ພິທີເຊັນບົດບັນທຶກມອບ-ຮັບໜ້າ ທີ່ເລຂາພັກເມືອງໆຫ້ວຍຊາຍລະຫວ່າງ ທ່ານ ຄໍາແປງ ໃຈຍາສັກ ຄະນະປະຈໍາພັກແຂວງເລຂາພັກເມືອງເຈົ້າເມືອງໆ ຫ້ວຍຊາຍຜູ້ເກົ່າ ແລະທ່ານ ຫົງແກ້ວ ວິໄນວົງ ກໍາມະການພັກແຂວງເລຂາພັກເມືອງເຈົ້າເມືອງໆຫ້ວຍຊາຍຜູ້ໃໝ່ແມ່ນໄດ້ມີຂຶ້ນໃນວັນທີ 20 ພຶດສະພານີ້ ໂດຍຊ່ອງໜ້າຂອງທ່ານ ປອ ບົວຄົງນາມ ມະວົງ ກໍາມະການສໍາຮອງສູນກາງພັກເລຂາພັກແຂວງເຈົ້າແຂວງໆບໍ່ແກ້ວ, ມີບັນດາຄະນະປະຈຳ, ກຳມະການພັກແຂວງ, ຄະນະປະຈຳ, ກໍາມະການພັກເມືອງ, ຫົວໜ້າ- ຮອງຫົວໜ້າຫ້ອງການ, ສອງກອງບັນຊາການແຂກຖືກເຊີນຂັ້ນແຂວງ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ເພັງສອນ ແກ້ວວິໄລ ຄະນະປະຈຳພັກແຂວງຫົວໜ້າຄະນະຈັດຕັ້ງພັກ-ພະນັກງານແຂວງບໍ່ແກ້ວໄດ້ຜ່ານຂໍ້ຕົກລົງຂອງທ່ານເຈົ້າແຂວງບໍ່ແກ້ວວ່າດ້ວຍການແຕ່ງ ຕັ້ງເຈົ້າເມືອງ-ຮອງເຈົ້າ ເມືອງໆຫ້ວຍຊາຍຈຳນວນ 3 ທ່ານຄື: ເຫັນດີແຕ່ງຕັ້ງທ່ານຫົງແກ້ວວິໄນວົງກຳມະການພັກແຂວງຮັບໜ້າທີ່ເປັນເຈົ້າເມືອງໆຫ້ວຍຊາຍ, ແຕ່ງຕັ້ງທ່ານທິບພະກອນມະນີຄຳຄະນະປະຈຳພັກເມືອງຫົວໜ້າຫ້ອງການອຸດສາຫະກຳ ແລະການຄ້າເມືອງຮັບໜ້າທີ່ເປັນຮອງເຈົ້າເມືອງຫ້ວຍຊາຍຊີ້ນຳຂົງເຂດວຽກງານເສດຖະກິດ, ທ່ານສຸວັດເພັງພະຈັນກຳມະການພັກເມືອງຫົວໜ້າຄະນະຈັດຕັ້ງພັກ-ພະນັກງານ ເມືອງຮັບໜ້າທີ່ເປັນຮອງເຈົ້າເມືອງຊີ້ນຳຂົງເຂດວຽກງານວັດທະນະ ທຳ-ສັງຄົມ, ຜ່ານຂໍ້ຕົກລົງຂອງຫົວໜ້າພະແນກອຸດສາຫະກຳ ແລະການຄ້າແຂວງບໍ່ແກ້ວວ່າດ້ວຍການຍົກຍ້າຍ ທ່ານ ແກ້ວສີພອນ ສິລິປັນຍາ ຫົວໜ້າຂະແໜງກວດກາລັດພະແນກອຸດສາຫະກຳ ແລະການຄ້າແຂວງໄປຮັບໜ້າທີ່ເປັນວ່າການຫົວໜ້າຫ້ອງການອຸດສາຫະກຳ ແລະການຄ້າເມືອງຫ້ວຍຊາຍ ແລະຜ່ານຂໍ້ຕົກລົງຂອງທ່ານເຈົ້າເມືອງໆຫ້ວຍຊາຍວ່າດ້ວຍການແຕ່ງຕັ້ງ ທ່ານ ບຸນຄົງ ວົງຄຳຈັນ ຮັບໜ້າທີ່ເປັນປະທານອົງການກວດກາລັດເມືອງຫ້ວຍຊາຍ.

ໂອກາດນີ້,ສະຫາຍ ປອ ບົວຄົງນາມ ມະວົງ ໄດ້ມີຄຳເຫັນສະແດງຄວາມຍ້ອງຍໍຊົມເຊີຍ ແລະຍົກສູງຕໍ່ຜົນງານ, ຜົນສຳເລັດແຫ່ງການຊີ້ນຳໆພາຂອງ ສະຫາຍ ຄຳແປງ ໃຈຍະສັກ ຕະຫຼອດໄລຍະການ ດຳລົງຕຳແໜ່ງເປັນເລຂາພັກເມືອງ, ເຈົ້າເມືອງໆຫ້ວຍຊາຍຮຽກຮ້ອງໃຫ້ ທ່ານຈົ່ງສືບຕໍ່ເປັນທີ່ປຶກສາດ້ານວຽກງານອັນສຳຄັນເນັ້ນໜັກໃຫ້ເລຂາພັກເມືອງ, ເຈົ້າເມືອງໆຫ້ວຍຊາຍພ້ອມດ້ວຍຜູ້ທີ່ຖືກແຕ່ງຕັ້ງໃໝ່ໃຫ້ສືບຕໍ່ສຶກສາອົບຮົມການເມືອງ-ນຳພາແນວຄິດ, ເອົາໃຈໃສ່ປັບປຸງແບບແຜນວິທີເຮັດວຽກ, ລະບົບການເມືອງຂອງອົງຄະນະພັກເມືອງ, ແກ້ໄຂບັນຫາປະກົດການຫຍໍ້ທໍ້, ຂໍ້ຄົງຄ້າງເປັນສຳຄັນສົມທົບກັບຂະແໜງການກ່ຽວຂ້ອງລົງຊຸກຍູ້ສົ່ງເສີມວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະລຶບລ້າງຄວາມທຸກຍາກຕິດພັນກັບວຽກງານ 3 ສ້າງ, ປັບປຸງອົງ ການປົກຄອງ ແລະ 5 ໜ່ວຍງານການບໍລິຫານແຕ່ຂັ້ນຮາກຖານບ້ານ, ຊຸກຍູ້ສົ່ງເສີມການຜະລິດເປັນສິນຄ້າໃຫ້ມີຫຼາກຫຼາຍສີສັນຮັບປະກັນຄວາມຍືນຍົງເສີມຂະຫຍາຍມູນເຊື້ອຄວາມສາມັກຄີເປັນເອກະພາບພາຍໃນໃຫ້ມີຄວາມໜັກແໜ້ນເຂັ້ມແຂງຍິ່ງຂຶ້ນເລື້ອຍໆ.

____________

ຂຽນໂດຍ: ທອງເພັດ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์