ຕະຫຼາດນ້ຳມັນເຊື້ອໄຟແຂ່ງຂັນກັນສູງແຕ່ ລນລ ວາງເປົ້າຍອດຂາຍເກືອບ 300 ລ້ານລິດ

  ເຖິງວ່າໃນປີຜ່ານມາຈະມີສະພາບໄພນ້ຳຖ້ວມຢູ່ຫຼາຍຂົງເຂດໃນຂອບເຂດທົ່ວປະເທດ ແລະດ້ານລາຄານ້ຳມັນເຊື້ອໄຟກໍ່ມີການປັບຂຶ້ນ-ລົງຢູ່ຕະຫຼອດເວລາ ກໍຕາມແຕ່ທຸລະກິດນ້ຳມັນເຊື້ອໄຟຍັງຄົງຂະຫຍາຍຕົວຕໍ່ເນື່ອງ ແລະມີການແຂ່ງຂັນກັນສູງເນື່ອງຈາກມີຫຼາຍບໍລິສັດນຳເຂົ້າ ແລະຈຳໜ່າຍຊຶ່ງໃນປີ 2018 ລັ ດວິສາຫະກິດນ້ຳມັນເຊື້ອໄຟລາວ (ລນລ) ໄດ້ມີຍອດຈຳໜ່າຍນ້ຳມັນ 277 ລ້ານກວ່າລິດເທົ່າກັບ 97,23% ຂອງແຜນການແຕ່ດ້ານການເຕີບໂຕສະເລ່ຍ 8% ຂະນະທີ່ປີນີ້ ລນລ ຕັ້ງເປົ້າຈຳໜ່າຍນ້ຳມັນໃຫ້ໄດ້ເກືອບ 300 ລ້ານລິດເພີ່ມຂຶ້ນ 10% ຈາກປີຜ່ານມາ.

  ທ່ານ ອະນຸສິນ ພົນເສນາ ຜູ້ອຳນວຍການລັດວິສາຫະກິດນ້ຳມັນເຊື້ອໄຟລາວໃຫ້ສຳພາດຕໍ່ນັກຂ່າວໜັງສືພິມເສດຖະກິດ-ສັງຄົມເມື່ອບໍ່ດົນມານີ້ວ່າ: ຕະຫຼາ ດນ້ຳມັນເຊື້ອໄຟບ້ານເຮົາເປັນຕະຫຼາດນ້ອຍໆເຮັດໃຫ້ການຊື້-ຂາຍມີການຍາກສ່ວນແບ່ງຕະຫຼາດ, ມີຄວາມຫຍຸ້ງຍາກທ້າທາຍ ແລະຍັງຄົງມີການແຂ່ງຂັນກັນສູງເນື່ອງຈາກບໍລິສັດທີ່ເຂົ້າມາເຮັດທຸລະກິດນ້ຳມັນເຊື້ອໄຟຢູ່ລາວລ້ວນແຕ່ເປັນບໍລິສັດໃຫຍ່ຂອງຕ່າງປະເທດໂດຍສະເພາະ ປຕທ ຂອງປະເທດໄທ, ປີໂຕຫວຽ ດນາມ, ປີໂຕດີແມັກຂອງປະເທດຫວຽດນາມ ແລະອື່ນໆແຕ່ຈຸດແຂງຂອງລັດວິສາຫະກິດນ້ຳມັນເຊື້ອໄຟລາວຄືເປັນບໍລິສັດລັດໄດ້ຮັບການອູ້ມຊູ ແລະເປັນບຸລິມະສິດໃນການສະໜອງນ້ຳມັນໃຫ້ສັງຄົມລວມທັງພາກລັດຕ່າງໆຕະຫຼອດເຖິງການຄ້ຳຍູ້ເສດຖະກິດ ແລະຍັງຄົງຢືນຢູ່ອັນ                                  ດັບ1 ຂອງສ່ວນແບ່ງຕະຫຼາດບ້ານເຮົາ.

  ທ່ານ ອະນຸສິນ ພົນເສນາ ກ່າວວ່າ: ສຳລັບການຈັດຕັ້ງປະຕິບັດປັບປຸງບໍລິສັດນຳເຂົ້ານ້ຳມັນຈາກ 25 ບໍລິສັດມາເປັນ 5 ບໍລິສັດຕາມດຳລັດ 331 ກ່ຽວ ກັບການຄຸ້ມຄອງທຸລະກິດກິດນ້ຳມັນແມ່ນຍັງມີຄວາມຫຍຸ້ງຍາກຫຼາຍຢ່າງ, ໂດຍໃນດຳລັດດັ່ງກ່າວແມ່ນໃຫ້ມີ 4 ຂະແໜງການຄື: ບໍລິສັດນຳເຂົ້າ, ບໍລິສັດ ຂາຍຍ່ອຍ, ບໍລິສັດຂົນສົ່ງ ແລະບໍລິສັດເຊົ່າສາງຊຶ່ງບໍລິສັດເຫຼົ່ານີ້ຕ້ອງມີທຶນໜູນວຽນທີ່ສູງເປັນຕົ້ນບໍລິສັດນຳເຂົ້າຕ້ອງມີທຶນ 250 ຕື້ກີບ, ບໍລິສັດຂາຍຍ່ອຍ 50 ຕື້ກີບ, ບໍລິສັດຂົນສົ່ງ 30 ຕື້ກີບ ແລະບໍລິສັດເຊົ່າສາງກໍມີທຶນຈຳນວນໜຶ່ງມາຮອດປະຈຸບັນກໍໄດ້ມີບໍລິສັດນ້ອຍຫຼາຍບໍລິສັດຮ່ວມຕົວກັນຊຶ່ງການປະຕິ ບັດດຳລັດດັ່ງກ່າວຈະໃຫ້ສຳເລັດໃນເດືອນພຶດສະພາ 2019  ທີ່ຈະມາເຖິງນີ້ໃນການປັບຕົວເຂົ້າກັນ.

   ທ່ານ ອະນຸສິນ ພົນເສນາ ກ່າວຕື່ມ ອີກວ່າ: ສຳລັບທຸລະກິດ ລນລ ໃນປີ 2018 ຜ່ານມາເຫັນວ່າທຸລະກິດມີການເຕີບໂຕສະເລ່ຍປະມານ 8%, ມີຍອດ ຈຳໜ່າຍ 277 ລ້ານກວ່າລິດເທົ່າກັບ 97,23% (ແຜນການ 285 ລ້ານລິດ) ຂະນະທີ່ປີ 2019 ນີ້ການເຕີບໂຕຄາດວ່າຈະຢູ່ໃນລະດັບ 7-8%, ດ້ານການຈຳ ໜ່າຍຈະໃຫ້ເພີ່ມຂຶ້ນປະມານ 10% ໃນແຜນການຈຳໜ່າຍແມ່ນ 295 ລ້ານລິດ, ໂດຍນ້ຳມັນທີ່ນຳເຂົ້າມາຈາກສອງແຫ່ງເປັນຕົ້ນແມ່ນຈາກປະທດໄທ 80% ແລະປະເທດຫວຽດນາມ 20%, ປະຈຸບັນລັດວິສາຫະກິດນ້ຳມັນເຊື້ອໄຟລາວມີທັງໝົດ 300 ກວ່າປ້ຳມີທຸກເມືອງໃນທົ່ວປະເທດ ແລະສາມາດສ້າງວຽກເຮັດງານທຳໃຫ້ປະຊາຊົນເປັນຈຳນວນຫຼາຍສົມຄວນ.

แชร์