ສະຫວັນ ໄດ້ຮັບທຶນຊ່ວຍເຫຼືອ 8,8 ລ້ານໂດລາ ເກັບກູ້ລະເບີດບໍ່ທັນແຕກ

  ປະເທດສະຫະລັດອາເມລິກາໃຫ້ທຶນຊ່ວຍເຫຼືອເພີ່ມ 7 ລ້ານໂດລາສະຫະລັດ ແລະຈາກປະເທດອັງກິດອີກຈຳນວນ 1,8 ລ້ານໂດລາສະຫະລັດ ເພື່ອນຳໃຊ້ເຂົ້າໃນວຽກ ງານການເກັບກູ້ລະເບີດບໍ່ທັນແຕກໃນ 4 ເມືອງເປົ້າໝາຍຂອງແຂວງສະຫວັນນະເຂດ.
  ຊຶ່ງໃນຕອນເຊົ້າວັນທີ 18 ພຶດສະພາ 2020 ທີ່ຫ້ອງຮັບແຂກຫ້ອງວ່າການປົກຄອງແຂວງ, ທ່ານ ປອ ໂພໄຊ ໄຊຍະສອນ ຮອງເຈົ້າແຂວງາສະຫວັນນະເຂດ ພ້ອມ ດ້ວຍພາກສ່ວນກ່ຽວຂ້ອງຂອງແຂວງກໍ່ໄດ້ໃຫ້ກຽດຕ້ອນຮັບທ່ານ ຄາເມຣອນ ອິມເບີ ຫົວໜ້າອົງການຮາໂລທຣາສທ໌ ສປປ ລາວ ພ້ອມຄະນະທີ່ໄດ້ເດີນທາງມາຢ້ຽມຢາມ ແລະເຂົ້າພົບປະກັບການນຳຂັ້ນສູງຂອງແຂວງສະຫວັນນະເຂດ ເພື່ອຮ່ວມປຶກສາຫາລືກ່ຽວກັບໂຄງການໃໝ່ທີ່ໄດ້ຮັບທຶນສະໜັບສະໜູນຈາກຣາຊະອານາຈັກອັງກິດ (DFID) ແລະຈາກປະເທດສະຫະລັດອາເມລິກາ.
  ໂອກາດນີ້, ທ່ານ ເຄເມຣອນ ກໍ່ໄດ້ລາຍງານໃຫ້ຮູ້ວ່າ: ສຳລັບທຶນໃໝ່ທີ່ທາງອົງການຮາໂລທຣາສທ໌ ສປປ ລາວ ໄດ້ຮັບໃນຄັ້ງນີ້ແມ່ນປະກອບມີ 2 ທຶນຄື: ທຶນຈາກປະ ເທດອັງກິດ (DFID) ຈຳນວນ 1,8 ລ້ານໂດລາ ແລະ ທຶນຈາກປະເທດສະຫະລັດອາເມລິກາຈຳນວນ 7 ລ້ານໂດລາ ຊຶ່ງຈະນຳໃຊ້ເຂົ້າໃນການເກັບກູ້ລະເບີດໃນ 4 ເມືອງຂອງແຂວງສະຫວັນນະເຂດ ຄື: ເມືອງວິລະບູລີ, ເຊໂປນ, ພີນ ແລະເມືອງນອງໂດຍຈະເລີ່ມຈັດຕັ້ງປະຕິບັດ ໃນປີ 2020-2021. ຊຶ່ງປະຈຸບັນ, ພວກເຮົາກໍ່ມີທຶນຈາກປະເທດສະຫະລັດອາເມລິກາຢູ່ແລ້ວທີ່ໄດ້ນຳໃຊ້ເຂົ້າໃນວຽກງານດັ່ງກ່າວຈຳນວນ 17 ລ້ານໂດລາ ທີ່ມີໄລຍະເວລາ 4 ເຊິ່ງໄດ້ຈັດຕັ້ງປະຕິບັດມາໄດ້ເຄິ່ງທາງແລ້ວ . ສຳລັບໂຄງການໃໝ່ນີ້, ທາງໂຄງການກໍ່ມີແຜນຈະຮັບພະນັກງານໃໝ່ອີກຈຳນວນ 300 ກວ່າຄົນ ໂດຍຈະເນັ້ນໃສ່ຄັດເລືອກເອົາຈາກ 4 ເປົ້າໝາຍຂອງໂຄງການເປັນຕົ້ນຕໍເພື່ອນຳມາຝຶກໃຫ້ເປັນນັກເກັບກູ້ລະເບີດຂັ້ນພື້ນຖານຊຶ່ງຈະເຮັດໃຫ້ພະນັກງານຮາໂລທຣາສທ໌ຂອງພວກເຮົາລວມມີຈຳນວນທັງໝົດ 900 ກວ່າຄົນ ໂດຍຈຸດປະ ສົງໃນການເຂົ້າມາພົບປະການນຳຂັ້ນສູງຂອງແຂວງສະຫວັນນະເຂດໃນຄັ້ງນີ້ກໍ່ເພື່ອລາຍງານກ່ຽວກັບການໄດ້ຮັບທຶນຊ່ວຍເຫຼືອໃໝ່ພ້ອມທັງຂໍທິດຊີ້ນຳຈາກການນຳຂອງ ແຂວງໃນການຈັດຕັ້ງປະຕິບັດໂຄງການໃໝ່ດັ່ງກ່າວແນໃສ່ເພື່ອເຮັດໃຫ້ການຈັດຕັ້ງປະຕິບັດໂຄງການໄດ້ຮັບປະສິດທິພາບປະສິດທິຜົນດີຂຶ້ນກວ່າເກົ່າ.
  ຈາກນັ້ນ, ທ່ານ ປອ ໂພໄຊ ໄຊຍະສອນ ກໍ່ໄດ້ກ່າວສະແດງຄວາມຍິນດີ ແລະດີໃຈທີ່ແຂວງສະຫວັນນະເຂດ ໄດ້ຮັບທຶນຊ່ວຍເຫຼືອເພີ່ມເພື່ອສືບຕໍ່ໃນການເກັບກູ້ລະເບີດບໍ່ທັນແຕກສະໄໝສົງຄາມເຊິ່ງຜ່ານມາ, ທາງອົງການກໍ່ມີຜົນງານຫຼາຍດ້ານໃນການເຄື່ອນໄຫວຈັດຕັ້ງປະຕິບັດບັນດາ ກິດຈະກຳຕ່າງໆ ແຕ່ຄຽງຄູ່ກັນນີ້, ກໍ່ຍັງມີຫຼາຍຢ່າງທີ່ຕ້ອງໄດ້ປັບປຸງເຊິ່ງໃນເດືອນມີນາຜ່ານມານີ້, ກໍ່ເກີດເຫດລະເບີດແຕກໃສ່ປະຊາຊົນໃນເມືອງນອງ ແລະເມືອງອາດສະພອນ ທີ່ເຮັດໃຫ້ມີຄົນເສຍຊີວິດເຖິງ 4 ຄົນ ທີ່ໄດ້ສະແດງໃຫ້ເຫັນວ່າແຂວງສະຫວັນນະເຂດຂອງພວກເຮົາຍັງມີຄວາມສ່ຽງສູງຈາກລະເບີດບໍ່ທັນແຕກທີ່ໄດ້ກະທົບຢ່າງໜັກໜ່ວງຕໍ່ການດຳລົງຊີວິດຂອງພໍ່ແມ່ປະຊາ ຊົນບັນດາເຜົ່າ ແລະກໍ່ຍັງມີຫຼາຍໆຄົນໂດຍສະເພາະໄວໜຸ່ມທີ່ຍັງບໍ່ຮູ້ເຖິງຄວາມອັນຕະລາຍຂອງລະເບີດບໍ່ທັນແຕກສະນັ້ນ, ຈຶ່ງຮຽກຮ້ອງໃຫ້ທາງໂຄງການຊ່ວຍໃນການເຮັດວຽກງານໂຄສະນາປະຊາສຳພັນໃນວຽກງານນີ້ໃຫ້ຫຼາຍຂຶ້ນຈາກນີ້, ຕໍ່ກັບການຈັດຕັ້ງປະຕິບັດໂຄງການໃໝ່ ແມ່ນຢາກໃຫ້ເບິ່ງຄືນບັນດາກິດຈະກຳທີ່ໄດ້ປະຕິບັດຜ່ານ ມານັ້ນ ເພາະບາງອັນແມ່ນຄືກັນສະນັ້ນ,ຕ້ອງໄດ້ສຸມໃສ່ບັນດາກິດຈະກຳທີ່ເຫັນວ່າສຳຄັນ ແລະຈຳເປັນທີ່ຍັງເປັນວຽກຄ້າງຄາເປັນຕົ້ນແມ່ນການເກັບກູ້ລະເບີດບໍ່ທັນແຕກອອກຈາກພື້ນທີ່ທຳການຜະລິດຂອງປະຊາຊົນທັງນີ້ກໍ່ເພື່ອສ້າງເງື່ອນໄຂໃຫ້ເຂົາເຈົ້າໄດ້ທຳມາຫາກິນ ແລະ ທຳການຜະລິດກະສິກຳເພື່ອແກ້ໄຂຊີວິດການເປັນຢູ່ຂອງຄອບ ຄົວ.

________________

ໜັງສືພິມເສດຖະກິດ-ສັງຄົມ

แชร์