ກວດກາໂຄງການລົງທຶນຂອງລັດພົບເງິນຄິດໄລ່ບໍ່ຖືກຕ້ອງຫຼາຍລ້ານກີບຢູ່ຫຼວງພະບາງ

   ໃນ 5 ປີ ຜ່ານມາ ພະແນກແຜນການ ແລະ ການລົງທຶນແຂວງຫຼວງພະບາງ ໄດ້ລົງກວດກາການກໍ່ສ້າງທີ່ເປັນໂຄງການລົງທຶນຂອງລັດຢູ່ແຕ່ລະເມືອງລວມມີ 11 ເມືອງ, 1 ນະຄອນ, ພົບການຄິດໄລ່ບໍ່ຖືກຕ້ອງ, ການຄິດໄລ່ຊໍ້າຊ້ອນ, ຄິດໄລ່ບໍລິມາດ, ຈໍານວນວັດສະດຸຫຼາຍເກີນຄວາມເປັນຈິງລວມມູນຄ່າ 828,27 ລ້ານກີບ.

  ທ່ານ ບຸນຊົມ ທັດຕະວົງ ຮອງຫົວໜ້າພະແນກແຜນການ ແລະການລົງທຶນແຂວງຫຼວງພະບາງໃຫ້ຮູ້ໃນວັນທີ 20 ພຶດສະພາ 2020 ນີ້ວ່າ: ໃນໄລຍະ 5 ປີ ຜ່ານມາ 2015-2019 ທາງພະແນກແຜນການ ແລະການລົງທຶນແຂວງຫຼວງພະບາງໄດ້ເອົາໃຈໃສ່ຈັດຕັ້ງຜັນຂະຫຍາຍບັນດາຄາດໝາຍສູ້ຊົນຕາມພາລະບົດບາດ, ສິດ ແລະໜ້າທີ່ເປັນໃຈກາງໃນການຄົ້ນຄວ້າ, ວິໄຈຂໍ້ມູນ ແລະການວາງແຜນພັດທະນາເສດຖະກິດ-ສັງຄົງໃຫ້ມີຄວາມສອດຄ່ອງ, ເໝາະສົມ,ໝັ້ນທ່ຽງ ແລະສ້າງໄດ້ຄວາມສົມດຸນຂອງການເຕີມໂຕ ໂດຍການສຸມໃສ່ສ້າງພື້ນຖານເສດຖະກິດໃຫ້ເຂັ້ມແຂງ, ຮັບປະກັນໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ສຸມໃສ່ປະກອບສ່ວນເຂົ້າໃນການປັບປຸງກໍ່ສ້າງພື້ນຖານໂຄງລ່າງໃຫ້ຂະຫຍາຍຕົວດ້ວຍບາດກ້າວທີ່ໜັກແໜ້ນ, ແນໃສ່ໃຫ້ການຄຸ້ມຄອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະທຸກໂຄງການການລົງທຶນຂອງລັດ,ພາກເອກະຊົນພາຍໃນ ແລະຕ່າງປະເທດ,ການຊ່ວຍເຫຼືອທາງການເພື່ອພັດທະນາໃຫ້ໄດ້ປະສິດທິພາບສູງ, ໂປ່ງໃສສາມາດກວດສອບໄດ້.

  ທ່ານກ່າວຕື່ມອີກວ່າ: ສໍາລັບວຽກງານກວດກາກວດສອບວຽກງານຂອງບັນດາໂຄງການໆລົງທຶນຂອງລັດຖືເປັນໝາກຫົວໃຈຫຼັກໃນການກວດກາຄວາມໂປ່ງໃສ່ບັນດາໂຄງການການລົງທຶນຕ່າງໆ ຊຶ່ງໃນ 5 ປີ ຜ່ານມາໜ່ວຍງານກວດກາຂອງພະແນກໄດ້ລົງກວດກາການກໍ່ສ້າງທີ່ເປັນໂຄງການລົງທຶນຂອງລັດຢູ່ 11 ເມືອງ, 1 ນະ ຄອນ, ພົບເຫັນການຄິດໄລ່ບໍ່ຖືກຕ້ອງ, ມີການຄິດໄລ່ຊໍ້າຊ້ອນ, ຄິດໄລ່ບໍລິມາດຈໍານວນວັດສະດຸຫຼາຍເກີນຄວາມເປັນຈິງຊຶ່ງສ້າງມູນຄ່າຄວາມເສຍຫາຍທີ່ສາມາດຫຼຸດ ຜ່ອນງົບປະມານຂອງລັດໄດ້ເຖິງ 828,27 ລ້ານກີບ, ພ້ອມນີ້ແຜນຕໍ່ໜ້າຍັງຈະສືບຕໍ່ຈັດຕັ້ງປະຕິບັດຢ່າງເຂັ້ມງວດ.

______________

ຂຽນໂດຍ: ສີສຸວັນ

ຈາກໜັງສືພິມເສດຖະກິດ-ສັງຄົມ

แชร์