ປູກອ້ອຍເປັນສິນຄ້າພາໃຫ້ຄອບຄົວຮັ່ງມີຜາສຸກ

  ການສ້າງເສດຖະກິດຄອບຄົວດ້ວຍການຜະລິດກະສິກໍາເປັນສິນຄ້າແມ່ນອາຊີບໜຶ່ງທີ່ສາມາດສ້າງລາຍຮັບໃຫ້ແກ່ຄອບຄົວໄດ້ ດີສົມຄວນຖ້າຫາກວ່າທຸກຄົນໃນຄອບຄົວມີຄວາມສາມັກຄີ, ມີຄວາມດຸໝັ່ນຂະຫຍັນພຽນ, ຮູ້ປະຢັດມັດທະຍັດກໍ່ຈະກ້າວໄປສູ່ຜົນສຳເລັດ ແລະ ກ້າວໄປສູ່ການແກ້ໄຂຄວາມທຸກຍາກເທື່ອລະກ້າວຕາມແນວທາງຂອງພັກ-ລັດວາງ ອອກຄືດັ່ງຄອບຄົວຂອງທ່ານ ບຸນເລີຍ ເຄນໄຊຍະ ປະຊາຊົນບ້ານດົງພຸງ ເມືອງໄຊບູລີ ແຂວງສະຫວັນນະເຂດ ຊຶ່ງແມ່ນຄອບຄົວໜຶ່ງທີ່ຢຶດຖືເອົາການປູກອ້ອຍເປັນສິນຄ້າສ້າງລາຍຮັບໃຫ້ແກ່ຄອບຄົວສາມາດປັບປຸງຊີວິດການເປັນຢູ່ຂອງຄອບຄົວໃຫ້ມີຄວາມຈະເລີນຮັ່ງມີຂຶ້ນເປັນກ້າວໆ.

ທ່ານ ບຸນເລີຍ ເຄນໄຊຍະ ກ່າວວ່າ: ພາຍໃນຄອບຄົວມີແຮງງານຕົ້ນຕໍທັງໝົດ 8 ຄົນ, ສຳຮອງ 3 ຄົນ, ຊຶ່ງໄລຍະຜ່ານມາ, ພຽງແຕ່ອາໄສການເຮັດນາຂາຍເຂົ້າ ແລະລ້ຽງສັດພໍກຸ້ມກິນແຕ່ກໍ່ບໍ່ພຽງພໍກັບຄວາມຮຽກຮ້ອງຕ້ອງການເຮັດໃຫ້ຊີວິດການເປັນຢູ່ຂອງຄອບຄົວພົບຄວາມຫຍຸ້ງຍາກເມື່ອເປັນເຊັ່ນນັ້ນຕົນເອງຈຶ່ງໄດ້ປຶກສາກັບຄອບ ຄົວເພື່ອຊອກວິທີເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນຕາມທິດຊີ້ນຳຂອງຂັ້ນເທິງທີ່ວ່າ: ກຸ້ມຕົນເອງເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ຕົກມາ ຮອດປີ 2007 ຈຶ່ງໄດ້ຕັດສິນໃຈເລີ່ມບຸກເບີກເນື້ອທີ່ດິນຂອງຕົນເອງທີ່ມີຢູ່ໃນເນື້ອທີ່ 2 ເຮັກຕາ ປາຍຄ່າບຸກເບີກປີທຳອິດໃຊ້ງົບປະມານ 3 ລ້ານກວ່າກີບ ໂດຍເລີ່ມລົງມືປູກ ແລະຊື້ແນວພັນມາຈາກປະເທດໄທ ແລະມາຮອດປີ 2008 ເປັນປີທຳອິດທີ່ໄດ້ເລີ່ມຕັດອ້ອຍເຂົ້າໂຮງງານເຫັນວ່າລາຍຮັບຍັງບໍ່ໄດ້ດີເທົ່າທີຄວນຫັກໃຊ້ຄ່າໜີ້ສິນຕ່າງໆກໍ່ຫຼວງຫຼາຍ, ຈາກນັ້ນ, ຕົນ ເອງ ແລະຄອບຄົວຈຶ່ງໄດ້ (ເຊົ່າ ດິນ) ເພື່ອຂະຫຍາຍເນື້ອທີ່ອອກ ຕື່ມໄປອີກຈໍານວນ 28,4 ເຮັກ ຕາ ແລະຊື້ແນວພັນຈາກສວນອ້ອຍໃກ້ຄຽງໃນລາຄາ 3,33 ແສນ ກີບຕໍ່ໂຕນ, ການປູກອ້ອຍໃນແຕ່ ລະປີແມ່ນເລີ່ມໄຖພວນດິນໃນ ເດືອນກັນຍາ ແລະຊຳເບ້ຍ(ປູກ)ໃນເດືອນຕຸລາຂອງທຸກໆປີໃຊ້ເວ ລາ14 ເດືອນຈຶ່ງຈະຕັດຂາຍໄດ້,ການປູກແມ່ນບໍ່ໄດ້ມີຄວາມຫຍຸ້ງຍາກແຕ່ຢ່າງໃດເພາະມີລົດຈາກໂຮງງານນໍ້າຕານມາປູກໃຫ້ເພື່ອໃຫ້ຖືກຕາມເຕັກນິກວິຊາການຂອງບໍລິສັດເອງ, ປູກດ້ວຍທຳມະຊາດບໍ່ໄດ້ໃສ່ຝຸຍເຄມີຫົດນໍ້າແຕ່ຕອນປູກທຳອິດ, ສຳລັບການເກັບກ່ຽວ ແມ່ນໄດ້ຈ້າງແຮງງານຄົນຕັດມັດ ລະ 500 ກີບ ແລ້ວຈະມີລົດຈາກໂຮງງານມາຮັບເກັບຊື້ກັບສວນເລີຍ.

 ທ່ານ ບຸນເລີຍ ເຄນໄຊຍະ ຍັງກ່າວຕື່ມວ່າ: ໃນແຕ່ລະປີນັ້ນແມ່ນຈະມີພະນັກງານວິຊາການຈາກຫ້ອງການກະສິກຳ-ປ່າໄມ້ເມືອງລົງມາແນະນຳວິທີການບົວລະບັດຮັກ ສາເບ້ຍອ້ອຍບໍ່ໃຫ້ຕາຍແຫ້ງ,ການຮັກສາ ແລະວິທີການບໍ່ໃຫ້ມີດ້ວງ, ບົ້ງເຈາະ ແລະແມງໄມ້ຊະນິດອື່ນໆມາທຳລາຍ ແລະລວມເຖິງການໃສ່ຝຸ່ນທຳມະຊາດໃຫ້ຖືກວິທີ.

  ຜ່ານການສູ້ຊົນສ້າງເສດຖະກິດຄອບຄົວມາໄດ້ 1 ທົດສະວັດ ປະຈຸບັນເຫັນໄດ້ວ່າ: ຊີວິດການເປັນຢູ່ຂອງຄອບຄົວໄດ້ຮັບການພັດທະນາດີຂຶ້ນຍ້ອນສະມາຊິກພາຍໃນຄອບຄົວມີຄວາມສາມັກຄີ, ມີຄວາມດຸໝັ່ນ,ເປັນຈິດໜຶ່ງໃຈດຽວພ້ອມກັນເຮັດພ້ອມກັນສ້າງຈຶ່ງໄດ້ຮັບຜົນສຳເລັດຄືດັ່ງກ່າວຊຶ່ງສະແດງອອກມີລາຍຮັບເຂົ້າຄອບຄົວ 240 ລ້ານກີບຕໍ່ປີ, ສາມາດປຸກເຮືອນໄດ້ອີກ 1 ຫຼັງ, ມີ ລົດໄຖນ້ອຍ 1 ຄັນ, ລົດໄຖໃຫຍ່ 2 ຄັນແລະອຸປະກອນທາງການກະເສດອີກຈຳນວນໜຶຶ່ງ, ຊື້ດິນປຸກສ້າງອີກ 4 ຕອນ, ລົດໃຫຍ່ 2 ຄັນ, ລົດຈັກ 5 ຄັນ, ມີທຶນການສຶກສາໃຫ້ລູກ, ມີທຶນໝູນວຽນພາຍໃນຄອບຄົວ, ລ້ຽງສັດປະເພດງົວ, ຄວາຍທັງໝົດລວມ 24 ໂຕ, ໜອງປາ1 ໜອງ ແລະພິເສດແມ່ນຍັງໄດ້ຮັບເໝົາບຸກເບີກເນື້ອທີ່ດິນ, ດຸດດິນ, ໄຖໄຮ່, ໄຖສວນຕ່າງໆສາມາດສ້າງລາຍຮັບປີໜຶ່ງໆແມ່ນ 30-40 ລ້ານກີບ ຕື່ມອີກດ້ວຍອາດເວົ້າໄດ້ວ່າເປັນຄອບຄົວທີ່ຫຼຸດພົ້ນອອກຈາກຄວາມທຸກຍາກໄດ້ຢ່າງສົມບູນ.

   ໃນທິດທາງຕໍ່ໜ້າ, ທ່ານ ບຸນເລີຍ ແມ່ນບໍ່ໄດ້ຂະຫຍາຍເນື້ອທີ່ອອກເພາະຈະປູກໃນເນື້ອທີ່ອັນເກົ່າເພາະຕົນເອງກໍ່ມີປະສົບການມາແລ້ວພ້ອມທັງຊຸກຍູ້ໃຫ້ຍາດຕິພີ່ ນ້ອງ ແລະປະຊາຊົນພາຍໃນບ້ານຫັນມາປູກອ້ອຍໃຫ້ຫຼາຍຂຶ້ນເພື່ອຕອບສະໜອງກັບຄວາມຕ້ອງການຂອງຕະຫຼາດ ແລະຈະເຮັດໃຫ້ທຸກຄອບຄົວມີລາຍຮັບເພີ່ມຂຶ້ນ ແລະອີກຢ່າງກໍ່ແມ່ນເປັນການຮູ້ໝູນໃຊ້ທ່າແຮງບົ່ມຊ້ອນຂອງຕົນເອງທີ່ມີຢູ່ຈົນເຮັດໃຫ້ຄອບຄົວປະສົບຜົນສຳເລັດໄດ້ທັງເປັນແບບຢ່າງທີ່ດີໃຫ້ແກ່ປະຊາຊົນໃນທົ່ວເມືອງໄຊບູລີ ແຂວງສະຫວັນນະເຂດພວກເຮົາ.

แชร์