ລັດກຳລັງດຳເນີນກົນໄກການຈັດຫາງານໃຫ້ກັບແຮງງານທີ່ຕົກວຽກ

  ໃນກອງປະຊຸມການຈັດຫາງານໃຫ້ຜູ້ທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໄວຣັດໂຄວິດ-19 ທີ່ຈັດຂຶ້ນໃນວັນທີ 20 ພຶດສະພານີ້ ໂດຍການເປັນປະທານຂອງທ່ານ ປະເດີມພອນ ສົນທານີ ຮອງລັດຖະມົນຕີກະຊວງແຮງງານແລະສະຫວັດດີການສັງຄົມໄດ້ຕີລາຄາວ່າ: ການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່(COVID-19) ໄດ້ສົ່ງຜົນກະທົບຢ່າງໃຫຍ່ຫຼວງຕໍ່ກັບການພັດທະນາເສດຖະກິດ-ສັງຄົມ ແລະຊີວິດການເປັນຢູ່ຂອງຜູ້ອອກແຮງງານຢູ່ ສປປ ລາວ ເນື່ອງຈາກຫົວໜ່ວຍແຮງງານ, ໂຄງການ ແລະໂຮງຈັກໂຮງງານຫຼາຍແຫ່ງກໍ່ມີການໂຈະ ແລະປິດກິດຈະການໂດຍສົ່ງຜົນເຮັດໃຫ້ຜູ້ອອກແຮງງານໃນລະ ບົບ, ນອກລະບົບລວມເຖິງຜູ້ປະກອບອາຊີບອິດສະຫຼະປະເຊີນກັບການວ່າງງານ, ອີງຕາມການຄາດຄະເນຂອງອົງການແຮງງານສາກົນອັດຕາການວ່າງງານຈະເພີ່ມຂຶ້ນປະມານ 25% ຢູ່ ສປປ ລາວ, ຄຽງຄູ່ກັນນັ້ນ, ປະຊາຊົນລາວທີ່ອອກແຮງງານຢູ່ປະເທດໄທແບບຖືກຕ້ອງ ແລະບໍ່ຖືກຕ້ອງຕາມກົດໝາຍໄດ້ຫຼັງໄຫຼກັບຄືນປະເທດເປັນຈຳນວນຫຼວງຫຼາຍໂດຍຜ່ານຊ່ອງທາງຕ່າງໆ.

  ອີງຕາມການລາຍງານຕົວເລກຂອງແຮງງານລາວທີ່ກັບມາຈາກປະເທດໄທໂດຍຜ່ານດ່ານສາກົນມີຈຳນວນຫຼາຍກວ່າ 80.000 ຄົນ ສະນັ້ນທາງກະຊວງແຮງງານ ແລະສະຫວັດດີການສັງຄົມໄດ້ເລັ່ງຈັດຕັ້ງປະຕິບັດກົນໄກໃນການຈັດຫາງານຄື: 1. ສະພາການຄ້າ ແລະອຸດສາຫະກຳແຫ່ງຊາດລາວສັງລວມຕໍາແໜ່ງງານວ່າງ ຫຼືຄວາມຕ້ອງການແຮງງານຂອງບັນດາຫົວໜ່ວຍທຸລະກິດໃນຂອບເຂດທົ່ວປະເທດທີ່ເປັນສະມາຊິກຂອງສະພາການຄ້າ ແລະ ອຸດສາຫະກຳແຫ່ງຊາດລາວ (ຊື່ຫົວໜ່ວຍແຮງງານ, ຈຳນວນແຮງງານ, ຂະແໜງການ ແລະ ເງື່ອນໄຂຂອງການຈ້າງງານ) ແລ້ວສະໜອງໃຫ້ກົມພັດທະນາສີມືແຮງງານ ແລະ ຈັດຫາງານ; 2. ຫ້ອງການສົ່ງເສີມ ແລະຄຸ້ມຄອງເຂດເສດຖະກິດພິເສດສັງລວມຕຳແໜງງານວ່າງ ຫຼືຄວາມຕ້ອງການ ແຮງງານຂອງເຂດເສດຖະກິດພິເສດຈາກບັນດາຫົວໜ່ວຍແຮງງານ (ຊື່ຫົວໜ່ວຍແຮງງານ, ຈຳນວນແຮງງານ,ຂະແໜງການ ແລະເງື່ອນໄຂຂອງການຈ້າງງານ);3. ກົມພັດທະນາສີມືແຮງງານ ແລະຈັດຫາງານກຳເກັບຂໍ້ມູນຂອງຜູ້ອອກແຮງງານລາວທີ່ກັບຈາກປະເທດ ແລະຜູ້ອອກແຮງງານທີ່ວ່າງງານໃນຂອບເຂດທົ່ວປະເທດ,ວິເຄາະ ແລະວິໄຈຂໍ້ມູນ (ກຳລັງດຳເນີນການຄາດວ່າຈະສຳເລັດໃນຕົ້ນເດືອນມິຖຸນາ 2020) 4. ສູນບໍລິການຈັດຫາງານ, ຈຸດບໍລິການຈັດຫາງານ ແລະ ບໍລິສັດຈັດຫາງານຂຶ້ນທະບຽນຜູ້ຕ້ອງການມີວຽກເຮັດງານທຳ ແລະ ຈັດຜູ້ຊອກຫາວຽກເຮັດງານທຳ ໃສ່ຕຳແໜ່ງງານວ່າງບົນພື້ນຖານຄວາມຕ້ອງການຂອງຜູ້ໃຊ້ແຮງງານ; 5, ຈັດງານນັດພົບແຮງງານເພື່ອສະໜອງຜູ້ຕ້ອງການມີວຽກເຮັດງານທຳໃຫ້ກັບຫົວໜ່ວຍແຮງງານທີ່ຕ້ອງການແຮງງານ 6 ກົມພັດທະນາສີມືແຮງງານ ແລະຈັດຫາງານຕິດຕາມ ແລະສັງລວມຜົນໄດ້ຮັບ.


  ສະເພາະການສົ່ງເສີມການກັບຄືນໄປເຮັດວຽກຢູ່ຕ່າງປະເທດແບບຖືກຕ້ອງ 1. ໂຄສະນາປະຊາສຳພັນໃຫ້ຂໍ້ມູນຂ່າວສານຜູ້ອອກແຮງງານກ່ຽວກັບຂັ້ນຕອນ ແລະຂະ ບວນການໄປເຮັດວຽກຢູ່ຕ່າງປະເທດແບບຖືກຕ້ອງຕາມກົດໝາຍ; 2. ນຳໃຊ້ລະບົບໂປຮແກຣມຖານຂໍ້ມູນທີ່ທັນສະໄໝ່ໃນການຕິດຕາມ ແລະຄຸ້ມຄອງແຮງງານທີ່່ຖືກຈັດສົ່ງ (ເລີ່ມນຳໃຊ້); 3. ອອກໜັງສືຜ່ານແດນໃຫ້ຜູ້ອອກແຮງງານທີ່ອ້າງວ່າເຮັດໜັງສືຜ່ານແດນເສຍໄລຍະຫ່າງຕໍ່າສຸດ 1 ປີ;4. ເຂັ້ມງວດໃນການອະນຸຍາດໃຫ້ປະຊາຊົນທົ່ວໄປທີ່ເດີນທາງໄປເທດໄທໂດຍຜ່ານດ່ານສາກົນຕ່າງໆ.

______________

ຂຽນໂດຍ: ເພັດສະໄໝ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์