ຣາຊ-ລາວ ມອບທຶນໃຫ້ຊາວໜຸ່ມບ້ານລາວເລວ ເມືອງສຳພັນ

  ໃນວັນທີ 2 ມິຖຸນາ 2020 ທີ່ຫ້ອງວ່າການປົກຄອງເມືອງສຳພັນ ແຂວງຜົ້ງສາລີ ໄດ້ຈັດພິທີມອບ-ຮັບທຶນໂຄງການ “ກ້າໄມ້ ແຕກໃບສົດໃສຢືນຕົ້ນໃຫຍ່ງາມ” ຈຳ ນວນ 10 ລ້ານກີບ ໃຫ້ແກ່ ທ້າວ ກີຮື ລາວກີ ຊາວໜຸ່ມບ້ານລາວເລວ ເມືອງສຳພັນ ແຂວງຜົ້ງສາລີ ຕາງໜ້າມອບຂອງທ່ານນາງ ແສງອ່ອນ ປວງມະນີວັນ ຮອງຫົວ ໜ້າກົມພັດທະນາວິຊາຊີບຊາວໜຸ່ມສູນກາງຊາວໜຸ່ມປະຊາຊົນປະຕິວັດລາວພ້ອມດ້ວຍທ່ານ ນະລົງວິດ ຄອງສິນ ຜູ້ຈັດການອົງກອນສຳພັນບໍລິສັດ ຣາຊ-ລາວ ບໍລິການຈຳກັດ, ມີທ່ານ ທວນ ມະນີວົງ ຮອງເລຂາຄະນະບໍລິຫານງານຊາວໜຸ່ມ ແຂວງຜົ້ງສາລີ ແລະພະນັກງານທີ່ກ່ຽວຂ້ອງເຂົ້າຮ່ວມ.

  ທ່ານນາງ ແສງອ່ອນ ປວງມະນີວັນ ກ່າວວ່າ: ສະເພາະເງິນທຶນໝູນວຽນນີ້ກົມພັດທະນາວິຊາຊີບສູນກາງ ຊປປລ ນຳເອົາທຶນໄປມອບຕໍ່ໃຫ້ແກ່ຊາວໜຸ່ມກູ້ຢືມໂດຍບໍ່ມີດອກເບ້ຍເປັນການປະກອບສ່ວນເຂົ້າໃນການສ້າງສາພັດທະນາປະເທດຊາດໃນການແກ້ໄຂຄວາມທຸກຍາກຂອງປະຊາຊົນເສີມສ້າງພັດທະນາວິຊາຊີບພັດທະນາດ້ານສີມືແຮງງານລາວໃຫ້ມີຄຸນນະພາບແລະເງິນທຶນໝູນວຽນນັ້ນແມ່ນຖືກນຳໃຊ້ໝູນວຽນທຶນໃຫ້ແກ່ຊາວໜຸ່ມຜູ້ອື່ນໆທີ່ມີເງື່ອນໄຂກູ້ຢືມຕໍ່ໄປພາຍຫຼັງທີ່ໄດ້ເກັບກູ້ຄືນມາ.

  ທ່ານ ນະລົງວິດ ຄອງສິນ ກ່າວວ່າ: ປະຈຸບັນເງິນທຶນໝູນວຽນຈຳນວນນັ້ນໄດ້ຈັດຕັ້ງປະຕິບັດມາໄດ້ 3 ໄລຍະສາມາດມອບທຶນຊ່ວຍເຫຼືອຊາວໜຸ່ມກູ້ຢືມທັງໝົດ ຈຳ ນວນ 41 ທຶນ ລວມມູນຄ່າທັງໝົດເກືອບ 400 ລ້ານກີບ ແລະໃນແຕ່ລະປີບໍລິສັດ ແລະສູນກາງຊາວໜຸ່ມຍັງໄດ້ລົງຊຸກຍູ້ຕິດຕາມຊາວໜຸ່ມເກືອບທຸກແຂວງໃນທົ່ວປະ ເທດລວມໄປເຖິຜູ້ທີ່ປະສົບຜົນສຳເລັດ ແລະຜູ້ທີ່ຍັງດຳເນີນທຸລະກິດໃນປັດຈຸບັນນຳອີກຜ່ານການຈັດຕັ້ງປະຕິບັດໂຄງການດັ່ງກ່າວໄດ້ເຮັດໃຫ້ຊາວໜຸ່ມທີ່ດ້ອຍໂອກາດໄດ້ຮັບການສຶກສາຮໍ່າຮຽນ ແລະໄດ້ຮັບການສະໜັບສະໜູນຈາກບໍລິສັດຣາຊ-ລາວ ບໍລິການຈຳກັດ ເຮັດໃຫ້ມີວຽກເຮັດງານທຳສາມາດປະກອບກິດຈະການເປັນຂອງຕົນເອງໄດ້ເຊັ່ນ: ກິດຈະການສ້ອມແປງລົດຈັກ.

  ໂຄງການ “ກ້າໄມ້ ແຕກໃບສົດໃສຢືນຕົ້ນໃຫຍ່ງາມ” ເປັນການຮ່ວມມືລະຫວ່າງບໍລິສັດ ຣາຊ-ລາວ ບໍລິການ ຈຳກັດ ແລະກົມພັດທະນາວິຊາຊີບຊາວໜຸ່ມສູນກາງຊາວ ໜຸ່ມປະຊາຊົນປະຕິວັດລາວ (ສຊປລ) ສະໜັບສະໜູນເງິນທຶນໝູນວຽນຈຳນວນໜຶ່ງໃຫ້ແກ່ສູນກາງຊາວ ໜຸ່ມ ປະຊາຊົນປະຕິວັດລາວເພື່ອສ້າງໂອກາດ ແລະມອບທຶນບໍ່ມີດອກເບ້ຍ ດ້ານການພັດທະນາຍົກລະດັບຄວາມຮູ້ດ້ານວິຊາການທັກສະສີມືແຮງງານສຳລັບປະກອບອາຊີບໃຫ້ແກ່ນັກຮຽນທີ່ ຈົບການສຶກສາຈາກສູນຝຶກອົບຮົມວິຊາ ຊີບຊາວໜຸ່ມຜູ້ທີ່ດ້ອຍໂອກາດບໍ່ມີວຽກເຮັດງານທຳໃຫ້ມີອາຊີບທີ່ໝັ້ນຄົງໂດຍໄດ້ເລີ່ມຮ່ວມມືນຳກັນມາແຕ່ຕົ້ນ ເດືອນເມສາ2012 ເປັນຕົ້ນມາ.

  ທ້າວ ກີຮື ລາວກີ ໄດ້ກ່າວສະແດງຄວາມຂອບໃຈມາຍັງບໍລິສັດກໍຄືກົມພັດທະນາວິຊາຊີບຊາວໜຸ່ມ ແລະຄະນະນຳຊາວໜຸ່ມເມືອງສຳພັນ, ການຈັດຕັ້ງທຸກຂັ້ນທີ່ໃຫ້ໂອ ກາດມອບທຶນໂຄງການໃຫ້ຂ້າພະເຈົ້າ ແລະ ຈະໄດ້ນຳໃຊ້ທຶນຄັ້ງນີ້ໄປຊື້ອຸປະກອນເຂົ້າໃນການເປີດຮ້ານສ້ອມແປງລົດຈັກພັດທະນາວີຊາຊີບຄວາມຮູ້ທີ່ຮຽນມາເຂົ້າສູ່ໜ້າວຽກຕົວຈິງສ້າງລາຍຮັບເຮັດໃຫ້ຄຸນນະພາບຊີ ວິດຂອງຄອບຄົວດີຂຶ້ນ ແລະມີທຶນຮອນສົ່ງຄືນໂຄງການເພື່ອເປີດໂອກາດໃຫ້ຊາວໜຸ່ມຜູ້ອື່ນໆໄດ້ຮັບໂອກາດຄືກັບຕົນເອງ.

_____________

ໜັງສືພິມເສດຖະກິດ-ສັງຄົມ

แชร์