ໂຄງການກໍ່ສ້າງລະບົບນໍ້າປະປາສຸຂະພິບານເມືອງສົບເບົາ ແຂວງຫົວພັນ ໄດ້ເລີ່ມລົງມືຈັດຕັ້ງປະຕິບັດມາແຕ່ທ້າຍເດືອນພືດສະພາ 2019 ຊຶ່ງແມ່ນພະແນກໂຍທາທິການ ແລະຂົນສົ່ງແຂວງຫົວພັນເປັນເຈົ້າຂອງໂຄງການ ແລະມອບຕໍ່ໃຫ້ບໍລິສັດ ພຸດປະເສີດ ເປັນຜູ້ຮັບເໜົາກໍ່ສ້າງໂດຍໄດ້ຮັບທຶນຊ່ວຍເຫຼືອລ້າຈາກທະນາຄານພັດທະ ນາອາຊີຈຳນວນ 11,7 ຕື້ກີບ, ຊຶ່ງມີກຳນົດເວລາການກໍ່ສ້າງແມ່ນ 18 ເດືອນ.

  ກິດຈະກໍາຫຼັກຂອງໂຄງການແມ່ນກໍ່ສ້າງອ່າງພັກນໍ້າ, ອ່າງກັ່ນຕອງນໍ້າ, ອ່າງກວນໄວ, ອ່າງຕົກຕະກອນ, ອ່າງເກັບນໍ້າໄວ້ລ້າງລະບົບໂຮງງານຜະລິດນໍ້າປະປາ, ເຮືອນປະສົມຫີນສົ້ມ, ຫ້ອງວິໄຈ 1 ຫຼັງ, ເຮືອນປະສົມຢາຂ້າເຊື້ອ 1 ຫຼັງ, ເຮືອນປໍ້າອ່າງນໍ້າສະອາດ 1 ຫຼັງ, ສ້າງລະບົບທໍ່ສົ່ງ, ທໍ່ແຈກ, ຕິດຕັ້ງລະບົບໝໍ້ແທກນໍ້າທັງໝົດມີປະມານ 624 ໜ່ວຍ, ຕິດຕັ້ງກັອກນໍ້າດັບເພີງຈຳນວນ 8 ໜ່ວຍ, ແຫຼ່ງນໍ້າທີ່ນໍາມາຜະລິດແມ່ນນໍ້າມ່າ ແລະຈະສາມາດຜະລິດນໍ້າໄດ້ 800 ແມັດກ້ອນຕໍ່ວັນ.

   ນອກຈາກນີ້ທາງໂຄງການຍັງໄດ້ສ້າງ ແລະຍົກລະດັບທາງດິນແດງຈຳນວນ 6 ເສັ້ນ ກວ້າງ 3 ແມັດເຄິ່ງ, ສ້າງຝາປິດຫ້ອງລະບາຍນໍ້າຍາວ 18 ແມັດ, ຮ່ອງເບຕົງເສີມເຫຼັກແບບເປີດຈຳນວນ 3 ເສັ້ນ ມີຄວາມຍາວ 752 ແມັດ, ຕິດຕັ້ງທໍ່ລອດທາງ 600 ແມັດ ພ້ອມຝາປິດ 3 ຈຸດ ກໍ່ສ້າງຫ້ອງລະບາຍນໍ້າອັນດັບສອງຫ້ວຍຮາວ ແລະຈຸດຕະຫຼາດເທສະບານເມືອງສົບເບົາມີຄວາມຍາວ 587 ກວ່າແມັດ,ພ້ອມທັງວາງທໍ່ລອດທາງ 2 ບ່ອນ,ສ້າງຫ້ອງນໍ້າສາທາລະນະແບບ 2 ຫ້ອງຈຳນວນ 7 ຫຼັງ.

  ການກໍ່ສ້າງມາເຖິງປະຈຸບັນແຕ່ລະໜ້າວຽກກໍ່ສ້າງສຳເລັດແລ້ວ 56%. ຄາດວ່າການກໍ່ສ້າງນໍ້າປະປາສຸຂະພິບານເມືອງສົບເບົາຈະໃຫ້ສຳເລັດໃນເດືອນພະຈິກ 2020 ນີ້, ເມື່ອສໍາເລັດ ແລ້ວຈະສາມາດສະໜອງນໍ້າໄດ້ 5 ບ້ານຄື: ບ້ານສົບເບົາ, ບ້ານເມືອງຮົ່ມ, ບ້ານຫາດສ້ານ, ບ້ານພຽງໄຊ ແລະບ້ານສົບລ້ອງເມືອງສົບເບົາໄດ້ຊົມໃຊ້ນໍ້າປະປາເຮັດໃຫ້ເຂົາເຈົ້າມີຊີວິດການເປັນຢູ່ທີ່ສະດວກດີຂຶ້ນກວ່າເກົ່າ.

______________

ຂຽນໂດຍ: ເຍ່ຍເຮີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์