ການບິນລາວເປີດບໍລິການພ້ອມວາງມາດຕະການປ້ອງກັນເຂັ້ມງວດ

  ລັດວິສາຫະກິດການບິນລາວເລີ່ມເປີດໃຫ້ບໍລິການຖ້ຽວບິນລະຫວ່າງແຂວງຫາແຂວງຄືນໃໝ່ເລີ່ມແຕ່ວັນທີ 22 ພຶດສະພາ 2020 ເປັນຕົ້ນໄປພາຍຫຼັງລັດຖະບານອະນຸຍາດໃຫ້ເປີດການຂົນສົ່ງໂດຍສານທາງບົກ, ທາງນໍ້າ,ທາງອາກາດພາຍໃນປະເທດໂດຍໄດ້ປະຕິບັດຕາມມາດຕະການປ້ອງກັນການຕິດເຊື້ອໂຄວິດ-19 ເປັນຕົ້ນການຮັກສາໄລຍະຫ່າງ 1 ແມັດຂຶ້ນໄປ, ມີຈຸດກວດວັດແທກອຸນຫະພູມ ແລະອະນາໄມສະຖານທີ່, ອະນາໄມເຮືອບິນ,ຕາມຄໍາແນະນໍາຂອງຄະນະສະເພາະກິດຢ່າງເຂັ້ມງວດ.

  ທ່ານ ຄຳຫຼ້າ ພົມມະວັນ ຜູ້ອຳນວຍການລັດວິສາຫະກິດການບິນລາວໄດ້ໃຫ້ສຳພາດວ່າ: ສາຍການບິນລາວມີຄວາມພ້ອມໃນທຸກດ້ານເພື່ອເປີດໃຫ້ບໍລິການຖ້ຽວບິນຄືນໃໝ່ແກ່ລູກຄ້າພ້ອມທັງໄດ້ວາງມາດຕະການປ້ອງກັນການຕິດເຊື້ອຢ່າງເຄັ່ງຂັດເປັນຕົ້ນໄດ້ມີການຂ້າເຊື້ອໃນເຮືອບິນກ່ອນຂຶ້ນເຮືອນບິນທຸກຄັ້ງ,ກ່ອນເຂົ້າປະຕິບັດງານຂອງພະນັກງານແຈ້ງປີ້ທຸກຄົນຕ້ອງໄດ້ວັດແທກອຸນຫະພູມລວມທັງຈຸບິນອຸນຫະພູມແມ່ນບໍ່ໃຫ້ສູງກາຍ 37 ອົງສາ ແລະມີອຸປະກອນປ້ອງກັນໂຕເອງຕະຫຼອດການປະຕິບັດໜ້າທີເຊັ່ນ: ຜ້າອັດປາກ-ດັງ, ຖົງມື ແລະນໍ້າຢາລ້າງມື, ພ້ອມທັງວັດແທກອຸນຫະພູມໃຫ້ຜູ້ໂດຍສານທຸກຄົນກ່ອນເວລາແຈ້ງປີ້ ແລະຜູ້ໂດຍສານຕ້ອງມາແຈ້ງດ້ວຍຕົນ ເອງຫ້າມບໍ່ໃຫ້ຄົນອື່ນມາແຈ້ງປີ້ໃຫ້ເດັດຂາດ, ກ່ອນຂຶ້ນເຮືອບິນຜູ້ໂດຍສານຕ້ອງໃສ່ຜ້າປິດປາກລວມທັງພະນັກງານຈຸບິນ, ໄດ້ກຳນົດໄລຍະຫ່າງຂອງຜູ້ໂດຍສານ 1 ແມັດ ໃນເວລາແຈ້ງປີ້ ແລະເວລາປ່ອຍຜູ້ໂດຍສານຂຶ້ນເຮືອບິນສ່ວນການບໍລິການເທິງເຮືອນບິນແມ່ນບໍ່ໃຫ້ມີການສຳພັດກັນ, ຈະຢຸດຕິການເສີບອາຫານ, ເຂົ້າໝົມ, ນໍ້ຊາ ແລະກາເຟຈະມີແຕ່ນໍ້າດື່ມໄວບໍລິການຜູ້ໂດຍສານໂດຍຈະຈັດວາງໄວ້ຈຸດທີ່ປ່ອຍຜູ້ໂດຍສານຂຶ້ນເຮືອນບິນ ແລະແນະນຳໃຫ້ຜູ້ໂດຍສານຈັບເອົາດ້ວຍຕົນເອງ.


 ໃນໄລຍະເບື່ອງຕົ້ນແມ່ນເປີດບໍລິການພຽງ 6 ຖ້ຽວບິນຄື: ວຽງຈັນ-ຫຼວງພະບາງ-ວຽງຈັນ 4 ຖ້ຽວຕໍ່ອາທິດ (ຈັນ, ພຸດ,ສຸກ,ອາທິດ); ວຽງຈັນ-ປາກເຊ-ວຽງຈັນ 4 ຖ້ຽວຕໍ່ອາທິດ (ຈັນ, ພຸດ, ສຸກ, ອາທິດ); ວຽງຈັນ-ສະຫວັນນະເຂດ-ວຽງຈັນ 3 ຖ້ຽວບິນ (ຈັນ, ພຸດ, ສຸກ); ວຽງຈັນ-ຊຽງຂວາງ-ວຽງຈັນ 3 ຖ້ຽວບິນຕໍ່ອາທິດ (ຈັນ, ພຸດ, ສຸກ); ວຽງຈັນ-ອຸດົມໄຊ-ວຽງຈັນ 3 ຖ້ຽວບິນຕໍ່ອາທິດ (ຄານ, ພະຫັດ, ເສົາ) ແລະ ວຽງຈັນ-ຫຼວງນໍ້າທາ-ວຽງຈັນ 4 ຖ້ຽວບິນຕໍ່ອາທິດ (ຈັນ, ພຸດ, ສຸກ, ອາທິດ)ພ້ອມຫຼຸດລາຄາເປັນພິເສດອີກດ້ວຍ.

แชร์