ບໍ່ຄຳ-ທອງເຊໂປນ ເພີ່ມຊ່ວຍຕອບໂຕ້ໂຄວິດ-19

  ໃນເດືອນພຶດສະພານີ້, ບໍລິສັດ ລ້ານຊ້າງ ມີເນໂຣນສ໌ ລິມິເຕັດ (ລຊມລ) ບໍ່ຄຳ-ທອງເຊໂປນ ໄດ້ປະກອບສ່ວນອຸປະກອນ-ເຄື່ອງມືປ້ອງກັນການລະບາດຂອງພະຍາດ COVID-19 ເພີ່ມຕື່ມອີກເປັນຄັ້ງທີສອງໃຫ້ແກ່ເມືອງວິລະບູລີເປັນມູນຄ່າ 101,5 ລ້ານກີບ ແລະແຂວງສະຫວັນນະເຂດເຂດມູນຄ່າ 20 ພັນໂດລາ ປະມານ 180 ລ້ານກີບ, ການປະກອບສ່ວນອຸປະກອນ ແລະເຄື່ອງມືຄັ້ງທີສອງນີ້ແມ່ນເພື່ອສະໜັບສະໜູນໃຫ້ແກ່ຜູ້ມີສ່ວນຮ່ວມຫຼັກ ແລະ ຊຸມຊົນເຈົ້າພາບຊຶ່ງເປັນທີ່ຕັ້ງຂອງໂຄງການຂຸດຄົ້ນບໍ່ຄຳ-ທອງເຊໂປນໃນການຕ້ານການລະບາດຂອງພະຍາດ COVID-19.

  ກ່ອນໜ້ານີ້ໃນເດືອນເມສາ, ບໍລິສັດ ລຊມລ ໄດ້ຮີບເລັ່ງໃຫ້ການສະໜັບສະໜູນເບື້ອງຕົ້ນໃຫ້ແກ່ເມືອງວິລະບູລີ ແລະແຂວງສະຫວັນນະເຂດດ້ວຍການມອບອຸປະກອນການແພດມູນຄ່າ 142 ລ້ານກີບ ອຸປະກອນທີ່ໄດ້ມອບລວມມີ: ໜ້າກາກອະນາໄມ, ເຄື່ອງກວດອຸນຫະພູມ ຮ່າງກາຍ, ນໍ້າຢາລ້າງມື, ເຄື່ອງພົ່ນຢາຂ້າເຊື້ອດ້ວຍໄຟຟ້າພ້ອມດ້ວຍນໍ້າຢາຂ້າເຊື້ອ.

  ທ່ານ ສະໝານ ອະເນກາ ຜູ້ອຳນວຍການໃຫຍ່ຂອງ ລຊມລ ໄດ້ກ່າວວ່າ: “ໃນຂະນະທີ່ປະເທດພວກເຮົາເລີ່ມມີການຜ່ອນຜັນບາງມາດຕະການ, ພະນັກງານໃນແຖວໜ້າກໍຄືແພດໝໍ ແລະປະຊາຊົນ ເມືອງວິລະບູລີ ແລະ ແຂວງສະຫວັນນະເຂດແມ່ນຍັງຈະຕ້ອງໄດ້ກຽມອຸປະກອນ ແລະ ເຫື່ອແຮງເພື່ອຮັບມືກັບຄວາມສ່ຽງຕໍ່ກັບການລະບາດຂອງພະຍາດ COVID-19 ໃນຕໍ່ໜ້າ. ທາງບໍລິສັດ ລຊມລ ຫວັງເປັນຢ່າງຍິ່ງວ່າອຸປະກອນ-ເຄື່ອງມືທີ່ຈຳເປັນເຫຼົ່ານີ້ຈະປະກອບສ່ວນໃນການຕໍ້ສູ້-ຮັບມືກັບການລະບາດຂອງພະຍາດ COVID-19”.

  ໃນເດືອນກຸມພາ 2020 ຊຶ່ງນັບເປັນ ເດືອນທີ 2 ຫຼັງຈາກທີ່ໄດ້ມີການລະບາດຂອງພະຍາດ COVID-19 ໄດ້ແຜ່ລາມຢ່າງວ່ອງໄວໃນທົ່ວ ສປ ຈີນ ແລະໃນຫຼາຍກວ່າ 20 ປະເທດໃນໂລກ, ບໍລິສັດ ລຊມລ ໄດ້ມອບເງິນສົມທົບຈຳນວນ US$15.000 ໃຫ້ແກ່ກະຊວງພະລັງງານ ແລະ ບໍ່ແຮ່ເພື່ອປະກອບສ່ວນເຂົ້າໃສ່ທຶນທີ່ທາງສະມາຄົມມິດຕະພາບລາວ-ຈີນຮ່ວມກັບນະຄອນຫຼວງວຽງຈັນໄດ້ຈັດຂຶ້ນເພື່ອລະດົມທຶນໄປຊ່ວຍເຫຼືອປະຊາຊົນຜູ້ປະສົບເຄາະຮ້າຍຈາກພະຍາດCOVID-19 ຢູ່ ສປ ຈີນ.

  ມາຮອດປະຈຸບັນ, ບໍລິສັດ ລຊມລ ໄດ້ມີລວມຍອດການສະໜັບສະໜູນໃຫ້ແກ່ເມືອງວິລະບູລີ, ແຂວງສະຫວັນນະເຂດ ແລະຂະແໜງການກ່ຽວຂ້ອງເປັນຈຳນວນກວ່າ US$ 65.000. ໃນຂະນະທີ່ສະພາບການລະບາດຂອງພະຍາດ COVID-19 ໄດ້ມີການປ່ຽນແປງໃນ ແຕ່ລະມື້ຢູ່ນັ້ນ, ທາງບໍລິສັດ ກໍກໍາລັງປະສານວຽກຮ່ວມກັບສູນວິເຄາະ ແລະວິທະຍາແຫ່ງຊາດຂອງກະຊວງສາທາລະນະສຸກເພື່ອຫາວິທີທາງສະໜັບສະໜູນ ແລະການຮ່ວມມືທີ່ເປັນຜົນດີທີ່ສຸດໃຫ້ແກ່ການຮັບມືຕ້ານກັບພະຍາດ COVID-19 ໃນປະເທດເຮົາ.

แชร์