ບໍ່ແກ້ວສະໜອງທຶນແກ່ກຸ່ມປູກພືດຜັກເພື່ອຜະລິດສະໜອງຕະຫຼາດພາຍໃນ

  ການປູກຝັງລ້ຽງສັດຖືເປັນສິ່ງທີ່ຕິດພັນ, ກັບດຳລົງຊີວິດການເປັນຢູ່ຂອງປະຊາຊົນລາວບັນດາເຜົ່າມາແຕ່ດຶກດຳວັນ, ທັງເປັນການສ້າງລາຍຮັບໃຫ້ແກ້ຄອບຄົວ,ມະຕິກອງປະຊຸມໃຫຍ່ອົງຄະນະພັກແຂວງບໍ່ແກ້ວ ຄັ້ງທີ V ໃນນັ້ນໄດ້ໃສ່ວ່າ: ເພື່ອສືບຕໍ່ຢຶດໝັ້ນຖືເອົາການພັດທະນາເສດຖະກິດ-ສັງຄົມເປັນໃຈກາງ, ນີ້ແມ່ນການຢືນຢັນທີ່ຖືກຕ້ອງໃນສະພາບເງື່ອນໄຂຕົວຈິງຂອງແຂວງເຮົາ. ເພາະວ່າແຂວງຈະມັ່ງຄັ່ງເຂັ້ມແຂງປະຊາຊົນຈະຮັ່ງມີຜາສຸກ ຫຼືບໍ່ນັ້ນລ້ວນແຕ່ຂຶ້ນກັບເຫງົ້າພະລັງ ແລະກໍາລັງແຮງຕົວຈິງ ທາງດ້ານເສດຖະກິດ, ຍ້ອນແນວນັ້ນຜ່ານມາການນໍາຂອງແຂວງ-ເມືອງຈື່ງ ໄດ້ເອົາໃຈໃສ່ໃນການຊຸກຍູ້ສົ່ງເສີມປະຊາຊົນບັນດາເຜົ່າໃຫ້ຫັນເອົາການຜະລິດແບບທໍາມະຊາດໄປສູ່ການຜະລິດ ເປັນສິນຄ້າໃນການປູກຝັງ-ລ້ຽງສັດ ສາມາດຂາຍສົ່ງອອກໄດ້. ເພື່ອຕອບສະ ໜອງຄວາມຮຽກຮອງຕ້ອງການພືດຜັກຊະນິດຕ່າງໆບໍ່ຂາດຕະຫຼາດໃຫ້ແກ່ຜູ້ບໍລິໂພກພາຍໃນແຂວງບໍ່ແກ້ວໃຫ້ພຽງພໍ. ທັງເປັນການປ້ອງກັນການຈຳໜ່າຍຜົນຜະລິດບໍ່ໃຫ້ລົ້ນຕະຫຼາດ ແລະ ຫຼຸດຜ່ອນການນໍາເຂົ້າຈາກຕ່າງປະ ເທດ, ເພື່ອເປັນການຊຸກຍູ້ສົ່ງເສີມໃຫ້ແກ່ຊາວກະສິກອນ ເມືອງຫ້ວຍຊາຍ ແຂວງບໍ່ແກ້ວ,ໃນ 8 ກຸ່ມຜະລິດປູກພືດຜັກຂອງບ້ານທີ່ມີເງື່ອນໄຂ, ຕາມແຜນການແມ່ນຈະ

ປູກພືດຜັກໃຫ້ບັນລຸໃນເນື້ອທີ່ 31 ກວ່າເຮັກຕາ, ມີສະມາຊິກກຸ່ມ 232 ຄົນ, ເມື່ອເຫັນໄດ້ຄວາມສຳຄັນນັ້ນ, ທາງອໍານາດການປົກ ຄອງແຂວງບໍ່ແກ້ວໄດ້ສະໜອງທຶນໃນເບື້ອງຕົ້ນ 307 ລ້ານ, 9 ແສນກວ່າກີບ, ດຶງຕາຂ່່າຍໄຟຟ້າເຂົ້າຫາສວນ, ໃຫ້ແກ່ກຸ່ມຜະລິດ, ບ້ານພິມົນສິນ, ບ້ານນໍ້າຍອນ ແລະບ້ານໜອງຊາຍ, ມີຢູ່ 5 ຈຸດ, ໃນນີ້ ກຸ່ມຜະລິດບ້ານພິມົນສິນ,ມີເນື້ອທີ່ປູກພືດຜັກ 8 ເຮັກຕາ ມີສະມາຊິກ 40 ຄົນ; ຜັກທີ່ນໍາມາປູກມີຜັກກາດຂຽວ-ຜັກກາດຊອນ, ຜັກກາດຫໍ່, ໝາກອຶ-ໝາກນໍ້າ, ຖົ່ວຝັກຍາວ, ໝາກເຂືອນ້ອຍ-ໝາກ ເຂືອໃຫຍ່, ຂີງ, ໝາກແຕງ, ໝາກກະດອມ ແລະໝາກເພັດ, ບ້ານນໍ້າຍອນ ມີເນື້ອທີ່ 7 ເຮັກຕາ; ມີສະມາຊິກ 80 ຄົນ. ໃນນີ້ແມ່ນໄດ້ປູກຜັກຫອມປ້ອມ, ຜັກກາດຊອນ-ຜັກກາດຂຽວ, ໝາກອຶ, ກະລໍ່າປີໝາກເຂືອ, ໝາກເຜັດ, ຜັກກາດຫໍ່, ໝາກແຕງ ແລະໝາກນ້ອຍ, ທ້າວ ແຫຼ້ ໂພທິສານ ອາຊີບພະນັກງານຄູສອນເປັນຜູ້ໜຶ່ງທີ່ ໃສ່ເວລາຫວ່າງນອກໂມງລັດຖະການ ແລະວັນເສົາ-ວັນທິດ ມາເຮັດສວນເພື່ອປູກຜັກເປັນອາຊີບເສີມມາໄດ້ຫຼາຍປີ, ສ່ວນຫຼາຍແມ່ນເຮັດແບບທໍາມະຊາດບໍ່ຄອຍຈະມີວິຊາການມາເບິ່ງ, ກ່ຽວກັບການປູກ ແລະການໃສ່ຝຸ່ນ, ຜ່ານມາແມ່ນໄດ້ພົບບັນຫາຕະຫຼາດບໍ່ມີພໍ່ຄ້າສ່ວນກາງທີ່ຈະມາຊື້ ຫຼື ສົ່ງອອກຜົນຜະລິດເຮັດໃຫ້ພືດຜັກໃຫຍ່ ແລະແກຖິ້ມໄປລ້າໆ, ຂາຍລາຄາຖືກເນື່ອງຈາກການນໍາເຂົ້າພືດ ຜັກຈາກຕ່າງປະເທດຫຼາຍມາເບີ່ງແລ້ວ ບ້ານນໍ້າຍອນ 80% ແມ່ນເຮັດສວນສາມາດນໍາເອົາຜົນຜະລິດມາຈໍາໜ່າຍເມືອງຫ້ວຍຊາຍໄດ້. ຖ້າເຮົາບໍນໍາເຂົ້າຈາກຕ່າງ ປະເທດ, ຍົກເວັ້ນພືດຜັກຊະນິດຕ່າງໆທີ່ເຮົາບໍ່ສາມາດປູກໄດ້ແລະດ້ານລາຄາກໍໃຫ້ເບິ່ງທ້ອງຕະຫຼາດໃຫ້ມັນເໝາະສົມ, ແນວພັນຜັກແພງຫຼາຍ, ຢາກໃຫ້ທາງພາກສ່ວນທີ່ກ່ຽວຂ້ອງຊ່ວຍໃນດ້ານການຝຶກອົບຮົມຂັ້ນຕອນເຕັກນິກການຜະລິດຝຸ່ນຊີວະພາບ, ການປັບປຸງດິນ, ເລືອກຜັກໃຫ້ເໝາະສົມກັບດິນທີ່ຕະຫຼາດຕ້ອງການໃຫ້ແກ່ຊາວກະສີກອນ ແລະບັນຫາອື່ນໆ ນອກນີ້,ຍັງມີຊາວກະສິກອນບ້ານປາກງາວ ມີເນື້ອທີ່ປູກພືດຜັກ 1 ເຮັກຕາ ກວ່າ, ມີສະມາຊິກ 9 ຄົນ, ປູກຜັກກາດ ຊອນ-ຜັກກາດຂຽວ, ໝາກເຜັດນ້ອຍ, ຜັກອີຕູ່, ຜັກບົວລະພາ, ໝາກເຂືອ, ຜັກ ກ້ານກໍາ ແລະຫົວສີໄຄ ບ້ານໜອງຊາຍ ມີເນື້ອທີ່ 5 ເຮັກຕາ, ມີສະມາຊິກ 38 ຄົນ, ປູກຜັກກາດຊອນ-ຜັກກາດຂຽວ, ໝາກຖົ່ວເບີ, ຜັກບົ້ງ,ຜັກບົ່ວ,ຜັກຫອມປ້ອມ,ໝາກເລັ່ນໃຫຍ່-ໝາກເລັ່ນນ້ອຍ, ຜັກສອນນາລີ, ໝາກເຂືອຍາວ-ເຂືອນ້ອຍ ບົວລະພາ ແລະໝາກນ້ອຍ; ບ້ານຕີນທາດ ມີເນື້ອທີ່ 2 ເຮັກຕາກວ່າ, ມີສະມາຊິກ 6 ຄົນ, ແມ່ນປູກໜໍ່ໄມ້, ໝາກນາວ, ໝາກເຜັດນ້ອຍ, ໝາກເຂືອ, ໝາກບວບ-ໝາກນໍ້າ, ໝາກເລັ່ນໃຫຍ່-ເລັ່ນນ້ອຍ, ຜັກອີຕູ່ ແລະຜັກບົ່ວ; ບ້ານນໍ້າຄໍາ, ມີເນື້ອທີ່ເກືອບ 7 ເຮັກຕາ, ມີສະມາຊິກກຸ່ມ 45 ຄົນ ປູກຜັກກາດຊອນ-ຜັກກາດຂຽວ, ຜັກສະຫຼັດ, ຜັກບົ້ງ, ຜັກຫອມປ້ອມ, ຜັກຊີ, ໝາກນ້ອຍລ່ຽມ, ກະລໍ່າປີ, ກ້ານກໍາ ແລະ ໝາກບວບ, ບ້ານດອນ ມີເນື້ອທີ່ເກືອບ 1 ເຮັກຕາ; ມີສະມາຊິກ 4 ຄົນປູກຜັກການ ຊອນ-ຜັກກາດຂຽວ, ຜັກກະລໍາປີ, ຜັກ ຫອມບົວ, ຜັກຫອມປ້ອມ, ຜັກບົ້ງຜັກຊີ ແລະຫົວສີໄຄ; ບ້ານໂພນສະຫວ່າງມີເນື້ອທີ່ເກືອບ 1 ເຮັກຕາ, ມີສະມາຊິກ 10 ຄົນ, ປູກຜັກກາດຊອນ-ຜັກກາດຂຽວ, ຜັກສະຫຼັດ, ໝາກເຂືອ, ຜັກຫອມປ້ອມ ແລະກະລໍ່າປີ, ທາງພະແນກກະສິກຳແຂວງ ແລະເມືອງຫ້ວຍຊາຍ ໄດ້ສະໜອງແນວພັນພືດຈໍານວນໜຶ່ງໃຫ້ຊາວກະສິກອນ ແລະສົ່ງພະນັກງານວິຊາການມາປະຈໍາແຕ່ລະກຸ່ມຜະລິດ, ເພື່ອແນະນໍາໃຫ້ຄວາມຮູ້ຂັ້ນຕອນເຕັກນິກການປູກ, ການບົວລະບັດຮັກສາ ແລະໃສ່ປຸຍໃຫ້ຖືກວິທີຕາມຫຼັກວິຊາການ,ເພື່ອຮັບປະກັນໃຫ້ໄດ້ຜົນຜະ ລິດສູງຄາດວ່າຖ້າດິນຟາອາກາດເອື້ອອໍານວຍຜົນຜະລິດພືດຜັກຕ່າງໆແມ່ນຈະໃຫ້ບັນລຸໄດ້ 4.000 ກວ່າ ກິໂລຕໍ່ມື້,ນອກນີ້, ຍັງມີພະນັກງານລັດຖະກອນຜູ້ທີ່ມີເງື່ອນ

ໄຂໄດ້ໃຊ້ເວລາຫວ່າງນອກໂມງລັດຖະການປູກຜັກສວນຄົວ ແລະລ້ຽງສັດໄວ້ບໍລິໂພກພາຍໃນຄອບຄົວ ແລະຂາຍທ້ອງຕະຫຼາດ, ເພື່ອຫຼຸດຜ່ອນລາຍຈ່າຍທັງເປັນການເພີ່ມລາຍຮັບເຂົ້າໃຄອບຄົວໄປໃນຕົວຕາມສະພາບໂອກາດ ແລະເວລາທີ່ມີໃນໄລຍະປະເທດຊາດກໍຄືແຂວງບໍ່ແກ້ວໄດ້ພົບວິກິດການພະຍາດໂຄວິດ-19. ຈຶ່ງໄດ້ຫັນວິກິດການໃຫ້ເປັນໂອກາດໃນການຜະລິດສະບຽງອາຫານໃຫ້ຫຼາຍເຮັດໃຫ້ທຸກຄົນໃນສັງຄົມມີຢູ່ມີກິນ, ມີຄວາມອີ່ມໜໍາສໍາລານ ແລະຮັ່ງມີຜາສຸກ, ຈໍາເປັນຕ້ອງຫັນຄວາມຊິນເຄີຍເກົ່າດ້ານການຜະລິດຂອງຊາວກະສິກອນໄປສູ່ຮູບການ ແລະວິທີການຜະລິດທີ່ກ້າວໜ້າ, ມີປະສິດທິຜົນດ້ວຍການນໍາໃຊ້ເຕັກນິກວິທະຍາສາດທີ່ທັນສະໃໝ່ເຂົ້າສູ່ການຜະລິດ. ເພື່ອໃຫ້ໄດ້ຜົນຜະລິດທີ່ອອກມາມີຈໍານວນຫຼາຍເຫຼືອກິນ ແລະມີຄຸນນະພາບດີເປັນທີ່ຍອມຮັບຂອງຜູ້ຊື້, ຈຶ່ງຈະເຮັດໃຫ້ຜົນຜະລິດກາຍເປັນສີນຄ້າສາມາດຂາຍໄດ້. ຜ່ານ ມາທາງຂະແໜງການທີ່ກ່ຽວຂ້ອງໄດ້ເອົາໃຈໃສ່ໃນການເຂົ້າມາຊ່ວຍແນະນໍາດ້ານເຕັກນິກວິທີການປູກຜັກແບບໃໝ່, ມີການຈັດຊຸດຝຶກອົບຮົມ ແລະການຈັດສັນຕະຫຼາດ ໂດຍສະເພາະແມ່ນການຈັດຕັ້ງເປັນກຸ່ມປູກຜັກສະອາດບ້ານນໍາຄໍາໄດ້ກາຍເປັນກຸ່ມທີ່ມີກໍາລັງແຮງມີຄວາມສາມາດພຽງພໍທີ່ຈະຍົກສູງປະສິດຕິພາບຂອງການຜະລິດໃຫ້ມີຄຸນນະພາບສາມາດຕອບສະໜອງຄວາມຮຽກຮອງຕ້ອງການຂອງຕະຫຼາດຜັກຕາມທິດເພິ່ງຕົນເອງ, ສ້າງຄວາມເຂັ້ມແຂງໃຫ້ຕົນເອງ, ເພື່ອຫຼຸດຜ່ອນການນໍາເຂົ້າພືດ ຜັກທີ່ບໍ່ຈໍາເປັນຈາກຕ່າງປະເທດ, ຫັນມາບໍລິໂພກພືດຜັກພາຍໃນແຂວງໃຫ້ຫຼາຍຂຶ້ນ.

แชร์