ຊາວກະສິກອນເມືອງມະຫາໄຊ ຕົກກ້າໄດ້ພຽງແຕ່ 10% ຍ້ອນສະພາບອາກາດບໍ່ເອື້ອອຳນວຍ

  ຊາວກະສິກອນເມືອງມະຫາໄຊ ມີຄວາມກັງວົນໃຈຕໍ່ກັບລະດູການຜະລິດເຂົ້ານາປີ 2020 ເນື່ອງຈາກສະພາບອາກາດບໍ່ເອື້ອອຳນວຍມີບາງຄອບຄົວຕ້ອງອາໄສດູດນໍ້າຈາກໜອງສະຂຶ້ນມາທຳການຜະລິດຊຶ່ງເປັນສາເຫດເຮັດໃຫ້ຕົ້ນທຶນໃນການຜະລິດສູງຂຶ້ນ.

ທ່ານ ບຸນຍືນ ໄຊຍະລາດ ຫົວໜ້າຫ້ອງການກະສິກຳ ແລະປ່າໄມ້ເມືອງມະຫາໄຊ ແຂວງຄຳມ່ວນ ໃຫ້ສຳພາດຕໍ່ນັກຂ່າວໃນວັນທີ 19 ພຶດສະພາ 2020 ວ່າ: ສະພາບການຜະລິດເຂົ້ານາແຊງໃນປີ 2020 ໃນເນື້ອທີ່ຕາມແຜນການ 1.100 ເຮັກຕາ,ສາມາດຈັດຕັ້ງປະຕິບັດໄດ້ຕົວຈິງ 1.400 ເຮັກຕາ ໂດຍສາເຫດທີ່ເຮັດໃຫ້ລື່ນແຜນການແມ່ນຍ້ອນປະຊາຊົນບ້ານໜອງສະຕາວທີ່ມີຄວາມກະຕືລືລົ້ນລວມຕົວກັນບຸກເບີກເນື້ອທີ່ນາໂດຍໃຊ້ທຶນຂອງຕົນເອງຈົກຄອງຕໍ່ຈາກຄອງລະບາຍນໍ້າຂອງບໍລິສັດນໍ້າ ເທີນ 2 ເຂົ້າຫົດເນື້ອທີ່ນາຊຶ່ງມີຄວາມຍາວ 1.500 ແມັດເຮັດ ໃຫ້ລະດູການຜະລິດນາແຊງຂອງເມືອງມະຫາໄຊລື່ນແຜນການ 300 ເຮັກຕາ, ໃນນັ້ນຜະລິດເປັນສະ ບຽງອາຫານ 890 ເຮັກຕາ ແລະຜະລິດເປັນສິນຄ້າ 510 ເຮັກຕາ, ສະເລ່ຍສະມັດຕະພາບ 5,4 ໂຕນຕໍ່ເຮັກຕາ, ລວມຜົນຜະລິດ 7.560 ໂຕນ.

 ສຳລັບການກະກຽມໃຫ້ແກ່ການຜະລິດໃນລະດູຝົນທາງຫ້ອງການກະສິກຳ ແລະປ່າໄມ້ເມືອງໄດ້ລົງຊຸກຍູ້ພໍ່ແມ່ປະຊາຊົນພ້ອມທັງກະກຽມທາງດ້ານແນວພັນເຂົ້າ, ແນວພັນພືດເພື່ອສະໜອງ ໃຫ້ແກ່ປະຊາຊົນ, ແຕ່ຍ້ອນສະພາບ ອາກາດບໍ່ເອື້ອອຳນວຍມາຮອດ ປະຈຸບັນຊາວກະສິກອນສາມາດຕົກກ້າໄດ້ພຽງແຕ່ 10% ເທົ່ານັ້ນ ໃນເນື້ອທີ່ຕາມແຜນການແມ່ນ 8.100 ເຮັກຕາ ໂດຍສ່ວນໃຫຍ່ແມ່ນອາໄສດູດນໍ້າຈາກໜອງສະຂຶ້ນມາຫົດເພື່ອຕົກກ້າອັນເປັນສາເຫດເຮັດໃຫ້ຕົ້ນທຶນການຜະລິດສູງຂຶ້ນຊຶ່ງໄດ້ສົ່ງຜົນສະທ້ອນຕໍ່ລະດູທຳການຜະລິດໃນປີນີ້, ເຖິງຢ່າງໃດກໍ່ຕາມທາງຫ້ອງການກະສິກຳ ແລະປ່າໄມ້ເມືອງມະຫາໄຊໄດ້ຂຶ້ນແຜນສະເໜີແນວພັນເຂົ້າຈາກພະແນກກະສິກຳ ແລະປ່າໄມ້ແຂວງຈຳນວນ 22 ໂຕນ ແລະແນວພັນ ພືດ 54 ໂຕນ ເພື່ອໄວ້ຮອງຮັບໃນເວລາສຸກເສີນ.

______________

ຂຽນໂດຍ: ກອງຄຳ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์