ສະຖານີລົດໂດຍສານແຂວງຫຼວງນໍ້າທາເລີ່ມເປີດບໍລິການ

  ໂດຍປະຕິບັດຕາມຂໍ້ຕົກລົງຂອງກະຊວງໂຍທາທິການ ແລະຂົນສົ່ງເລກທີ 325 ລົງວັນທີ 17 ພຶດສະພາ 2020 ກ່ຽວກັບການເປີດບໍລິການຂົນສົ່ງໂດຍສານທາງບົກພາຍໃນປະເທດໃນໄລຍະສືບຕໍ່ປ້ອງກັນ,ຄວບຄຸມ ແລະເເກ້ໄຂການລະບາດຂອງພະຍາດໂຄວິດ-19, ໂດຍອີງຕາມຄໍາສັ່ງວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ສະບັບເລກທີ 06/ນຍ, ລົງວັນທີ 29 ມີນາ 2020, ອີງຕາມການຕົກລົງເຫັນດີຂອງຄະນະພັກປະຈໍາກະຊວງໂຍທາທິການ ແລະຂົນສົ່ງ, ລະຫວ່າງຄະ ນະສະເພາະກິດເພື່ອປ້ອງກັນ, ຄວບຄຸມ ແລະການລະບາດຂອງພະຍາດໂຄວິດ-19 ຄັ້ງວັນທີ່ 15 ພຶດສະພາ 2020.

  ເພື່ອຮັບປະກັນໃຫ້ແກ່ການຈັດຕັ້ງປະຕິບັດມາດຕະການຜ່ອນຜັນຄໍາສັ່ງຂອງທ່ານນາຍົກລັດຖະມົນຕີສະບັບເລກທີ 06/ນຍລົງວັນທີ 29 ມີນາ 2020 ແລະ ແຈ້ງ ການຂອງຫ້ອງວ່າການສໍານັກງານນາຍົກລັດຖະມົນຕີສະບັບເລກທີ 580/ຫສນຍ ລົງວັນທີ 15 ພຶດສະພາ 2020 ໃຫ້ມີປະສິດທິຜົນ, ກະຊວງໂຍທາທິການ ແລະຂົນສົ່ງຈຶ່ງໄດ້ອອກແຈ້ງຄໍາແນະນໍາກ່ຽວກັບການຈັດຕັ້ງປະຕິບັດການເປີດໃຫ້ບໍລິການຂົນສົ່ງໂດຍສານທາງບົກພາຍໃນທົ່ວປະເທດ, ເວົ້າລວມເວົ້າສະເພາະກໍ່ຄຶສະຖານີຂົນສົ່ງລົດໂດຍສານຄິວລົດຕ່າງແຂວງ ແລະ ຄິວລົດຕ່າງເມືອງພາຍໃນແຂວງໆຫຼວງນໍ້າທາທີ່ໄດ້ປິດໃຫ້ບໍລິການຊົ່ວຄາວ ແລະມາໃນວັນທີ 19 ພຶດສະພາ 2020 ຈຶ່ງເປີດບໍລິການຮັບໃຊ້ສັງຄົມຜູ້ທີ່ຈະເດີນທາງໄປຕ່າງແຂວງຕ່າງເມືອງພາຍໃນປະເທດ, ແຕ່ຕ້ອງໄດ້ປະຕິບັດມາດຕະການໆຄວບຄຸມ ແລະປ້ອງກັນພະຍາດໂຄວິດ-19 ຢ່າງເຂັ້ມງວດ, ຢູ່ສະຖານີລົດຂົນສົ່ງຕ້ອງຜູ້ໂດຍສານ ແລະບ່ອນລໍຖ້າລົດຕ້ອງມີຈຸດແທກອຸນນະພຸມທາງເຂົ້າ ແລະເຈວລ້າງມື ຫຼືນໍ້າຢາຂ້າເຊື້ອ, ທຸກຄົນທີ່ເຂົ້າໄປໃຊ້ບໍລິການສະຖານີຂົນ ສົ່ງໂດຍສານຕ້ອງໄດ້ຜ່ານການແທກອຸນຫະພຸມ, ການຈັດສັນບ່ອນນັ່ງ ຫຼືບ່ອນລໍຖ້າຕ້ອງຮັກສາໄລຍະຫາງ 1 ແມັດ ຂຶ້ນໄປ ແລະຕ້ອງມີການຊີດຢາຂ້າເຊື້ອ ກ່ອນໃຫ້ບໍລິການປະຈໍາວັນ, ຜູ້ໂດຍສານ, ໂຊເຟີລົດ, ແອັດລົດຕ້ອງມີການແທກອຸນຫະພຸມກ່ອນຂຶ້ນລົດໂດຍສານທຸກຄັ້ງ, ໃສ່ຜ້າປິດປາກ-ດັງ,ຖ້າບໍປະຕິບັດແມ່ນບໍອະຍຸຍາດໃຫ້ບໍລິການ, ຍານພາຫະນະຕ້ອງມີການອະນາໄມຂ້າເຊື້ອກ່ອນໃຫ້ບໍລິການທຸກຄັ້ງເພື່ອເຮັດໃຫ້ທຸກທ່ານປອດໄພຈາກພະຍາດໂຄວິດ-19.

________________

ຂຽນໂດຍ: ມຸນຕີ

ຈາກໜັງສືພິມເສດຖະກິດ-ສັງຄົມ

แชร์