ຄະນະພັກຮາກຖານ ສຸມໃສ່ສ້າງ ທຄຕລ ເປັນທະນາຄານແຖວໜ້າຢູ່ລາວ

 ກອງປະຊຸມໃຫຍ່ສະມາຊິກພັກຄັ້ງທີ IV ຂອງຄະນະພັກຮາກຖານທະນາຄານການຄ້າຕ່າງປະເທດລາວມະຫາຊົນ (ທຄຕລ) ໄດ້ສໍາເລັດລົງດ້ວຍໝາກຜົນອັນຈົບງາມໃນວັນທີ 16 ພຶດສະພາ 2020 ທີ່ສະໂມສອນສະຖາບັນການທະນາຄານນະຄອນຫຼວງວຽງຈັນ ພາຍໃຕ້ການເປັນປະທານຂອງສະຫາຍ ພູຂົງ ຈັນທະຈັກ ຄະນະພັກທະນາຄານແຫ່ງ ສປປ ລາວ (ທຫລ), ເລຂາຄະນະພັກຮາກຖານ-ຜູ້ອໍານວຍການ ທຄຕລ ແລະໂດຍການໃຫ້ກຽດເຂົ້າຮ່ວມຂອງສະຫາຍ ສອນໄຊ ສິດພະໄຊ ກໍາມະ ການສໍາຮອງສູນກາງພັກ, ເລຂາຄະນະພັກ-ຜູ້ວ່າການ ທຫລ; ພ້ອມນີ້, ກໍ່ມີສະຫາຍ ພານຸສັກ ແກ່ນວົງພະຈັນ ຄະນະພັກ ທຫລ, ຫົວໜ້າກົມຈັດຕັ້ງ ແລະພະນັກ ງານ ທຫລ; ບັນດາສະຫາຍຄະນະພັກຮາກຖານ-ຄະນະໜ່ວຍພັກທີ່ຂຶ້ນກັບອົງຄະນະພັກ ທຫລ, ຜູ້ແທນທົ່ວຄະນະພັກຮາກຖານ ແລະ 3 ອົງການຈັດຕັ້ງຈັດຕັ້ງມະ ຫາຊົນ ທຄຕລ ເຂົ້າຮ່ວມ.
 ກອງປະຊຸມໄດ້ພ້ອມກັນຄົ້ນຄວ້າ ແລະຮັບຮອງເອົາຮ່າງລາຍງານການເມືອງຂອງຄະນະພັກຮາກຖານ ທຄຕລ ທີ່ສະເໜີໂດຍສະຫາຍ ສຸພັກ ຖິ່ນໄຊພອນ ຮອງເລຂາຄະ ນະພັກຮາກຖານ ທຄຕລ ທີ່ໄດ້ສັງເກດຕີລາຄາຜົນງານໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຕະຫຼອດໄລຍະ 5 ປີແຫ່ງການຊີ້ນໍາ-ນໍາພາ ຊຶ່ງຢູ່ໃນເງື່ອນໄຂສະພາບແວດລ້ອມພາຍໃນ ແລະຕ່າງປະເທດມີການຜັນແປໂດຍມີການແຂ່ງຂັນຂອງບັນດາທະນາຄານພາຍໃນປະເທດນັບມື້ເພີ່ມຂຶ້ນ, ພະຍາດລະບາດ, ການຜັນຜວນຂອງອັດຕາແລກປ່ຽນ ແລະອັດຕາດອກເບ້ຍ. ແຕ່ພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງຄະນະພັກ-ຄະນະຜູ້ວ່າ ທຫລ, ຄະນະພັກຮາກຖານ ທຄຕລ ໄດ້ມີຄວາມພະຍາຍາມປຸກລະດົມກໍາລັງແຮງພາຍໃນເພື່ອຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກ ທຫລ ໂດຍສະເພາະສຸມໃສ່ຈັດຕັ້ງປະຕິບັດມະ ຕິກອງປະຊຸມໃຫຍ່ຂອງຕົນ ແລະ ແຜນຍຸດທະສາດໄລຍະຍາວຂອງ ທຄຕລ ດ້ວຍຜົນສໍາເລັດຫຼາຍດ້ານ.
  ຄະນະພັກຮາກຖານຖືເອົາການສຶກສາອົບຮົມການເມືອງ-ແນວຄິດເປັນບັນຫາກົກ ແລະຕິດພັນກັບທຸກການເຄື່ອນໄຫວວຽກງານດ້ວຍຫຼາຍຮູບການທີ່ເໝາະສົມເຮັດໃຫ້ສະມາຊິກພັກ-ພະນັກງານກຳໄດ້ແນວທາງນະໂຍບາຍຂອງພັກ ແລະຖືເອົາລະບອບສ່ອງແສງສາຍງານ, ກໍາສະພາບແຕ່ລະບັນຫາໃຫ້ຈະແຈ້ງເປັນເນື້ອໃນສໍາຄັນໃນການດໍາເນີນຊີວິດການເມືອງພາຍໃນພັກ ແລະອົງການຈັດຕັ້ງມະຫາຊົນເພື່ອສໍາຫຼວດກວດກາ,ຕໍາໜິກໍ່ສ້າງຊ່ວຍເຫຼືອກັນ. ຈາກການປະຕິບັດຄືດັ່ງກ່າວເຮັດໃຫ້ສະພາບແນວຄິດຂອງຖັນແຖວສະມາຊິກພັກ - ພະນັກງານແຕ່ລະຂັ້ນມີແນວຄິດອຸ່ນອ່ຽງທຸ່ນທ່ຽງ, ມີຄວາມເປັນເອກະພາບຕໍ່ກັບແນວທາງການບໍລິຫານງານຂອງຂັ້ນເທິງ, ມີຄວາມຫ້າວຫັນ, ສຸມກໍາລັງເຫື່ອແຮງ, ສະຕິປັນຍາເຂົ້າໃນການປະຕິບັດໜ້າທີ່ທີ່ໄດ້ຮັບມອບໝາຍເປັນຢ່າງດີ.
  ຄະນະພັກຮາກຖານໄດ້ນໍາພາວຽກງານວິຊາສະເພາະໂດຍເອົາໃຈໃສ່ລະດົມທຶນໃຫ້ເພີ່ມຂຶ້ນຢ່າງຕໍ່ເນື່ອງໃນເເຕ່ລະປີ, ພັດທະນາປັບປຸງຂອດວຽກງານບໍລິການ, ລະບົບເຕັກນິກທີ່ທັນສະໄໝ, ພັດທະນາຮູບແບບຂອງຜະລິດຕະພັນເງິນຝາກໃຫ້ມີຄວາມຫຼາກຫຼາຍເນັ້ນໃສ່ສິດຜົນປະໂຫຍດຂອງລູກຄ້າເປັນຫຼັກ, ປັບປຸງບັນດາສະຖານທີ່ບໍລິການເພື່ອອໍານວຍຄວາມສະດວກໃນການບໍລິການລູກຄ້າແນໃສ່ໃຫ້ມີຄວາມເປັນເອກະພາບໃນທົ່ວລະບົບ, ພ້ອມນີ້ໄດ້ຈັດສັນປ່ອງບໍລິການສໍາລັບລູກຄ້າທົ່ວໄປ, ພາກສ່ວນລັດ, ອົງການຈັດຕັ້ງສາກົນ, ລຸກຄ້າລາຍໃຫຍ່ ແລະສ້າງຕັ້ງທີມງານການຕະຫຼາດໃນທົ່ວລະບົບເພື່ອລົງເດີນຕະຫຼາດບໍລິການລູກຄ້າກັບທີ່ເປັນການລະດົມທຶນ ແລະຂາຍບັນດາຜະລິດຕະພັນຕ່າງໆທີ່ຕິດພັນໄປພ້ອມໆ ກັນລວມທັງເປີດໃຫ້ບໍລິການລູກຄ້າໃນວັນພັກລັດຖະການ (ເສົາ-ທິດ). ຜ່ານການຈັດຕັ້ງປະຕິບັດຄືດັ່ງກ່າວເຮັດໃຫ້ຍອດເງິນຝາກຂອງ ທຄຕລ ເພີ່ມຂຶ້ນໃນທຸກໆປີຢ່າງຕໍ່ເນື່ອງຊຶ່ງແຕ່ທ້າຍ ປີ 2014 ມີຈໍານວນ 21.756 ຕື້ກີບ ມາຮອດທ້າຍປີ 2019 ເພີ່ມຂຶ້ນ 84% ແລະ ໃນເເຕ່ລະ ປີສາມາດປະຕິບັດໄດ້ລື່ນແຜນການສະເລຍ 7%;
  ຄະນະພັກຮາກຖານສຸມໃສ່ພັດທະນາສິນເຊື່ອຫັນເປັນທັນສະໄໝຊຶ່ງໄດ້ສ້າງຕັ້ງໂຄງການ Loan Origination System ແລະ Credit Rating ເພື່ອພັດ ທະນາຂະບວນການສິນເຊື່ອໃຫ້ມີປະສິດທິພາບສູງຂຶ້ນ, ດໍາເນີນການຄຸ້ມຄອງຄວາມສ່ຽງຕ່າງໆ, ເພີ່ມປະສິດທິພາບໃນການເຮັດວຽກຂອງພະນັກງານສິນເຊື່ອທັງເປັນເງື່ອນໄຂໃນການສ້າງຂະບວນການອະນຸມັດສິນເຊື່ອໃຫ້ສອດຄ່ອງກັບສາກົນຕາມຫຼັກການບາເຊວ 2; ການຂະຫຍາຍສິນເຊື່ອໃນແຕ່ລະປີເຫັນວ່າມີທ່າກ້າວເພີ່ມຂຶ້ນ ໂດຍໄດ້ປ່ອຍໃນຂະແໜງການທີ່ສໍາຄັນໂດຍສອດຄ່ອງກັບທິດທາງນະໂຍບາຍຂອງພັກ ແລະລັດຖະບານກໍ່ຄືຄວາມຮຽກຮ້ອງຕ້ອງການຂອງແຫຼ່ງທຶນໃນການພັດທະນາທຸລະ ກິດ, ການລົງທຶນ ແລະການແກ້ຊີວິດການເປັນຢູ່ຂອງປະຊາຊົນລາວ, ຊາວຄ້າຂາຍ ແລະຜູ້ປະກອບການຕາມຫົວໜ່ວຍການຜະລິດ, ທຸລະກິດຕ່າງໆ.
  ພັດທະນາລະບົບໄອທີຖືເປັນວຽກງານທີ່ສໍາຄັນປຽບດັ່ງສາຍເລືອດໃນການດໍາເນີນທຸລະກິດໂດຍພັດທະນາຫັນເປັນທັນສະໄໝໃຫ້ໄດ້ມາດຕະຖານໃກ້ຄຽງກັບສາກົນຮັບ ປະກັນລະບົບການຈັດເກັບຂໍ້ມູນ ແລະປ້ອງກັນຄວາມສ່ຽງຕ່າງໆ, ເພື່ອສ້າງຄວາມເຊື່ອໝັ້ນໃຫ້ແກ່ລູກຄ້າໂດຍການສ້າງສູນສໍາຮອງຂໍ້ມູນຢູ່ພາຍໃນ ແລະ ນອກສະຖານທີ່ໃຫ້ເປັນລະບົບຄົບຊຸດ, ເຊື່ອມໂຍງດ້ວຍລະບົບຄອມພິວເຕີແບບ Real time ເພື່ອຮັບປະກັນດ້ານຂໍ້ມູນໃຫ້ມີຄວາມປອດໄພ, ການບໍລິການລູກຄ້າໃຫ້ມີຄວາມສະຖຽນ, ສະດວກວ່ອງໄວ, ຖືກຕ້ອງຊັດເຈນສາມາດກວດສອບໄດ້; ນອກນັ້ນ, ທຄຕລ ໄດ້ຍົກລະດັບລະບົບໂປຼແກຼມລະບົບ Oracle Flex cube ທີ່ນໍາໃຊ້ຢູ່ໃນປະຈຸບັນມາເປັນລະບົບ IBS Core Banking ໃໝ່ທີ່ມີຄວາມທັນສະໄໝ, ມີປະສິດທິພາບໃນການໃຊ້ງານໄດ້ດີ ແລະສາມາດຮອງຮັບການຂະຫຍາຍຕົວທີ່ຍືນຍົງຂອງ ທຄຕລ ໃນອະ ນາຄົດເຊິ່ງປະຈຸບັນນີ້ພວມຢູ່ໃນໄລຍະດໍາເນີນໂຄງການ.
  ຄະນະພັກຮາກຖານໄດ້ຍົກລະດັບຄວາມປອດໄພທາງດ້ານເຄືອຄ່າຍລະບົບຄອມພິວເຕີໃຫ້ມີຄວາມເຂັ້ມແຂງໄດ້ເປັນທ່າແຮງໃນການສ້າງນະວັດຕະກໍາໃໝ່ດ້ານການບໍລິ ການ, ນໍາໃຊ້ໃນການພັດທະນາບັນດາຜະລິດຕະພັນໃໝ່ເພື່ອຕອບໂຈດການນໍາໃຊ້ທາງການເງິນໂດຍສະເພາະການຊໍາລະສະສາງຜ່ານອີເລັກໂທຼນິກທີ່ສ້າງຄວາມສະດວກສະບາຍ, ສາມາດກວດສອບໄດ້ບົນພຶ້ນຖານຄວາມປອດໄພໄດ້ມາດຖານສາກົນເຊັ່ນ: ບັນດາໂຄງການຮ່ວມມືກັບພາກລັດຖະບານ, ເອກະຊົນທັງພາຍໃນ-ຕ່າງປະເທດຕ່າງໆ ຫຼາຍໂຄງການປະກອບສ່ວນຊ່ວຍໃນການເກັບລາຍຮັບປະມານ, ສ້າງຄວາມສະດວກໃນການບໍລິຫານຂອງພາກລັດໄດ້ເປັນຢ່າງດີ, ຫຼຸດຜ່ອນການນໍາໃຊ້ເງິນສົດ ແລະອໍານວຍຄວາມສະດວກທາງການເງິນໃຫ້ກັບລູກຄ້າໃຫ້ມີຄວາມທັນສະໄໝ, ວ່ອງໄວ ແລະປອດໄພ.
  ຜ່ານການຊີ້ນໍາ-ນໍາພາໄລຍະ 5 ປີຜ່ານມາຂອງຄະນະພັກຮາກຖານ ແລະຄວາມບຸກບືນຫ້າວຫັນຂອງພະນັກງານ-ສະມາຊິກພັກເຮັດໃຫ້ ທຄຕລ ມີການພັດທະນາ, ຂະຫຍາຍຕົວຮອບດ້ານ ແລະກາຍເປັນທະນາຄານທຸລະກິດລັດແຖວໜ້າຄື: ມີຍອດຊັບສິນເພີ່ມຂຶ້ນ 98% ເມື່ອທຽບໃສ່ທ້າຍປີ 2014 ແລະຜົນການດໍາເນີນທຸລະກິດໃນແຕ່ລະປີເພີ່ມຂຶ້ນສະເລຍ 18%. ຂະນະດຽວກັນໄດ້ເກີດມີຂະບວນການທີ່ພົ້ນເດັ່ນຫຼາຍດ້ານເພື່ອຊຸກຍູ້ວຽກງານຕ່າງໆພາຍໃນ ທຄຕລ ໄດ້ຮັບຜົນສໍາເລັດຫຼາຍດ້ານ ເປັນຕົ້ນຕົວເລກຜົນການດໍາເນີນທຸລະກິດໃນແຕ່ລະປີ, ການພັດທະນາຜະລິດຕະພັນທີ່ທັນສະໄໝເພື່ອຮັບໃຊ້ສັງຄົມ; ຍ້ອນການປັບປຸງ ແລະຜົນສໍາເລັດອັນດີເດັ່ນຄືດັ່ງກ່າວ, ທຄຕລ ຈຶ່ງໄດ້ຮັບຫຼຽນໄຊອິດສະຫຼະຊັ້ນ II, ຮັບລາງວັນຕ່າງໆຈາກວາລະສານ ແລະທະນາຄານຕ່າງປະເທດ 16 ລາງວັນ, ຮັບການຢັ້ງຢືນເປັນໜ່ວຍພັກປອດໃສ, ເຂັ້ມ ແຂງ, ໜັກແໜ້ນກວມ 50% ຂອງຈໍານວນໜ່ວຍພັກທີ່ຂຶ້ນກັບ, ບັນດາສະມາຊິກພັກ-ພະນັກງານຮັບການຍ້ອງຍໍທັງໝົດ 3.534 ເທື່ອຄົນ; ພ້ອມກັນນັ້ນ, ກອງ ປະຊຸມ ຍັງໄດ້ຕີລາຄາບັນດາສາເຫດທີ່ພາໃຫ້ມີດ້ານດີ-ດ້ານອ່ອນ ແລະບົດຮຽນທີ່ຖອດຖອນໄດ້, ພ້ອມທັງກໍານົດທິດທາງແຜນການ ແລະຄາດໝາຍສູ້ຊົນຂອງຄະນະພັກຮາກຖານໃນ 5 ປີຕໍ່ໜ້າ.
  ກອງປະຊຸມໄດ້ຮັບຟັງການຜ່ານຮ່າງບົດສໍາຫຼວດການນໍາພາລວມຂອງຄະນະພັກຮາກຖານທີ່ສະເໜີໂດຍສະຫາຍ ພູຂົງ ຈັນທະຈັກ ເລຂາຄະນະພັກຮາກຖານ ທຄຕລ ຊຶ່ງຕີລາຄາການນໍາພາລວມຂອງຄະນະພັກຮາກຖານທີ່ຍາດໄດ້ຜົນສໍາເລັດໃນຫຼາຍດ້ານເປັນຕົ້ນຮັກສາໄດ້ຄວາມສາມັກຄີເປັນເອກະພາບພາຍໃນຄະນະພັກຮາກຖານກໍ່ຄືສະມາຊິກພັກທັງໝົດຢ່າງແໜ້ນແຟ້ນ, ເສີມຂະຫຍາຍບົດຮຽນ ແລະ ຄວາມສາມາດຢ່າງມີຫົວຄິດປະດິດສ້າງໃນການນຳພາຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ໃນແຕ່ລະໄລຍະໃຫ້ປະກົດຜົນເປັນຈິງ ແລະໄດ້ຮັບຜົນສຳເລັດເປັນກ້າວໆມາ.
  ກອງປະຊຸມຍັງພ້ອມກັນໃຊ້ສິດປະຊາທິປະໄຕຂອງຕົນຢ່າງເຕັມສ່ວນເລືອກເອົາຄະນະພັກຮາກຖານ ທຄຕລ ສະໄໝທີ IV ປະກອບດ້ວຍ 7 ສະຫາຍ ເພື່ອສືບຕໍ່ເປັນ ແກນນໍາໃນການຊີ້ນໍາ-ນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກຄັ້ງທີ IV ຄະນະພັກຮາກຖານ ທຄຕລ ໂດຍເລືອກເອົາສະຫາຍ ພູຂົງ ຈັນທະຈັກ ເປັນເລຂາຄະນະພັກຮາກຖານ ທຄຕລ, ສະຫາຍ ສຸພັກ ຖິ່ນໄຊພອນ ເປັນຮອງເລຂາ ແລະເປັນປະທານຄະນະກວດກາ, ສະຫາຍ ກົງສັກ ສຸພອນສີ ເປັນຮອງ ປະທານ ແລະສະຫາຍ ສົມປະສົງ ໂພທິສານ ເປັນຄະນະກວດກາ. ພ້ອມນີ້ຍັງເລືອກເອົາຜູ້ແທນເຂົ້າຮ່ວມກອງປະຊຸມໃຫຍ່ຄັ້ງທີ IV ຂອງອົງຄະນະພັກ ທຫລ.


 ສະຫາຍເລຂາຄະນະພັກ ທຫລ ໄດ້ສະແດງຄວາມຍ້ອງຍໍ,ຊົມເຊີຍຕໍ່ຄະນະພັກຮາກຖານຊຸດເກົ່າທີ່ໄດ້ຊີ້ນໍາ-ນໍາພາສະມາຊິກພັກ,ພະນັກງານປະຕິບັດໜ້າທີ່ການເມືອງສາມາດຍາດໄດ້ຜົນງານໃນຫຼາຍໆ ດ້ານ ແລະມີທິດຊີ້ນໍາໃນແຕ່ລະວຽກງານຢ່າງພາວະວິໄສ ແລະມີຈຸດສຸມ; ນອກຈາກນີ້, ສະຫາຍຍັງມີຄວາມເຊື່ອໝັ້ນວ່າ: ໃນຕໍ່ໜ້າຄະນະພັກຮາກຖານຊຸດໃໝ່ຈະນໍາພາຖັນແຖວສະມາຊິກພັກ-ພະນັກງານສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນໃຫ້ບັນລຸຜົນສໍາເລັດ ແລະ ຍາດໄດ້ໝາກຜົນອັນໃໝ່ທີ່ຍິ່ງໃຫຍ່ກວ່າເກົ່າ.

______________

ຂຽນໂດຍ: ຣັດສະໝີ ດວງສັດຈະ     

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์