ລັດວິສາຫະກິດນໍ້າປະປາແຂວງຫຼວງພະບາງ ໄດ້ເປີດກອງປະຊຸມປະມູນໂຄງການກໍ່ສ້າງລະບົບນໍ້າປະປາມູນຄ່າ 1 ຕື້ກວ່າກີບ ໃຫ້ 2 ກຸ່ມບ້ານຄື: ກຸ່ມບ້ານເມືອງຂາຍ ນະຄອນຫຼວງພະບາງ ແລະກຸ່ມບ້ານຫາດຮວຍ-ບ້ານປາກເກງ ເມືອງປາກແຊງ ແຂວງຫຼວງພະບາງ ຊຶ່ງໄດ້ຈັດຂຶ້ນວັນທີ 22 ພຶດສະພາ 2020 ນີ້ ຢູ່ຫ້ອງປະຊຸມຂອງລັດວິສາຫະກິດນໍ້າປະປາໂດຍການເປັນປະທານຂອງທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະຂົນສົ່ງແຂວງ,ມີຕາງໜ້າກົມນໍ້າປະປາກະຊວງໂຍທາທິການ ແລະຂົນສົ່ງ, ຫົວໜ້າອົງການມູນນິທິອິສມິສເວດ ປະຈໍາລາວ, ຄະນະກໍາ ມະການປະມູນຂັ້ນແຂວງ, ເມືອງ, ນະຄອນພ້ອມດ້ວຍວິຊາການຂະແໜງການທີ່ກ່ຽວຂ້ອງ ແລະຕ່າງໜ້າບໍລິສັດເຂົ້າຮ່ວມ.
 ທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະຂົນສົ່ງແຂວງຫຼວງພະບາງວ່າ: ຈຸດປະສົງຫຼັກກໍເພື່ອເປັນການປັບປຸງ ແລະຂະຫຍາຍພື້ນຖານໂຄງລ່າງນໍ້າປະປາໃຫ້ເຂົ້າເຖິງປະຊາຊົນ, ເຮັດໃຫ້ປະຊາຊົນໄດ້ຊົມໃຊ້ນໍ້າສະອາດ ແລະເປັນການສົ່ງເສີມການເຂົ້າເຖິງນໍ້າປະປາຕາມແຜນການຂອງລັດຖະບານໂດຍສະເພາະແມ່ນແຜນຍຸດທະສາດນໍ້າປະປາຮອດປີ 2030ຂອງແຂວງຫລວງພະບາງໄດ້ກໍານົດໄວ້ໃຫ້ສາມາດນໍາໃຊ້ນໍ້າສະອາດຢ່າງທົ່ວເຖິງ. ສໍາລັບການປະມູນຄັ້ງນີ້ມີ 2 ໂຄງການໂດຍໄດ້ຮັບທຶນຊ່ວຍເຫຼືອຈາກອົງການ ມູນນິທິອິສມິສເວດ ປະຈຳລາວ ລວມມູນຄ່າທັງໝົດ 160.000 ໂດລາສະຫະລັດ ຫຼືປະມານ 1.440 ລ້ານກີບ. ໃນນີ້ໂຄງ ການກໍ່ສ້າງນໍ້າປະປາກຸ່ມບ້ານເມືອງຂາຍນະຄອນຫຼວງພະບາງມູນຄ່າ 8 ໝື່ນໂດລາ ແລະໂຄງການກໍ່ສ້າງນໍ້າປະປາກຸ່ມບ້ານ ຫາດຮວຍ-ບ້ານປາກເກງເມືອງປາກ ແຊງ ມູນຄ່າ 8 ໝື່ນໂດລາ.
  ໃນການຢື່ນຊອງປະມູນຄັ້ງນີ້ມີທັງໝົດ 5 ບໍລິສັດເຂົ້າຮ່ວມປະມູນຄື: ກຸ່ມບໍລິສັດເອັສທີຈໍາກັດຜູ້ດຽວ, ບໍລິສັດດວງປະເສີດກໍ່ສ້າງ-ຂົວທາງ ຈຳກັດ, ບໍລິສັດທໍ່ນໍ້າປະປາ ລາວ ຈຳກັດຜູ້ດຽວ, ບໍລິສັດຕອງຄຳ ກໍ່ສ້າງ ແລະສ້ອມແປງເຄຫາສະຖານ, ບໍລິສັດພອນໄຊ ກໍ່ສ້າງເຄຫາສະຖານ. ຜ່ານການເປີດຊອງປະມູນການກໍ່ສ້າງລະບົບນໍ້າປະປາກຸ່ມບ້ານເມືອງຂາຍແມ່ນບໍລິສັດ ທໍ່ນໍ້າປະປາລາວ ຈໍາກັດ ຜູ້ດຽວ ຊະນະການປະມູນ ແລະ ກຸ່ມບ້ານຫາດຮວຍ-ບ້ານປາກເກງ ເມືອງປາກແຊງ ແມ່ນບໍລິສັດຕ໋ອງຄໍາກໍ່ສ້າງ ແລະສ້ອມແປງເຄຫາສະຖານ ຈໍາກັດຜູ້ດຽວ ຊະນະການປະມູນ.

----------------

ຂຽນໂດຍ: ສີສຸວັນ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์