ການລົງທຶນຢາງພາລາຢູນນານເລີ່ມຜະລິດຄືນໃໝ່

 ວັນທີ 12 ພຶດສະພາ 2020 ນີ້ຢູ່ທີ່ບໍລິສັດການລົງທຶນຢາງພາລາຢູນນານຈໍາກັດ ທີ່ແຂວງຫຼວງນໍ້າທາ,ໄດ້ເປີດກິດຈະການຜະລິດຢາງພາລາຄືນໃໝ່ພາຍຫຼັງງົດການຜະລິດຍ້ອນພະຍາດໂຄວິດ- 19, ໂດຍການເປັນປະທານ ທ່ານປາຍ ຢວນສົ່ງ ອໍານວຍການບໍລິສັດການລົງທຶນຢາງພາລາຢູນນານຈໍາກັດ, ເຂົ້າຮ່ວມໂດຍທ່ານ ຄໍາໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ, ມີການນໍາຂັ້ນແຂວງ, ຂັ້ນເມືອງ, ຕາງໜ້າຊາວສວນຢາງພາລາແຕ່ລະກຸ່ມພາຍໃນເມືອງຫຼວງນໍ້າທາເຂົ້າຮ່ວມ.

  ທ່ານ ປາຍຢວນສົ່ງ ອໍານວຍການບໍລິສັດການລົງທຶນຢາງພາລາຢູນນານຈໍາກັດ ໄດ້ລາຍງານໃຫ້ຮູ້ວ່າ: ມາຮອດປະຈຸບັນທາງບໍລິສັດລົງທຶນຢາງພາລາຢູນນານໄດ້ດໍາເນີນໂຄງການປູກພືດທົດແທນການປູກຝິ່ນເປັນເວລາ 14 ປີແລ້ວ,ປະຈຸບັນມີສວນຢາງພາລາ 21 ບ່ອນ, ມີເນື້ອທີ່ 6.666 ເຮັກຕາ, ມີໂຮງງານຢາງພາລາ 3 ແຫ່ງ, ມີສໍານັກງານໃຫຍ່ຂອງບໍລິສັດຕັ້ງຢູ່ແຂວງຫຼວງນໍ້າທາ, ມີສາຂາຢູ່ແຂວງຫຼວງພະບາງ, ບໍ່ແກ້ວ, ໄຊຍະບູລີ, ວຽງຈັນ, ຄໍາມ່ວນ ແລະແຂວງຈໍາປາສັກ, ໃນໄລຍະ 14 ປີຜ່ານມາ ບໍລິສັດ ແລະປະຊາຊົນຊາວຫຼວງນໍ້າທາໄດ້ບຸກບືນຜ່ານຜ່າຄວາມຫຍຸ້ງຍາກຮ່ວມກັນພັດທະນາ, ຍົກສູງຊິວີດການເປັນຢູ່ປະກອບສ່ວນໃນການພັດທະນາເສດ ຖະກິດ-ສັງຄົມ ໃຫ້ນັບມື້ດີຂຶ້ນເລື້ອຍໆ, ມາໃນໄລຍະໜຶ່ງເນື່ອງຈາກວ່າທາງໂຮງງານໄດ້ປະຕິບັດຕາມຄໍາສັ່ງຂອງທ່ານນາຍົກລັດຖະມົນຕີເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19, ຈຶ່ງໄດ້ໂຈະກິດຈະການຜະລິດຢາງພາລາເລີ່ມແຕ່ທ້າຍເດືອນກຸມພາເປັນຕົ້ນມາພາຍຫຼັງລັດຖະບານໄດ້ມີມາດຕະການຜ່ອນຜັນທາງໂຮງງານຈຶ່ງໄດ້ສືບຕໍ່ເປີດກິດຈະການຜະລິດຢາງພາລາຄືນໃໝ່ນັບຕັ້ງແຕ່ວັນທີ 12 ພຶດສະພາ ເປັນຕົ້ນໄປໂດຍໄດ້ເອົາໃຈປະຕິບັດມາດຕະການໃນການປ້ອງກັນພະຍາດ ໂຄວິດ-19 ພາຍໃນໂຮງງານຢ່າງເຂັ້ມ ງວດຕາມຄໍາແນະນໍາ ແລະແຈ້ງການ ຂອງຄະນະສະເພາະກິດ, ພ້ອມນັ້ນທາງບໍລິສັດໄດ້ປະກອບສ່ວນບໍລິຈາກວັດຖຸ ອຸປະກອນປ້ອງກັນພະຍາດດັ່ງໃຫ້ແກ່ພາກລັດມູນຄ່າ 100 ລ້ານກ່ວາກີບ, ເພື່ອແກ້ໄຂຄວາມຫຍຸ້ງຍາກໃຫ້ແກ່ປະ ຊາຊົນໄດ້ຟື້ນຟູຊີວິດການເປັນຢູ່ໃນໄລຍະການລະບາດພະຍາດໂຄວິດ-19 ໃຫ້ ປະຊາຊົນທາງບໍລິສັດໄດ້ປ່ອຍເງິນກູ້ໂດຍບໍ່ມີດອກເບ້ຍຈໍານວນ 2 ຕື້ 690 ລ້ານກີບ ໃຫ້ປະຊາຊົນຊື້ອຸປະກອນ ແລະ ໃຊ້ຈ່າຍສິ່ງຈໍາເປັນໃນຊີວິດປະຈໍາວັນ, ມາເຖິງປະຈຸບັນທັງ 3 ໂຮງງານໄດ້ຜ່ານການກວດກາຂອງຄະນະສະເພາະກິດເຫັນວ່າມີເງື່ອນໄຂພ້ອມທີ່ຈະດໍາເນີນການຜະລິດໃຫ້ເປັນປົກກະຕິ.

  ໃນໂອກາດນີ້ ທ່ານ ຄໍາໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ ໄດ້ມີຄໍາເຫັນເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດຂອງບໍລິສັດພ້ອມທັງເນັ້ນໜັກຫຼາຍບັນຫາສໍາຄັນເພື່ອໃຫ້ບໍລິສັດສືບຕໍ່ຈັດຕັ້ງປະຕິບັດຕາມລະບຽບກົດໝາຍຂອງລັດວາງອອກ, ເນັ້ນໜັກໃຫ້ບໍລິສັດສືບຕໍ່ຊຸກຍູ້ສົ່ງເສີມປະຊາຊົນໃນການປາດຢາງພາລາ, ເກັບຊື້ຢາງພາລານໍາປະຊາຊົນໃນລາຄາທີ່ຍຸຕິທໍາ.

   ພ້ອມນີ້ທາງບໍລິສັດການລົງທຶນຢາງພາລາຢູນນານຈໍາກັດໄດ້ຂຶ້ນມອບເງິນກູ້ຢືມໂດຍບໍ່ມີດອກເບ້ຍໃຫ້ແຕ່ລະກຸ່ມສວນຢາງພາລາ ແລະ ນໍາພາແຂກເບິ່ງໂຮງງານຜະລິດຢາງພາລາຕື່ມອີກ.

_____________

ຂຽນໂດຍ: ມຸນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์