ໄຊຍະບູລີ ມີຜູ້ຕິດເຊື້ອໄຂ້ຍຸງ 63 ກໍລະນີ

ຕາມການໃຫ້ຂໍ້ມູນຈາກຂະແໜງຄວບຄຸມພະຍາດຕິດຕໍ່ພະແນກສາທາລະນະສຸກແຂວງໄຊຍະບູລີ ໃຫ້ຮູ້ວ່າ: ນັບແຕ່ວັນທີ 1 ມັງກອນຫາວັນທີ 12 ພຶດສະພາ 2020 ຢູ່ແຂວງໄຊຍະບູລີມີຜູ້ຕິດເຊື້ອໄຂ້ຍຸງລາຍແລ້ວທັງໝົດ 63 ກໍລະນີ ເກີດຂຶ້ນຢູ່ 2 ເມືອງ ແລະເສຍຊີວິດ 1 ກໍລະນີ; ໃນນັ້ນຢູ່ເມືອງໄຊຍະບູລີມີຜູ້ຕິດເຊື້ອໄຂ້ຍຸງລາຍ 46 ກໍລະນີຈໍານວນ 15 ບ້ານ, ເມືອງພຽງມີຜູ້ຕິດ ເຊື້ອໄຂ້ຍຸງລາຍ 17 ກໍລະນີ ໃນຈໍານວນ 3 ບ້ານ, ເສຍຊີວິດ 1 ກໍລະນີ.

ແຂວງໄຊຍະບູລີແມ່ນມີການເກີດພະຍາດໄຂ້ຍຸງລາຍ ຫຼືວ່າໄຂ້ເລືອດອອກເກືອບທຸກໆປີເຊັ່ນ: ໃນປີ 2019 ແຂວງໄຊຍະບູລີມີຜູ້ເປັນໄຂ້ເລືອດອອກທັງໝົດ 885ກໍລະນີໂດຍລວມພະຍາດໄຂ້ຍຸງລາຍຕິດຕໍ່ຈາກຄົນສູ່ຄົນ, ຍຸງລາຍກັດດູດເລືອດຄົນເຈັບທີ່ມີເຊື້ອໄຂ້ຍຸງແລ້ວກໍ່ໄປກັດຄົນດີເຮັດໃຫ້ຄົນດັ່ງກ່າວນັ້ນຕິດເຊື້ອໄຂ້ແລ້ວມີອາການສະ ແດງອອກໃນບໍ່ຊ້າ ແລະ ສາມາດແຜ່ລາມໃສ່ຄົນຕໍ່ໆ ໄປ, ເມື່ອຄົນເຮົາຖືກຍຸງລາຍທີ່ມີເຊື້ອພະຍາດໄຂ້ຍຸງກັດແລ້ວພາຍໃນ 4-5 ວັນກໍ່ຈະມີອາການສະແດງອອກເຊັ່ນ: ເຈັບຫົວ, ໄຂ້ຄີງຮ້ອນຕະຫຼອດ, ປວດຕາມຕົນຕົວ, ປວດຂໍ່ກະດູກ, ປວດຂະໂມ່ງຕາ, ປວດຕາມກ້າມຊີ້ນ, ໜ້າຕາແດງ,ມີຈຸດແດງຕາມຜິວໜັງປາກົດຢູ່ໜ້າເອິກ ແລະບ່ອນອື່ນໆ, ຖ້າຮຸນແຮງໄປກວ່ານັ້ນຈະມີອາການເລືອດດັງອອກ, ເລືອດອອກຕາມເຟັນແຂ້ວ ແລະ ມີເລືອດຊຶມຕາມຜິວໜັງຈະກ້າວໄປຫາອາການຄວາມດັນເລືອດຕໍ່າ, ຈະມີອາການຊ໊ອກໄດ້.

  ສະນັ້ນເພື່ອເປັນການຕອບໂຕ້ ແລະສະກັດກັ້ນບໍ່ໃຫ້ພະຍາດໄຂ້ເລືອດອອກແຜ່ລາມໄປສູ່ບັນດາເມືອງ ແລະ ບ້ານໃນທົ່ວແຂວງໄຊຍະບູລີອັນທີ່ຈະສົ່ງຜົນເສຍຫາຍຕໍ່ຊັບ ສິນ ແລະຊີວິດຂອງຄົນທາງການນໍາຂອງແຂວງຂອງເມືອງ ແລະພະແນກການທີ່ກ່ຽວຂ້ອງໄດ້ສົມທົບກັບອໍານາດການປົກຄອງບ້ານພໍ່ແມ່ ປະຊາຊົນສ້າງຂະບວນການອະນາໄມຕາມສະຖານທີ່ຮົກເຮື້ອອັນທີ່ຈະເປັນບ່ອນເພາະພັນແຜ່ເຊື້ອຂອງຍຸງລາຍໂດຍປະຕິບັດຕາມ 5 ປ ຄື: ປິດພາຊະນະທີ່ບັນຈຸນໍ້າໃນເຮືອນ ແລະນອກເຮືອນໄຫ, ຄຸ, ແອ່ງ, ຟຸຍເພື່ອບໍ່ໃຫ້ຍຸງລາຍມາໄຂ່ໃສ່, ປ່ຽນນໍ້າ ແລະຜັດຖູພາຊະນະຫ້ວຍຮ່ອງ, ຕີນຕູ້, ໂຖດອກໄມ້ 2 ຄັ້ງຕໍ່ທິດ, ປ່ອຍປາຫາງນົກຍຸງໃສ່ພາຊະນະທີ່ບັນຈຸນໍ້າເພື່ອໃຫ້ກິນໜອນນໍ້າຍຸງລາຍ, ປັບປຸງອະນາໄມບໍລິເວນທີ່ຢູ່ອາໄສທັງໃນ ແລະນອກເຮືອນໃຫ້ສະອາດໃນແຕ່ລະຄອບຄົວເພື່ອກໍາຈັດແຫຼ່ງແຜ່ພັນຂອງຍຸງລາຍເຊັ່ນ: ກະໂປະ, ກະ ປ໋ອງ,ຢາງຕີນລົດເກົ່າ, ຖາງຫຍ້າອ້ອມເຮືອນອາທິດລະ 1 ຄັ້ງ ໃນຂອບເຂດທີ່ຢູ່ອາໄສຂອງຕົນ, ປະຕິບັດ 5 ປ ໃຫ້ເປັນນິໄສປະຕິບັດເປັນປະຈໍາທຸກໆອາທິດແລະຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ,ສຸກສາລາໃກ້ບ້ານທ່ານ, ຖ້າບຸກຄົນໃນຄອບຄົວຊຸມຊົນຫາກເອົາໃຈໃສ່ປະກອບສ່ວນເປັນເຈົ້າການໃນການຮັກສາບໍ່ໃຫ້ມີແຫຼ່ງເພາະພັນຂະຫຍາຍພັນຂອງຍຸງລາຍ, ໃຫ້ຫຼຸດຜ່ອນຄວາມໜາແໜ້ນຂອງພາຫະນະນໍາເຊື້ອໂອກາດໃນການສົ່ງເຊື້ອປັດໄຈສ່ຽງໃນການລະບາດກໍ່ຈະຫຼຸດລົງ ຫຼືສາມາດຫຼີກລ່ຽງການເກີດລະ ບາດໄຂ້ຍຸງລາຍໄດ້.

______________

ຂຽນໂດຍ: ບຸນທີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์