ເຈົ້າໝ້າທີ່ທຳລາຍສວນຝິ່ນ 24,4 ເຮັກຕາຢູ່ 3 ບ້ານ ເມືອງວຽງພູຄາ

 ເພື່ອປະຕິບັດຄຳສັ່ງຂອງທ່ານເຈົ້າແຂວງແຂວງຫຼວງນ້ຳທາສະບັບເລກທີ 01/ຈຂ ລົງວັນທີ 16 ມີນາ 2010 ວ່າດ້ວຍການກວດກາ, ຄວບຄຸ້ມ ແລະສະກັດກັ້ນການລັກລອບປູກຝິ່ນ, ສູບຝິ່ນຄືນໃໝ່ ແລະການລັກລອບຊື້-ຂາຍຢາເສບຕິດປະເພດຕ່າງໆພາຍໃນ ແຂວງຫຼວງນ້ຳທາ ໃນທ້າຍເດືອນມັງກອນຜ່ານມາທາງກອງບັນຊາການ ປກສ ເມືອງວຽງພູຄາ ໄດ້ລົງສົມທົບກັບພະແນກກວດກາ ແລະ ຄວບຄຸມສີ່ງເສບຕິດ (ກຄສ) ປກສ ແຂວງ,ອົງການຈັດຕັ້ງທຸກພາກ ສ່ວນ, ອຳນາດການປົກຄອງບ້ານລົງຈັດຕັ້ງ ແລະທຳລາຍສວນຝິ່ນທີ່ປະຊາຊົນລັກລອບປູກຢູ່ຂອບເຂດເມືອງວຽງພູຄາ ໂດຍການນຳພາຂອງທ່ານ ພັທ ແອ່ ພີມມະວົງ ຄະນະພັກ, ຮອງຫົວໜ້າກອງບັນຊາການ ປກສ ເມືອງວຽງພູຄາ, ສະຫາຍ ພັຕ ດາວທອງ ມະນີເພັດ ຮອງຫົວໜ້າພະແນກ ກຄສ ປກສ ແຂວງມີຄະນະກອງບັນຊາການ ປກຊ-ປກສ ເມືອງ, ອົງການຈັດຕັ້ງຂອງບ້ານເຂົ້າຮ່ວມ.

  ສຳລັບການລົງປະຕິບັດໜ້າທີ່ທຳລາຍສວນຝິ່ນຄັ້ງນີ້ລວມມີ 3 ບ້ານຄື: ບ້ານຫ້ວຍຫົກ, ບ້ານທົ່ງລາດ ແລະບ້ານນ້ຳວາງໃນນີ້ໄດ້ແບ່ງອອກເປັນ 4 ທີມງານຄື: ເຂດບ້ານນ້ຳວາງມີຈຳນວນ 2 ເຂດແບ່ງອອກເປັນ 2 ທີມງານ, ເຂດບ້ານທົ່ງລາດ ແລະບ້ານຫ້ວຍຫົກແບ່ງອອກເປັນ 2 ທີມງານ. ຜ່ານການລົງຈັດຕັ້ງປະຕິບັດທຳລາຍສວນຝິ່ນໃນຄັ້ງນີ້ສາມາດທຳລາຍ ແລະສັງລວມເນື້ອທີ່ໄດ້ບ້ານນ້ຳວາງມີສວນຝິ່ນຈຳນວນ 30 ຈຸດ ມີເນື້ອທີ  20,6 ເຮັກຕາ, ບ້ານທົ່ງລາດມີສວນຝິ່ນຈຳນວນ 1 ຈຸດ, ມີເນື້ອທີ່ 1,2 ເຮັກຕາ ຄອບຄົວປູກຝິ່ນ 4 ຄອບຄົວ, ບ້ານຫ້ວຍຫົກມີສວນຝິ່ນຈຳນວນ 10 ຈຸດ, ມີເນື້ອທີ່ສວນຝິ່ນ 2,6 ເຮັກຕາ, ຄອບຄົວປູກຝິ່ນ 11 ຄອບຄົວ ຊຶ່ງຝິ່ນດັ່ງກ່າວແມ່ນໄດ້ທຳລາຍຖິ້ມທັງໝົດ, ລວມແລ້ວເນື້ອທີ່ສວນຝິ່ນທີ່ທຳລາຍຖິ້ມ ທັງໝົດ 3 ບ້ານ, ມີ 15 ຄອບຄົວ, ມີສວນຝິ່ນຈຳນວນ 41 ຈຸດ ແລະ ມີເນື້ອທີ່ 24,4 ເຮັກຕາ, ເນື້ອທີ່ສວນຝິ່ນດັ່ງກ່າວແມ່ນໄດ້ທຳລາຍຖິ້ມ 100%  ຕໍ່ກັບຄອບຄົວຜູ້ປູກຝິ່ນທາງຄະນະຮັບຜິດຊອບແມ່ນຈະໄດ້ສືກສາອົບຮົມກ່າວເຕືອນຕໍ່ຜູ້ລະເມີດ ແລະສ້າງບົດບັນທຶກໄວ້ເປັນຫຼັກຖານ.

  ພ້ອມກັນນີ້ຍັງຈະໄດ້ສືບຕໍ່ລົງກວດກາ ແລະທຳລາຍສວນຝິ່ນຢູ່ 3 ບ້ານຄື: ບ້ານທ່າຫຼວງ, ບ້ານນ້ຳຕະແຫຼ່ງ ແລະ ບ້ານນ້ຳໂລະຕື່ມອີກ.  

แชร์