ຊາວໜຸ່ມຈຳປາສັກ ມອບເງິນສ້າງອາຄານຮຽນບ້ານຫົວຊ້າງໄພ

    ໃນວັນທີ 4 ກຸມພາ 2019 ທ່ານອຸດົມສັກດີວີໄຊເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງຈຳປາສັກພ້ອມຄະນະໄດ້ນຳເອົາເງິນຈຳນວນ 30 ລ້ານກີບມາມອບໃຫ້ກັບອຳນາດການປົກຄອງເມືອງໂຂງເພື່ອປະກອບສ່ວນເຂົ້າໃນການກໍ່ສ້າງອາຄານຮຽນບ້ານຫົວຊ້າງໄພທີ່ພວມຢູ່ໃນໄລຍະກໍ່ສ້າງ ໂດຍໃຫ້ກຽດກ່າວຮັບເງິນຈຳນວນດັ່ງກ່າວໂດຍທ່ານ ສະນັ່ນສີພາພົມມະຈັນເຈົ້າເມືອງໆໂຂງໂດຍຊ້ອງໜ້າບັນດາທ່ານໃນຄະນະປະຈຳພັກເມືອງ, ກຳມະການພັກເມືອງແລະເຖົ້າແກ່ແນວໂຮມພາຍໃນບ້ານທີ່ເຂົ້າຮ່ວມ.

   ໂຮງຮຽນປະຖົມຫົວຊ້າງໄພເມືອງໂຂງ ແຂວງຈຳປາສັກ, ອາຄານຮຽນຫຼັງດັ່ງກ່າວເປັນອາຄານເບຕົງເສີມເຫຼັກ,ມີຂະໜາດ 6x21 ແມັດ,ປະກອບມີ 3 ຫ້ອງຮຽນ, ຊຶ່ງໄດ້ເລີ່ມລົງມືກໍ່ສ້າງແຕ່ເດືອນຕຸລາ 2018 ເປັນຕົ້ນມາ ແລະມາເຖິງປະຈຸບັນອາຄານຮຽນຫຼັງດັ່ງກ່າວແມ່ນສຳເລັດຫຼາຍໜ້າວຽກປະເມີນ ໄດ້ 70% ຂອງການກໍ່ສ້າງ, ອາຄານຮຽນຫຼັງໃໝ່ບ້ານຫົວຊ້າງໄພນີ້ເປັນການປະກອບສ່ວນທຶນຂອງຊຸມຊົນກໍ່ຄືຊຸມຊົນມີສ່ວນຮ່ວມເປັນຈຳນວນເງິນ 42 ລ້ານກວ່າ ກີບ ແລະ ທຶນຂອງສະມາຄົມພັດທະນາຊຸມຊົນເມືອງໂຂງຈຳນວນ 110 ລ້ານກວ່າກີບລວມເປັນເງິນທັງໝົດ 152 ລ້ານກວ່າກີບ.

ທ່ານເຈົ້າເມືອງໆໂຂງໃຫ້ຮູ້ຕື່ມວ່າ: ຜ່ານການຈັດຕັ້ງວຽກງານຕົວຈິງໃນການກໍ່ສ້າງອາຄານຮຽນເຫັນໄດ້ວ່າຍັງມີຫຼາຍໜ້າວຽກທີ່ ຍັງບໍ່ສຳເລັດ ແລະ ຂາດງົບປະມານທີ່ຈຳເປັນເຂົ້າໃນການສືບຕໍ່ກໍ່ສ້າງດັ່ງນັ້ນຈຶ່ງໄດ້ມີການລະດົມຈາກພາກສ່ວນຕ່າງໆພາຍໃນແຂວງ ແລະເງິນທີ່ໄດ້ຮັບຈຳນວນ 30 ລ້ານກີບຈາກຊາວໜຸ່ມແຂວງຈຳປາສັກນີ້ກໍ່ແມ່ນອີກແຮງຊ່ວຍເຫຼືອໜຶ່ງທີ່ເປັນການປະກອບສ່ວນເຂົ້າໃນການສືບຕໍ່ກໍ່ສ້າງອາຄານຮຽນໃຫ້ສຳເລັດຕາມເປົ້າໝາຍ.

แชร์