ວິທະຍາໄລຄູຫຼວງພະບາງສີດພົ່ນຢາຂ້າເຊື້ອ

  ເພື່ອຮັບປະກັນການລະບາດຂອງເຊື້ອພະຍາດໂຄວິດ-19 ທີ່ພວມລະບາດເປັນວົງກວ້າງໃນຂອບເຂດທົ່ວໂລກກໍຄືຢູ່ໃນລາວແນໃສ່ຮັບປະກັນບໍ່ໃຫ້ມີເຊື້ອພະຍາດການລະ ບາດດັ່ງກ່າວທາງວິທະຍາໄລຄູຫຼວງພະບາງໄດ້ສີດ-ພົ່ນຢາຂ້າເຊື້ອຕຶກຫ້ອງການ, ອາຄານຮຽນ, ຫໍພັກນັກຮຽນເພື່ອກຽມພ້ອມໃນການເປີດການຮຽນ-ການສອນໃນມໍ່ໆນີ້.

  ທ່ານ ບຸນສຸວັນ ລັດຕະນາ ຜູ້ອໍານວຍການວິທະຍາໄລຄູຫຼວງພະບາງໃຫ້ສໍາພາດຕໍ່ທີມຂ່າວສັງຄົມປະຈໍາແຂວງຫຼວງພະບາງໃນວັນທີ 16 ພຶດສະພາ 2020 ນີ້ວ່າ: ຍ້ອນເຫັນໄດ້ຄວາມສໍາຄັນ ແລະຜົນຮ້າຍຂອງເຊື້ອພະຍາດໂຄວິດ-19 ກໍຄືຄໍາສັ່ງແນະນໍາຈາກຂັ້ນເທິງໃນການກຽມຄວາມພ້ອມກ່ອນເປີດການຮຽນການ-ສອນທາງວິ ທະຍາໄລຄູຫຼວງພະບາງຈຶ່ງໄດ້ປະສານສົມທົບກັບກາແດງແຂວງຫຼວງພະບາງເພື່ອມາສີດ-ພົ່ນຢາຂ້າເຊື້ອຕຶກຫ້ອງການ, ອາຄານຮຽນ, ຫໍພັກນັກຮຽນເພື່ອກຽມພ້ອມໃນການເປີດການຮຽນ-ການສອນໃນມໍ່ໆນີ້ປະກອບມີຫ້ອງການ 10 ຫ້ອງ,

  ຫໍພັກ 64 ຫ້ອງ, ຫ້ອງປະຊຸມ 3 ຫ້ອງ, ຫ້ອງຮຽນ 54 ຫ້ອງ ພ້ອມນີ້ກໍໄດ້ຊີດພົ່ນຢາຂ້າເຊື້ອຢູ່ໂຮງຮຽນມັດທະຍົມຕົ້ນສາທິດ ແລະ ໂຮງຮຽນປະຖົມສາທິດ ແລະ ອະນຸບານທີ່ຂຶ້ນກັບໂຮງຮຽນວິທະຍາໄລຄູຫຼວງພະບາງຕື່ມອີກ.

  ດ້ານ ທ່ານ ສິງຄໍາ ມິ່ງບຸນຕາ ຮອງຫົວໜ້າອົງການກາແດງແຂວງຫຼວງພະບາງກ່າວວ່າສໍາລັບການຊ່ວຍເຫຼືອໃນການສີດພົ່ນຢາຂ້າເຊື້ອໃຫ້ບັນດາສະຖານທີ່ມີຄວາມສ່ຽງຕໍ່ການແຜ່ລະບາດຂອງເຊື້ອພະຍາດໂຄວິດ-19 ທາງກາແດງແຂວງຫຼວງພະບາງກໍໄດ້ລົງຊີດຜົ່ນຢາຂ້າເຊື້ອຢູ່ພາຍໃນເທສະບານ 5 ບ້ານ, 7 ວັດ, 11 ຫ້ອງ ການ, ຕະຫຼາດ 1 ແຫ່ງ, ຄິວລົດ 2 ແຫ່ງ, ສະໜາມບິນ 2 ຄັ້ງ, ທະນາຄານ ແລະການເງິນຈຸລະພາກ 12 ຄັ້ງ,ໂຮງຮຽນ 4 ແຫ່ງ, ບ້ານພັກ 5 ຄັ້ງ, ຫ້ອງແຍກປ່ຽວ ແລະເຮືອນຜູ້ຕິດເຊື້ອ 3 ຄັ້ງ ແລະສໍາລັບແຜນການໃນຕໍ່ໜ້າແມ່ນຈະສຶບຕໍ່ອອກສີດຢາຕາມສວນສາທາລະນະຈຸດສ່ຽງທີ່ປະຊາຊົນແອອັດເພື່ອສະກັດກັ້ນພະຍາດໂຄວິດ-19.

____________

ຂຽນໂດຍ: ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์