3 ວຽກຫຼັກ ໂຄງການສ້າງທາງລົດໄຟລາວ-ຈີນ ຊ້ວງຜ່ານອຸດົມໄຊສຳເລັດ 93,27%

  ໃນທ້າຍອາທິດຜ່ານມາຢູ່ທີ່ຫ້ອງປະຊຸມພະແນກ ຍທຂ ແຂວງອຸດົມໄຊ ໄດ້ມີກອງປະຊຸມຄະນະຊີ້ນຳໂຄງການກໍ່ສ້າງເສັ້ນທາງລົດໄຟລາວ-ຈີນ ຊ້ວງຜ່ານ ແຂວງອຸດົມໄຊ ໂດຍການເປັນປະທານຂອງ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ຫົວໜ້າຄະນະຊີ້ນຳໂຄງການກໍ່ສ້າງເສັ້ນທາງລົດໄຟລາວ-ຈີນ.

  ການດຳເນີນກອງປະຊຸມໃນຄັ້ງນີ້ກໍເພື່ອຮ່ວມກັນສະຫຼຸບ, ຕີລາຄາ ແລະສັງລວມຄວາມຄືບໜ້າຂອງການຈັດຕັ້ງປະຕິບັດວຽກງານໂຄງການກໍ່ສ້າງ, ຍົກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງໃນໄລຍະຜ່ານມາ ແລະວິທີປັບປຸງ, ແກ້ໄຂໃນຕໍ່ໜ້າແນໃສ່ເຮັດໃຫ້ໂຄງການດັ່ງກ່າວສໍາເລັດຕາມກຳນົດເວລາ ແລະມີປະສິດທິພາບໃນນັ້ນແມ່ນໄດ້ຮັບຟັງການລາຍງານສະພາບລວມຄວາມຄືບໜ້້າຂອງໂຄງການກໍ່ສ້າງຕົວຈິງຊຶ່ງມາຮອດປະຈຸບັນນີ້ເຫັນວ່າວຽກງານແຕ່ລະດ້ານແມ່ນສໍາເລັດເປັນສ່ວນຫຼາຍແລ້ວໂດຍສະ ເພາະແມ່ນ 3 ໜ້າວຽກຫຼັກຄືວຽກງານເຈົ້າອຸໂມງທັງ 3 ສັນຍາລວມທັງໝົດ 32 ອຸໂມງ ມີຄວາມຍາວທັງໝົດ84,869 ກິໂລແມັດ ສາມາດເຈາະສຳເລັດແລ້ວ 28 ອຸໂມງ ຫຼື 82,747 ກິໂລແມັດ ເທົ່າກັບ 97,5% ຂອງຄວາມຍາວທັງໝົດຊ້ວງຜ່ານແຂວງອຸດົມໄຊຍັງບໍ່ທັນສຳເລັດ 4 ຈຸດ, ວຽກງານກໍ່ສ້າງເສົາຂົວທາງລົດໄຟລວມທັງໝົດ 716 ຕົ້ນ ມາຮອດປະຈຸບັນແມ່ນກໍ່ສ້າງສຳເລັດທັງໝົດແລ້ວເທົ່າກັບ 100% ແລະວຽກງານດິນຕັດ-ວຽກຖົມຄັນທາງລົດໄຟສາມາດປະຕິບັດສໍາເລັດແລ້ວ 97,91% ສັງລວມແລ້ວການກໍ່ສ້າງເສັ້ນທາງລົດໄຟລາວ-ຈີນ ຊ້ວງຜ່ານແຂວງອຸດົມໄຊທີ່ມີຄວາມຍາວລວມທັງໝົດ 126,6 ກິໂລແມັດ ໂດຍສະເພາະແມ່ນໜ້້າວຽກທັງ 3 ດ້ານນີ້ສາມາດຈັດຕັ້ງປະຕິບັດສຳເລັດແລ້ວ 93,27%.

  ນອກນັ້ນກອງປະຊຸມຍັງໄດ້ສະຫຼຸບການເຄື່ອນໄຫວວຽກງານດ້ານອື່ນໆ ອີກໂດຍສະເພາະແມ່ນວຽກງານຂອງຫ້ອງການປະສານງານ,ວຽກງານປ້ອງກັນຊາດ-ປ້ອງກັນຄວາມສະຫງົບ, ການຈ່າຍຄ່າຊົດເຊີຍຜົນກະທົບແຕ່ລະງວດລວມທັງສະພາບບັນຫາທີ່ເກີດຂຶ້ນກັບໂຄງການ ແລະການໄກ່ເກ່ຍແກ້ໄຂຂອງແຕ່ລະເມືອງທີ່ເສັ້ນທາງລົດໄຟຜ່ານເປັນຕົ້ນແມ່ນ ເມືອງນາໝໍ້, ເມືອງໄຊ ແລະເມືອງງາ ພ້ອມທັງມີການປຶກສາຫາລືເພື່ອຊອກຫາແນວທາງໃນການແກ້ໄຂ ແລະ ເຄື່ອນໄຫວໃນຕໍ່ໜ້າໃຫ້ມີປະສິດທິ ພາບ ແລະສຳເລັດຜົນຕາມລະດັບຄາດໝາຍ.

  ກອງປະຊຸມດັ່ງກ່າວມີທ່ານ ບຸນລອດ ອ່ອນພະຈັນ ຄະນະປະຈໍາພັກແຂວງ, ປະທານສະພາປະຊາຊົນແຂວງ, ຕາງໜ້າກອງບັນຊາການ ປກຊ-ປກສ, ພະແນກການກ່ຽວຂ້ອງ ແລະເຈົ້າເມືອງທັງ 3 ເມືອງທີ່ມີໂຄງການກໍ່ສ້າງເສັ້ນທາງລົດໄຟລາວ-ຈີນຜ່ານຄື ເມືອງນາໝໍ້, ເມືອງໄຊ ແລະເມືອງງາເຂົ້າຮ່ວມ.

_______________

  ຂຽນໂດຍ: ຄານມະນີ ຮຽນດໍຈັນ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์