ອຸດົມໄຊ ຈັດຊື້ໂຕະ, ຕັ່ງຊຸດໃໝ່ເຂົ້າສະໂມສອນໃຫຍ່ຂອງແຂວງ

 ຕອນແລງວັນທີ 12 ພຶດສະພາ 2020 ນີ້ ຢູ່ທີ່ຫ້ອງປະຊຸມຫ້ອງວ່າການ ແຂວງອຸດົມໄຊ ໄດ້ມີພິທີເຊັນສັນຍາຮັບເໝົາການສະໜອງເຟີນິເຈີໂຕະ, ຕັ່ງເຂົ້າສະໂມສອນໃຫຍ່ຂອງແຂວງອຸດົມໄຊ ລະຫວ່າງຫ້ອງວ່າການແຂວງອຸດົມໄຊ ເຈົ້າຂອງໂຄງການ ແລະ ໂຮງງານລາວເຊິນປຸງແຕ່ງໄມ້ສຳເລັດຮູບຄົບວົງຈອນຈຳກັດຜູ້ດຽວຜູ້ຮັບເໝົາຂຶ້ນໂດຍການເຂົ້າຮ່ວມຂອງທ່ານນາງ ຈັນທະລາ ໄຊບຸນເຮືອງ ຮັກສາການຫົວໜ້າຫ້ອງວ່າການແຂວງອຸດົມໄຊ, ທ່ານ ຫຸມພັນ ໂກສະດາ ຮອງຫົວໜ້າຫ້ອງວ່າການ ແຂວງອຸດົມໄຊທັງເປັນຫົວໜ້າຄະນະຮັບຜິດຊອບຄຸ້ມຄອງການຈັດຊື້ເຟີນີເຈີ,ທ່ານ ສົມເພັດ ລາວເຊິນ ອໍານວຍການໂຮງງານລາວເຊິນປຸງແຕ່ງໄມ້ສໍາເລັດຮູບຄົບວົງຈອນ ຈໍາກັດຜູ້ດຽວຕະຫຼອດຮອດພະນັກງານ ແລະວິຊາການທັງສອງຝ່າຍ.
  ການຈັດຊື້ເຟີນິເຈີໂດຍສະເພາະແມ່ນໂຕະ ແລະຕັ່ງເຂົ້າໃສ່ສະໂມສອນໃຫຍ່ຂອງແຂວງອຸດົມໄຊໃນຄັ້ງນີ້ກໍເພື່ອເປັນການປັບປຸງ, ກະກຽມໃສ່ການດໍາເນີນກອງປະຊຸມໃຫຍ່ອົງຄະນະພັກແຂວງຄັ້ງທີ 9 ເຊິ່ງຈະໄດ້ຈັດຂຶ້ນໃນເດືອນກໍລະກົດ 2020 ນີ້ທັງເຮັດໃຫ້ສະໂມສອນຂອງແຂວງມີຄວາມສວຍງາມ, ມີຊຸດເຟີນິເຈີທີ່ດີ, ມີຄຸນນະ ພາບ ແລະສາມາດຮັບຮອງໃນການຈັດກອງປະຊຸມ, ມິດຕິງ ແລະກິດຈະກໍາອື່ນໆໄດ້ຢ່າງສະດວກສະບາຍ.
  ໃນພິທີແມ່ນໄດ້ຮັບຟັງການຜ່ານຮ່າງສັນຍາຮັບເໝົາລະຫວ່າງ 2 ຝ່າຍຄືຫ້ອງວ່າການແຂວງອຸດົມໄຊຊຶ່ງເປັນເຈົ້າຂອງໂຄງການ ແລະໂຮງງານລາຍເຊິນປຸງແຕ່ງໄມ້ສຳເລັດຮູບຄົບວົງຈອນຈຳກັດຜູ້ດຽວຜູ້ຮັບເໝົາຊຶ່ງປະກອບມີທັງໝົດ 18 ມາດຕາໃນນັ້ນແມ່ນໄດ້ກຳນົດຈຸດປະສົງ,ເປົ້າໝາຍຢ່າງລະອຽດໃນນັ້ນມີໂຕະສະເພາະປະທານຈຳນວນ 1 ໜ່ວຍ ເປັນໄມ້ດູ່ຂະໜາດ 60x210x80 ຊັງຕີແມັດ, ຕັ່ງໄມ້ດູ່ມີບ່ອນວາງແຂນ, ມີນວມຈຳນວນ 3 ໜ່ວຍ, ໂຕະຄະນະປະຈຳພັກແຂວງ 18 ໜ່ວຍ ເປັນໄມ້ສັກຂະຫນາດ 60x 140x80 ຊັງຕີແມັດ, ຕັ່ງໄມ້ສັກມີບ່ອນວາງແຂນ, ມີນວມຈຳນວນ 36 ໜ່ວຍ, ໂຕະຜູ້ແທນກອງປະຊຸມເປັນແກນໄມ້ສັກຂະໜາດ 50x140x75 ຊັງຕີແມັດ, ຈຳນວນ 181 ໜ່ວຍ ແລະຕັ່ງແກນໄມ້ສັກທົ່ວໄປຈຳນວນ 362 ໜ່ວຍລວມໂຕະທັງໝົດຈໍານວນ 200 ໜ່ວຍ ແລະຕັ່ງ 401 ໜ່ວຍລວມເປັນມູນຄ່າທັງໝົດ 465,400,000 ກີບ ກໍານົດສ້າງທັງໝົດ 2 ເດືອນນັບຕັ້ງແຕ່ວັນທີ 13 ພຶດສະພາ ເປັນຕົ້ນໄປສ່ວນການຊໍາລະແມ່ນແບ່ງອອກເປັນ 2 ໄລຍະຄືປີ 2020 ນີ້ ຊຶ່ງໄລ ຍະທຳອິດນີ້ແມ່ນຈະຈ່າຍພາຍຫຼັງໄດ້ຜ່ານ ການຢັ້ງຢືນຈາກບັນດາໜ້າວຽກຈາກ ຄະນະກຳມະການທີ່ກ່ຽວຂ້ອງສຳເລັດ 50% ແລະ

100% ໃນຈໍານວນ 372 ລ້ານກີບ ແລະໄລຍະທີ 2 ແມ່ນຈະຊຳລະໃນປີ 2021 ໃນຈຳນວນ 93 ລ້ານ 4 ແສນກີບ ກໍານົດການຮັບປະກັນເຟີນິເຈີທັງໝົດແມ່ນ1 ປີ ນັບຕັ້ງແຕ່ໄດ້ມີການມອບຮັບກັນຢ່າງເປັນທາງການຈາກນັ້ນທັງສອງຝ່າຍກໍໄດ້ລົງນາມໃນບົດບັນທຶກດັ່ງກ່າວຊຶ່ງຕາງໜ້າຝ່າຍເຈົ້າຂອງໂຄງການຄືຫ້ອງວ່າການແຂວງອຸດົມໄຊ ແມ່ນທ່ານ ຫຸມພັນ ໂກສະດາ ຮອງຫົວໜ້າຫ້ອງວ່າການແຂວງ, ທັງເປັນຫົວໜ້າຄະນະຮັບຜິດຊອບຄຸ້ມຄອງການຈັດຊື້ເຟີນິເຈີ ແລະຝ່າຍໂຮງງານລາວເຊິນ ປຸງແຕ່ງໄມ້ສຳເລັດຮູບຄົບວົງຈອນ ຈຳກັດຜູ້ດຽວແມ່ນທ່ານ ສົມເພັດ ລາວເຊິງ ອໍານວຍການໂຮງງານດັ່ງກ່າວໂດຍມີຜູ້ເຂົ້າຮ່ວມທັງສອງຝ່າຍເປັນສັກຂີພິຍານ.

______________

ຂຽນໂດຍ: ຄານມະນີ ຮຽນດໍຈັນ     

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์