ພົບເດັກນ້ອຍໄຂ້ອອກຕຸ່ມ 46 ຄົນ ຢູ່ບ້ານພູສິງ ເມືອງແບງ

  ປະຈຸບັນນີ້ທົ່ວແຂວງອຸດົມໄຊພວມສຸມໃສ່ການປ້ອງກັນການລະບາດຂອງພະຍາດຕາມລະດູການໂດຍສະເພາະແມ່ນພະຍາດໄຂ້ຍຸງລາຍ, ໝາກແດງ ແລະອື່ນໆ.

  ສະເພາະຢູ່ເມືອງແບງ ແຂວງອຸດົມໄຊ ກໍໄດ້ຫ້າງຫາກະກຽມຄວາມພ້ອມໃນທຸກດ້ານໂດຍນໍາເອົາເນື້ອໃນແຈ້ງການຂອງແຂວງເລກທີ 439 ມາຈັດຕັ້ງຜັນຂະຫຍາຍເປັນອັນລະອຽດຢູ່ຂັ້ນເມືອງ, ກຸ່ມບ້ານ ແລະບັນດາບ້ານໃນຈຳນວນ 57 ບ້ານໃນທົ່ວເມືອງແບງ ພ້ອມທັງໂຄສະນາເຜີຍແຜ່ອອກທຸກຊ່ອງທາງຕາມເງື່ອນໄຂເພື່ອເຮັດໃຫ້ປະຊາຊົນຮັບຮູ້, ເຂົ້າໃຈ ແລະ ພ້ອມກັນຈັດຕັ້ງປະຕິບັດຢ່າງເປັນຂະບວນການ ແລະ ເຂັ້ມງວດແຕ່ເຖິງຢ່າງໃດກໍຕາມວາງຕົ້ນເດືອນພຶດສາພະ 2020 ນີ້ ພົບວ່າມີເດັກ ນ້ອຍເປັນໄຂ້ ແລະອອກຕຸ່ມເປັນຈຳນວນຫຼາຍຢູ່ບ້ານພູສິງ.

  ທ່ານ ດຣ ບຸນຊ່ວງ ຄຳພູວົງ ຫົວໜ້າຫ້ອງການສາທາລະນະສຸກເມືອງແບງ ແຂວງອຸດົມໄຊ ກ່າວວ່າ: ພາຍຫຼັງທີ່ໄດ້ຮັບການລາຍງານຈາກອົງການປົກຄອງບ້ານພູສິງ ວ່າພົບເຫັນເດັກນ້ອຍຈໍານວນຫຼາຍມີອາການໄຂ້ ແລະ ອອກຕຸ່ມດັ່ງກ່າວແລ້ວທາງຫ້ອງການສາທາລະນະສຸກເມືອງໄດ້ມີການແຕ່ງຕັ້ງທີມງານຮັບຜິດຊອບ ຫຼືທີມງານ ຕອບໂຕ້ໄວລົງເກັບກຳຂໍ້ມູນເຫັນວ່າມີເດັກນ້ອຍຈຳນວນ 46 ຄົນ ມີອາການໄຂ້ ແລະອອກຕຸ່ມດັ່ງນັ້ນຈຶ່ງໄດ້ເກັບຕົວຢ່າງຈຳນວນໜຶ່ງສົ່ງໃຫ້ແຂວງເພື່ອສົ່ງໃຫ້ສູນລະບາດວິທະຍາວິເຄາະວິໄຈຫາສາເຫດ ແລະກຳນົດວ່າແມ່ນພະຍາດຫຍັງ, ພ້ອມກັນນັ້ນກໍໄດ້ແຕ່ງຕັ້ງທິມງານເຊື່ອມສານແບບຄົບຊຸດລົງສົມທົບກັບບ້ານດັ່ງກ່າວເພື່ອກວດກາສຸຂະພາບ, ສັກຢາ, ໃຫ້ຢາຫຼຸດໄຂ້ ແລະ ປິ່ນປົວຕາມອາການໃຫ້ໄວທີ່ສຸດພ້ອມທັງໃຫ້ຢາວັກຊິນທັງເດັກອາຍຸຕໍ່າກວ່າ 2 ປີ ຕາມຮອບປົກກະຕິລວມທັງໃຫ້ວັກຊິນແກ່ເດັກອາຍຸ 10 ປີລົງລຸ່ມຕື່ມອີກເພື່ອປ້ອງກັນເຊື້ອພະຍາດໝາກແດງນ້ອຍ-ໃຫຍ່, ນອກນັ້ນຍັງໄດ້ເຮັດວຽກງານສຸກຂະສຶກສາ ແລະ ເນັ້ນກ່ຽວກັບການຫຼີກລ່ຽງໃນການການເດີນທາງໄປມາຫາສູ່ກັນໃນຊ່ວງໄລຍະດັ່ງກ່າວເພື່ອປ້ອງກັນການແຜ່ເຊື້ອອອກສູ່ວົງກວ້າງ.

  ໂອກາດດັ່ງກ່າວນີ້ ທ່ານ ດຣ ບຸນ ຊ່ວງ ຄຳພູວົງ ຫົວໜ້າຫ້ອງການສາທາລະນະສຸກເມືອງແບງ ແຂວງອຸດົມໄຊ ຍັງໄດ້ຮຽກຮ້ອງມາຍັງປະຊາຊົນຊາວເມືອງແບງຈົ່ງພ້ອມກັນເອົາໃຈໃສ່ຮັກສາສຸຂະພາບໂດຍປະຕິບັດຫຼັກການອະນາໄມ 3 ສະອາດໃຫ້ເປັນປົກກະຕິຄືກິນສະອາດ, ຢູ່ສະອາດ ແລະ ນຸ່ງຫົ່ມສະອາດເພື່ອເຮັດໃຫ້ຕົນເອງ, ຄອບຄົວກໍຄືທົ່ວເມືອງແບງປາສະຈາກພະຍາດຕ່າງໆ ທີ່ມັກຈະເກີດຂຶ້ນຕາມລະດູການນີ້.

_____________

ຂຽນໂດຍ: ຄານມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์