ອາດສະພອນ ມີແຜນຜະລິດເຂົ້ານາປີ ໃນເນື້ອທີ່ 19,5 ພັນເຮັກຕາ

    ທ່ານ ສີວິໄລ ສີທຳມະວັນ ຫົວໜ້າຫ້ອງການກະສິກຳ-ປ່າໄມ້ເມືອງອາດສະພອນ ແຂວງສະຫວັນນະເຂດ ໄດ້ໃຫ້ສຳພາດຕໍ່ຜູ້ສື່ຂ່າວເມືອງໃນວັນທີ 20 ພຶດສະພາ 2020 ວ່າ: ປະຈຸບັນ, ຊາວນາ-ຊາວກະສິກອນທົ່ວເມືອງອາດສະພອນພວມກຳລັງຫັນລົງສູ່ການຜະລິດເຂົ້ານາປີໂດຍທົ່ວເມືອງມີແຜນຜະລິດເຂົ້ານາປີໃນເນື້ອທີ່ທັງ ໝົດ 19.500 ເຮັກຕາ,ພ້ອມນີ້ປະຊາຊົນສ່ວນໜຶ່ງກໍໄດ້ຫັນມາເຮັດນາຫວ່ານ ແລະນາຢອດເມັດແຫ້ງເພື່ອປະຢັດຕົ້ນທຶນການຜະລິດຂອງຕົນໃນນີ້ນາຫວ່ານມີ 975 ເຮັກຕາ ແລະຢອດເມັດແຫ້ງ ມີ 975 ເຮັກຕາ, ສຳລັບປະຊາຊົນທີ່ຊົມໃຊ້ລະບົບຊົນລະປະທານ ຫຼືມີໜອງ-ຝາຍກໍ່ສາມາດຕົກກ້າໄດ້ຕາມເງື່ອນໄຂຂອງໃຜລາວຊຶ່ງຮອດປະຈຸບັນຊາວນາແມ່ນໄດ້ເລີ່ມລົງຕົກກ້າແລ້ວສ່ວນໜຶ່ງ.

 ນອກຈາກປູກເຂົ້າແລ້ວ,ປະຊາຊົນຍັງໄດ້ປູກພືດລະດູຝົນໃນເນື້ອທີ່ 2.950 ເຮັກຕາ ໂດຍພືດທີ່ປູກມີ: ສາລີ,ໝາກໂມ, ໝາກຖົ່ວ, ໝາກແຕງ,ໝາກອຶ-ບວບ, ໝາກພິກ, ໝາກເຂືອ, ໝາກນັດ, ມັນຕົ້ນ, ຖົ່ວດິນ, ເຝືອກ-ມັນ, ໄມ້ໃຫ້ໝາກ ແລະຜັກຕ່າງໆ.  

  ສຳລັບການຜະລິດເຂົ້ານາປີນີ້, ຫ້ອງການກະສິກໍາ-ປ່າໄມ້ເມືອງກໍ່ໄດ້ກຽມແນວພັນເຂົ້າທ່າສະໂນ 8, ທ່າສະໂນ 11, ທ່າດອກຄຳ 8, ທ່າດອກຄຳ 11 ແລະເຂົ້າ ກຂ 6 ຊຶ່ງມີທັງໝົດ 5 ໂຕນ ທີ່ເປັນພັນປັບປຸງ 100% ເພື່ອສະໜອງແນວພັນໃຫ້ພໍ່ແມ່ປະຊາຊົນຕື່ມອີກ.

 

_______________________________________________________________________________________

แชร์