ທີ່ຈະໄດ້ພັດທະນາຝຸ່ນຊີວະພາບທີ່ມີຄຸນນະພາບ ແລະ ໄດ້ມາດຕະຖານສ້າງເປັນຜະລິດຕະພັນຂອງນະຄອນຫຼວງວຽງຈັນເພື່ອສະໜອງໃຫ້ແກ່ຊາວກະສິກອນຢູ່ພາຍໃນປະເທດ, ເພື່ອຍົກສະມັດຕະພາບຜົນຜະລິດໃຫ້ສູງຂຶ້ນຕີຖອຍການນຳເຂົ້າຝຸ່ນເຄມີຈາກຕ່າງປະເທດເພື່ອຫັນໄປສູ່ການຜະລິດກະສິກຳສະອາດ ແລະຍືນຍົງຂອງນະຄອນຫຼວງວຽງຈັນ.

________________________

        ຂຽນໂດຍ: ອິດສະຫຼະ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์