ໜ່ວຍພັກພະແນກແຜນການຫຼວງພະບາງຈັດກອງປະຊຸມໃຫຍ່

  ໜ່ວຍພັກພະແນກແຜນການ ແລະການລົງທຶນແຂວງຫຼວງພະບາງໄດ້ຈັດກອງປະຊຸມໃຫຍ່ຄັ້ງທີ VI ຂຶ້ນ ແລະອັດລົງດ້ວຍຜົນສໍາເລັດ ໃນວັນທີ 20 ພຶດສະພາຜ່ານມາທີ່ຫ້ອງປະຊຸມພະແນກດັ່ງກ່າວໂດຍການເປັນປະທານຂອງ ສະຫາຍ ສຸກັນ ບຸນຍົງ ຄະນະປະຈຳພັກແຂວງຮອງເຈົ້າແຂວງໆຫຼວງພະບາງ, ມີສະຫາຍ ນາງ ສິລິພອນ ສຸພັນທອງ ກຳມະການພັກແຂວງເລຂາໜ່ວຍພັກພະແນກແຜນການ ແລະການລົງທຶນແຂວງ, ມີຄະນະໜ່ວຍພັກ, ສະມາຊິກພັກສົມບູນ, ພ້ອມດ້ວຍແຂກຖືກເຊີນເຂົ້າຮ່ວມ.


 ສະຫາຍ ນາງ ສິລິພອນ ສຸພັນທອງ ກຳມະການພັກແຂວງເລຂາໜ່ວຍພັກພະແນກແຜນການ ແລະການລົງທຶນແຂວງໄດ້ຜ່ານບົດລາຍງານການເມືອງສອງພາກເປັນຕົ້ນແມ່ນເນື້ອໃນບົດສະຫຼຸບຜົນງານການເຄື່ອນໄຫວວຽກງານຂອງພະແນກແຜນການ ແລະການລົງທຶນແຂວງ 5 ປີຜ່ານມາ ແລະທິດທາງແຜນການ 5 ປີ ( 2020 - 2024 ), ບົດສຳຫຼວດການຊີ້ນຳໆພາຂອງຄະນະພັກຊຸດເກົ່າຊຶ່ງຍົກໃຫ້ເຫັນຜົນງານດ້ານດີ,ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອນຖອນໄດ້ໃນການນຳພາຈັດ ຕັ້ງປະຕິບັດວຽກງານແຜນການ ແລະການລົງທຶນແຂວງຊຶ່ງໄດ້ເອົາໃຈໃສ່ນຳພາວຽກງານພັກ ແລະນຳພາວຽກງານລັດຢ່າງຕັ້ງໜ້າອັນໄດ້ເຮັດໃຫ້ວຽກງານແຕ່ລະດ້ານບັນລຸຄາດໝາຍທີ່ກອງປະຊຸມປະຊຸມໃຫຍ່ໜ່ວຍພັກຄັ້ງທີ V ໄດ້ວາງໄວ້.


ພ້ອມດຽວກັນນີ້ກອງປະຊຸມໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ຊຶ່ງມີຜູ້ລົງສະໝັກ 7 ສະຫາຍ ເລືອກເອົາ 5 ສະຫາຍ ຜ່ານການປ່ອນບັດ ແລະກອງປະຊຸມປະຖົມມະລຶກໄດ້ເປັນເອກະພາບເລືອກເອົາສະຫາຍ ນາງ ສິລິພອນ ສຸພັນທອງ ເປັນເລຂາໜ່ວຍພັກ, ສະຫາຍ ບຸນຊົມ ທັດຕະວົງ ເປັນຮອງເລຂາ ແລະ ເລືອກເອົາ ສະຫາຍ ບຸນເພັງ ວິລະວົງສາ ເປັນຄະນະທັງເປັນປະທານກວດກາພັກ, ສະຫາຍ ປອ ສີທະລອນ ສີໂພໄຊ ແລະ ສະຫາຍ ສີສຸວັນ ຈັນສະຫວັດ ເປັນຄະນະໃນການສືບຕໍ່ນຳພາຈັດຕັ້ງ ປະຕິວຽກງານໃນຂົງເຂດແຜນ ການ ແລະການລົງທຶນແຂວງ ພ້ອມທັງຄັດເລືອກເອົາຜູ້ແທນສົມບູນ ແລະສຳຮອງເພື່ອເຂົ້າ ຮ່ວມກອງປະຊຸມໃຫຍ່ຄັ້ງທີ VIIIຂອງອົງຄະນະພັກແຂວງຕື່ມອີກ ແລະກອງປະຊຸມໄດ້ເປັນເອກະພາບຮັບຮອງເອົາບົດລາຍງານການເມືອງສອງພາກເປັນຕົ້ນແມ່ນເນື້ອໃນບົດ ສະຫຼຸບການຊີ້ນຳໆພາ 5 ປີຜ່ານ ມາ 2015-2019 ແລະ ທິດທາງ 2020-2024, ຮັບຮອງເອົາແຜນພັດທະນາວຽກງານໃນຂົງເຂດ ແຜນການ ແລະການລົງທຶນແຂວງ 5 ປີ ແລະຮັບຮອງເອົາບົດສໍາຫຼວດການນໍາພາຂອງຄະນະພັກຊຸດເກົ່າ.


  ເພື່ອຮັບປະກັນເຮັດໃຫ້ການຊີ້ນໍາໆພາໃນ 5 ປີຕໍ່ໜ້າມີຜົນສໍາເລັດນັ້ນ ສະຫາຍ ສຸກັນ ບຸນຍົງ ໄດ້ມີຄຳເຫັນໂອ້ລົມຕໍ່ບັນດາສະມາຊິກພັກເຊິ່ງກ່ອນອື່ນສະຫາຍໄດ້ສະ ແດງຄວາມຍ້ອງຍໍຊົມຜົນງານທີ່ໜ່ວຍພັກຍາດມາໄດ້ພາຍໃຕ້ຄວາມສາມັກຄີກັນພາຍໃນໜ່ວຍພັກພ້ອມທັງເນັ້ນໜັກໃຫ້ຄະນະພັກຊຸດໃໝ່ສືບຕໍ່ຮັກສາມູນເຊື້ອ ແລະເຮັດໜ້າທີ່ຂອງພັກໃຫ້ມີຄວາມເຂັ້ມແຂງຕິດພັນກັບການຈັດຕັ້ງປະຕິບັດວຽກງານລັດ, ຢຶດໝັ້ນການນໍາພາຂອງພັກກໍຄືໜ້າທີ່ວຽກງານວິຊາສະເພາະຂອງຕົນໃຫ້ມີຜົນສຳເລັດ ແລະມີການພັດທະນາດີຂຶ້ນເປັນກ້າວໆ.

_______________

ຂຽນໂດຍ: ສີສຸວັນ

ພາບແລະຂ່າວ: ໜັງສືພິມເສດຖະກິດ-ສັງຄົມ

แชร์