ລັດຖະບານໄດ້ຜ່ອນຜັນມາດຕະການປ້ອງກັນອອກຫຼາຍດ້ານ

  ລັດຖະບານໄດ້ຜັນຜ່ອນມາດຕະການເພີ່ມຕື່ມຈຳນວນໜຶ່ງຂອງຄຳສັ່ງເລກທີ 06/ນຍ ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມຫຼຸດໜ້ອຍລົງແຕ່ເນື່ອງຈາກຍັງມີຄວາມສ່ຽງສູງ ແລະສິ່ງທ້າທາຍຈຳນວນບໍ່ໜ້ອຍຍັງສືບຕໍ່ປະຕິບັດບາງມາດຕະການປ້ອງກັນຢ່າງເຂັ້ມງວດ.
  ອີງໃສ່ຂໍ້ມູນແຈ້ງການຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 580/ຫສນຍ ໃຫ້ຮູ້ວ່າ: ໃຫ້ບັນດາກະຊວງ, ອົງການປົກຄອງທ້ອງຖິ່ນທຸກຂັ້ນສືບຕໍ່ປະຕິບັດບາງມາດຕະການຕາມຄຳສັ່ງເລກທີ 60/ນຍ ແລະຍົກສູງຄວາມຮັບຜິດຊອບໃນການຕິດຕາມເຝົ້າລະວັງການປ້ອງກັນ, ຄວບຄຸມ,ສະກັດກັ້ນແກ້ໄຂການລະບາດຂອງພະຍາດໂຄວິດ-19 ດ້ວຍເປັນເຈົ້າການຄວາມຮັບຜິດຊອບສູງ ແລະ ໃຫ້ບັນດາປະຊາຊົນ, ພະນັກງານລັດຖະກອນ ແລະ ຜູ້ປະກອບການທົ່ວປະເທດສືບຕໍ່ປະຕິບັດມາດຕະການປ້ອງກັນເປັນຕົ້ນການຮັກສາໄລຍະຫ່າງ 1 ແມັດຂຶ້ນໄປ, ລ້າງມືດ້ວຍນໍ້າສະອາດ, ໃສ່ຜ້າປິດປາກ-ດັງ, ແທກອຸນຫະພູມຕາມຄຳແນະນຳຂອງຄະນະສະ ເພາະກິດວາງອອກ.
  ໃນນີ້ເຫັນດີໃຫ້ປະຕິບັດມາດຕະການຜັນຜ່ອນຈຳນວນໜຶ່ງເພີ່ມຕື່ມເພື່ອໃຫ້ມີ ຜົນກະທົບຕໍ່ເສດຖະກິດ-ສັງຄົມໜ້ອຍທີ່ສຸດ ແລະໃຫ້ສັງຄົມໃຊ້ຊີວິິດເປັນປົກກະຕິໂດຍອະນຸຍາດສຳນັກງານອົງການຂອງພັກລັດ, ບໍລິສັດເປີດດຳເນີນການປົກກະຕິ, ອະນຸຍາດໃຫ້ປະຊາຊົນ, ພະນັກງານລັດຖະກອນ, ຜູ້ປະກອບການທົ່ວປະເທດສາມາດເດີນທາງໄປມາພາຍໃນປະເທດໄດ້, ອະນຸຍາດເປີດການຂົນສົ່ງໂດຍສານທາງບົກ, ທາງນໍ້າ ແລະທາງອາກາດພາຍໃນປະເທດໄດ້ພ້ອມອະນຸຍາດໃຫ້ເປີດການຝຶກອົບຮົມ, ສຳມະນາ ແລະກອງປະຊຸມເປັນທາງການໄດ້ແຕ່ບໍ່ໃຫ້ມີການຈັດງານລ້ຽງໃຫ້ຮັກສາໄລຍະຫ່າງ 1 ແມັດຂຶ້ນໄປ, ລ້າງມືດ້ວຍນໍ້າສະອາດ, ໃສ່ຜ້າປິດປາກ-ດັງ, ແທກອຸນ ຫະພູມຕາມຄຳແນະນຳຂອງຄະນະສະເພາະກິດວາງອອກນອກນັ້ນໃຫ້ກະຊວງສຶກສາທິການ ແລະ ກີລາ, ກະຊວງປ້ອງກັນປະເທດ ແລະກະຊວງປ້ອງກັນຄວາມສະ ຫງົບເປີດຮຽນຄືນໃນຊັ້ນປະຖົມສຶກສາປິທີ 5, ມັດທະຍົມສຶກສາປີທີ 4 ແລະປີທີ 7 ແລະໂຮງຮຽນຄໃນຂົງເຂດປ້ອງກັນຊາດ ແລະປ້ອງກັນຄວາມສະຫງົບເລີ່ມແຕ່ວັນທີ 18 ພຶດສະພາ 2020 ສ່ວນໂຮງຮຽນລ້ຽງເດັກຊັ້ນຮຽນປ1-ປ4, ມ1-ມ3 ແລະ ມ5-ມ6, ວິທະຍາໄລ ແລະສະຖາບັນອື່ນໆໃຫ້ກຽມເປີດເລີ່ມແຕ່ວັນທີ 2 ມິຖຸນາ 2020 ເປັນຕົ້ນໄປພ້ອມນີ້ຍັງອະນຸຍາດໃຫ້ອອກກຳລັງກາຍຫຼິ້ນກີລາກາງແຈ້ງທຸກປະເພດ, ອະນຸຍາດໃຫ້ເປີດທຸລະກິດການຄ້າເຊັ່ນ: ຮ້ານອາຫານ, ຮ້ານຂາຍເຄື່ອງຂອງກິນສຸກ, ຮ້ອນຂາຍເຄື່ອງຍ່ອຍ ແລະ ອື່ນໆ ສາມາດດຳເນີນກິດຈະການໄດ້ປົກກະຕິແຕ່ໃຫ້ຂະແໜງການກ່ຽວຂ້ອງອອກຄຳແນນະນຳກຳນົດເວລາປິດ-ເປີດໃຫ້ລະ ອຽດບັນດາໂຄງການ, ບໍລິສັດ ແລະໂຮງງານສາມາດເປີດດຳເນີນກິດຈະການໂດຍປະຕິບັດຕາມເງື່ອນໄຂທີ່ໄດ້ກຳນົດຄຳແນະນຳສະບັບເລກທີ 071/ສພກ ຂອງຄະນະ ສະເພາະກິດ.
 ຢ່າງໃດກໍຕາມບໍ່ຄວນຖືເບົາເນື່ອງຈາກໃນຕໍ່ໜ້າຍັງມີຄວາມສ່ຽງສູງຍັງໄດ້ສືບຕໍ່ປະຕິບັດບາງມາດຕະການຢ່າງເຂັ້ມງວດຄື: ສືບຕໍ່ປິດກິດຈະການຕະຫຼາດກາງຄືນ, ຮ້ານບັນເທີງກິນດື່ມເຫຼົ້າ, ເບຍ, ໂຮງສາຍຮູບເງົາ, ກາຊິໂນ ແລະສືບຕໍ່ຫ້າມຈັດກິດຈະກຳຊຸມແຊວ ແລະງານສ້າງສັນ, ຫ້າມປະເພນີງານດອງທີ່ມີຜູ້ເຂົ້າຮ່ວມເກີນ 50 ຄົນທີ່ສາມາດຮັກສາໄລຍະຫ່າງເກີນ 1 ແມັດໄດ້ພ້ອມທັງສືບຕໍ່ປິດດ່ານປະເພນີ, ດ່ານທ້ອງຖິ່ນ ແລະດ່ານສາກົນເວັ້ນເສຍແຕ່ລົດຂົນສົ່ງສິນຄ້າຜູ້ທີ່ໄດ້ຮັບອະນຸຍາດຈາກຄະ ນະສະເພາະກິດ, ສືບຕໍ່ໂຈະການອອກວີຊາທຸກປະເພດໃຫ້ບຸກຄົນທົ່ວໄປທີ່ເດີ່ນທາງມາຈາກ ຫຼືຜ່ານປະເທດທີ່ຍັງມີການລະບາດຂອງພະຍາດໂຄວິດ-19 ຍົກເວັ້ນແຕ່ຜູ້ຊ່ຽວຊານທີ່ມີຄວາມຈຳເປັນແບະຮີບດ່ວນເຂົ້າມາປະຕິບັດວຽກງານຢູ່ສະຖານທູດ ແລະໂຄງການຕ່າງໆ.

-----

แชร์