ທນບ ສາຂາຫຼວງນໍ້າທາເຂົ້າເຖີງ 3 ພັນກວ່າຄອບຄົວທຸກຍາກ

  ວັນທີ 20 ພຶດສະພາ 2020 ທີ່ທະນາຄານນະໂຍບາຍສາຂາແຂວງຫຼວງນໍ້າທາ ໄດ້ຈັດກອງປະຊຸມໃຫ່ຍຄັ້ງທີ II ຂອງໜວ່ຍພັກທະນາຄານນະໂຍບາຍສາຂາແຂວງຫຼວງນໍ້າທາ ພາຍໃຕ້ການເປັນປະທານສະຫາຍ ສົມເພັດ ມ້າວມະລາ ເລຂາໜ່ວຍພັກຫົວໜ້າທະນາຄານນະໂຍບາຍສາຂາແຂວງຫຼວງນໍ້າທາ, ເຂົ້າຮ່ວມໂດຍສະຫາຍ ຄໍາຟອງ ອີນມະນີ ກຳມະການປະຈໍາພັກແຂວງປະທານກວດກາພັກຫົວໜ້າອົງການກວດກາລັດຂັ້ນແຂວງ, ມີສະຫາຍ ໂພຕະມີ ພຸດທະວົງ ເລຂາຄະນະພັກຮາກຖານ ຫົວໜ້າສາຂາທະນາຄານແຫ່ງ ສປປ ລາວ, ພາກເໜືອແຂວງອຸດົມໄຊ, ແຂກຖືກເຊີນ, ຄະນະເລຂາໜ່ວຍພັກທະນາຄານອ້ອມຂ້າງ, ຕະຫຼອດຮອດສະມາຊິກພັກພາຍ ໃນໜ່ວຍເຂົ້າຮ່ວມ.
  ສະຫາຍ ສີຟອງ ແກ້ວກົງຕາ ຮອງເລຂາໜ່ວຍພັກຮອງຫົວໜ້າທະນາຄານນະໂຍບາຍສາຂາແຂວງຫຼວງນໍ້າທາ,ໄດ້ຜ່ານບົດລາຍງານການເມືອງ ແລະທິດທາງແຜນ ການ 5 ປີ ຕໍ່ໜ້າ, ໜ່ວຍພັກທະນາຄານນະໂຍບາຍສາຂາແຂວງຫຼວງນໍ້າທາ, ເປັນໜ່ວຍພັກເອກະລາດ, ພາຍໃຕ້ການຊີ້ນໍາໆພາໂດຍກົງຂອງຄະນະປະຈໍາພັກແຂວງທາງດ້ານການເມືອງແນວຄິດ ແລະການຈັດຕັ້ງ, ມີພາລະບົດບາດນໍາເອົາແຫຼ່ງທຶນສິນເຊື່ອຈາກທະນາຄານແຫ່ງ ສປປ ລາວ ໃນອັດຕາດອກເບ້ຍຕໍ່າເພື່ອສຸມໃສ່ປ່ອຍສິນເຊື່ອໃນຂົງເຂດເມືອງທີ່ທຸກຍາກ, ຈຸດສຸມ, ບ້ານ 3 ສ້າງ, ຕາມໂຄງການຂອງແຂວງ,ເມືອງທີ່ຂຶ້ນແຜນຮັບຮອງແຕ່ລະປີ,ເພື່ອແນໃສ່ປະກອບສ່ວນແກ້ໄຂຄວາມທຸກຍາກ, ສ້າງອາຊີບ, ຊຸກຍູ້ຜະລິດຕະພັນສິນຄ້າເພື່ອສົ່ງອອກເຮັດໃຫ້ມີລາຍຮັບໝັ້ນຄົງສາມາດແກ້ໄຂຊີວິດການເປັນຢູ່ໃຫ້ດີຂຶ້ນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
  ໜ່ວຍພັກທະນາຄານນະໂຍບາຍສາຂາແຂວງຫຼວງນໍ້າທາ ມີສະມາຊິກພັກທັງ 16 ສະຫາຍ, ຍິງ 7 ສະຫາຍ, ປະກອບມີຄະນະໜ່ວຍພັກ 3 ສະຫາຍ, ທະນາຄານນະໂຍບາຍໄດ້ປ່ອຍເງິນກູ້ເຂົ້າໃນເປົ້າໝາຍປູກຝັງ ແລະລ້ຽງສັດ,ຫັດຖະກຳຈັກສານ ແລະອຸປະກອນການຜະລິດທົ່ວສາຂາຮັບແຫຼ່ງທຶນແຕ່ປີ 2019 ຈໍານວນ 290,9 5 ຕື້ກີບ, ສະເພາະແຂວງຫຼວງນໍ້າທາ ຈໍານວນ 162,03 ຕື້ກີບ, ກວມເອົາ 55,7% ຂອງແຫຼ່ງທຶນ, ທົ່ວສາຂາປ່ອຍໄດ້ 221,98 ຕື້ກີບ, ປະຕິບັດໄດ້ 76, 3%, ປະຊາຊົນເຂົ້າເຖິງສິນເຊື່ອຈໍານວນ 2 ແຂວງ, 10 ເມືອງ, 310 ບ້ານ, ກວມເອົາ 86, 11% ບ້ານທຸກຍາກ 110 ບ້ານ, ກວມເອົາ 89, 47 % ແລະມີຈໍານວນກຸ່ມ 3.405 ກຸ່ມ, ມີຈໍານວນຄອບຄົວ 18.483, ກວມເອົາ 63, 53 % ຂອງຄອບຄົວທັງໝົດ,ຄອບຄົວທຸກຍາກ 3.159 ຄອບຄົວ, ກວມເອົາ 60,85% ຂອງຄອບຄົວທຸກຍາກທັງໝົດ.
  ທິດທາງແຜນການ 5 ປີ ແຕ່ປີ 2020 ຫາ 2024 ຈະໄດ້ສືບຕໍ່ສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານລັດຖະກອນສືບຕໍ່ປ່ອຍສິນເຊື່ອອັດຕາດອກເບ້ຍຕໍ່າຂອງລັດຖະບານມາສຸມໃສ່ປອ່ຍເງິນກູ້ໃຫ້ບັນດາເມືອງເປົ້າໝາຍທຸກຍາກ, ບ້ານ 3 ສ້າງ ແລະຈຸດສຸມຂອງລັດ, ກໍ່ຄືແຜນແກ້ໄຂຄວາມທຸກຍາກຂອງເມືອງຂອງແຂວງທີ່ໄດ້ກຳນົດໄວ້ແຕ່ລະປີໃຫ້ເພີ່ມຂຶ້ນ 5-10% ຕໍ່ປີ.


  ກອງປະຊຸມຍັງໄດ້ປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ, ໃນກອງປະຊຸມເຫັນດີເປັນເອກະສັນປ່ອນໄດ້ສະ ຫາຍ ສີຟອງ ແກ້ວກົງຕາ ເປັນເລຂາໜ່ວຍພັກຊຸດໃໝ່ພ້ອມດ້ວຍຄະນະ 2 ສະຫາຍ, ພ້ອມນັ້ນຍັງໄດ້ປ່ອນບັດຄັດເລືອກເອົາຜູ້ແທນສົມບູນເຂົ້າຮ່ວມກອງປະຊຸມໃຫ່ຍ ຄັ້ງທີ 8 ຂອງອົງຄະນະພັກແຂວງໆຫຼວງນໍ້າທາ 1 ສະຫາຍ.

___________

ຂຽນໂດຍ: ມຸນຕີ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์