ໃຊ້ງົບ 16,4 ຕື້ກີບ ສ້າງ ແລະສ້ອມແປງຊົນລະປະທານບ້ານຄັນທ່າຈານ

  ຫວ່າງບໍດົນຜ່ານມານີ້, ທ່ານ ຄໍາວິໃສ ຜຸຍຍະວົງ ເຈົ້າເມືອງໄຊພູທອງ ພ້ອມດ້ວຍຄະນະນໍາຂອງເມືອງ ແລະຫ້ອງການກະສິກໍາ-ປ່າໄມ້ເມືອງໄຊພູທອງໄດ້ລົງຕິດຕາມຄວາມຄືບໜ້າໂຄງການກໍ່ສ້າງ ແລະສ້ອມແປງຊົນລະປະທານບ້ານຄັນທ່າຈານຊຶ່ງເປັນໜຶ່ງໃນໂຄງການຍ່ອຍຂອງການພັດທະນາພື້ນຖານໂຄງລ່າງກະສິກໍາຕາມແລວເສດ ຖະກິດຕາເວັນອອກ-ຕາເວັນຕົກ.
 ໂຄງການດັ່ງກ່າວແມ່ນໄດ້ເລີ່ມລົງມືຈັດຕັ້ງປະຕິບັດມາແຕ່ວັນທີ 18 ທັນວາ 2019 ຕາມສັນຍາແມ່ນຈະໃຫ້ສໍາເລັດໂຄງການໃນ 2021 ໃນກຳນົດເວລາ 18 ເດືອນ. ແຕ່ຜ່ານການຈັດຕັ້ງປະຕິບັດຕົວຈິງມາຮອດປະຈຸບັນເຫັນວ່າໂຄງການດັ່ງກ່າວສາມາດກໍ່ສ້າງໃນມູນຄ່າ 1,82 ລ້ານໂດລາ. ສໍາລັບໜ້າວຽກທີ່ເຮັດແມ່ນໄດ້ກໍ່ສ້າງຄອງຊອຍເບຕົງຈຳນວນ 20 ຄອງຢູ່ຫົວງານທີ 1 ບ້ານຄັນທ່າຈານ ມີ 16 ຄອງ ແລະຢູ່ຫົວງານທີ 2 ແມ່ນຕັ້ງຢູ່ບ້ານດອນຖໍ້າເງິນມີ 4 ຄອງ, ລວມທັງໝົດມີ 20 ຄອງມີລວງຍາວຂອງຄອງທັງໝົດໃນ 13.488 ແມັດ, ກໍ່ສ້າງເຮືອນປໍ້າ ຫຼືຈັກສູບນໍ້າທີ່ມີຂະໜາດໃຫຍ່ 2 ຫົວງານໂດຍຫົວປໍ້ານໍ້າສາມາດດູດນໍ້າຈາກແມ່ນໍ້າຂອງຂຶ້ນຫົດເນື້ອທີ່ທໍາການຜະລິດຊຸດໜຶ່ງສາມາດດູດໄດ້ 710 ລົດຕໍ່ວິນາທີຊຶ່ງເຄື່ອງດູດນໍ້າທັງ 2 ຫົວງານ ສາມາດດູດນໍ້າໄດ້ສູງສຸດເຖິງ 2.130 ລິດຕໍ່ວິນາທີ, ສາມາດຫົດເນື້ອທີ່ໄດ້ທັງໝົດ 877 ເຮັກຕາ ພາຍຫຼັງທີ່ສຳເລັດການກໍ່ສ້າງຊົນລະປະທານບ້ານຄັນທ່າຈານແຫ່ງນີ້ຈະມີປະຊາຊົນຈຳນວນ 2 ບ້ານ ທີ່ໃຊ້ນໍ້າເຂົ້າໃນການຜະລິດກະສິກໍາຄື: ບ້ານຄັນທ່າຈານສາມາດນຳໃຊ້ເຂົ້າໃນການຜະລິດເຂົ້ານາປີໃນເນື້ອທີ່ 686,5 ເຮັກຕາ ແລະບ້ານດອນຖໍ້າເງິນມີເນື້ອທີ່ຫົດໄດ້ 76,1 ເຮັກຕາ.

-----------------

ໜັງສືພິມເສດຖະກິດ-ສັງຄົມ

แชร์