ເຊກອງ ສຸມປະຕິບັດ 88 ກວ່າໂຄງການດ້ານ ຍທຂ ມູນຄ່າ 6 ພັນກວ່າຕື້ກີບ

 ໃນຊຸມປີຜ່ານມາ ແຂວງເຊກອງ ໄດ້ຕັ້ງໜ້າປັບປຸງ ແລະກໍ່ສ້າງພື້ນຖານໂຄງລ່າງດ້ານວຽກງານໂຍທາທິການ ແລະຂົນສົ່ງ (ຍທຂ) ໃຫ້ມີຄຸນນະພາບດີຂຶ້ນເປັນກ້າວໆ ເພື່ອສະໜອງໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງກໍຄືຂອງຊາດ, ທັງແນໃສ່ເຮັດໃຫ້ຕາໜ່າງຄົມມະນາຄົມຂົນສົ່ງທຸກດ້ານໄດ້ຮັບການທະລຸໂລ່ງໃນທົ່ວແຂວງທັງເຊື່ອມໂຍງພາຍໃນ ແລະຕ່າງປະເທດຫຼາຍຂຶ້ນ.

  ວັນທີ 13 ພຶດສະພາ 2020 ທີ່ສະໂມສອນສະພາປະຊາຊົນແຂວງເຊກອງ, ຄະນະພັກຮາກຖານພະແນກ ຍທຂ ແຂວງເຊກອງໄດ້ຈັດກອງປະຊຸມໃຫຍ່ຄັ້ງທີ I ຂອງຕົນຂຶ້ນພາຍໃຕ້ການເປັນປະທານຂອງ ສະຫາຍ ສຸດສະນະ ສີຫາວົງ ເລຂາຄະນະພັກ, ຫົວໜ້າພະແນກ ຍທຂ ແລະເຂົ້າຮ່ວມມີ ສະຫາຍ ເຫຼັກໄຫຼ ສີວິໄລ ກໍາມະການປະຈໍາພັກແຂວງ, ຮອງເຈົ້າແຂວງເຊກອງ; ພ້ອມນີ້ກໍມີກໍາມະການພັກແຂວງ, ຫົວໜ້າ-ຮອງພະແນກ, ຄະນະພັກຮາກຖານ-ຄະນະໜ່ວຍພັກ ແລະ ສະມາຊິກພັກເຂົ້າຮ່ວມ.

  ສະຫາຍ ທອງເທບ ສຸລິໂຍ ຮອງເລຂາຄະນະພັກ, ຮອງຫົວໜ້າພະແນກ ຍທຂ ໄດ້ນໍາສະເໜີບົດລາຍງານການເມືອງຊຶ່ງຄະນະພັກຮາກຖານພະແນກ ຍທຂ ແຂວງ ຕັ້ງຢູ່ຂົງເຂດເສດຖະກິດມີ  3 ໜ່ວຍພັກຂຶ້ນກັບ, ເຄື່ອນໄຫວເປັນເສນາທິການໂດຍກົງໃຫ້ແກ່ອົງຄະນະພັກແຂວງ ແລະ ກະຊວງໂຍທາທິການ ແລະ ຂົນສົ່ງໂດຍຕະ ຫຼອດໄລຍະ 5 ປີຜ່ານ ມາແຫ່ງການຊີ້ນໍາໆພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ, ຄະນະພັກຍາມໃດກໍເອົາໃຈໃສ່ສຶກສາອົບຮົມການເມືອງແນວຄິດໃຫ້ຖັນແຖວພະນັກງານ, ສະມາຊິກພັກເປັນບັນຫາສໍາຄັນຕົ້ນຕໍດ້ວຍຫຼາຍຮູບແບບພ້ອມທັງຖືເອົາວຽກງານນີ້ສອດຫ້ອຍເຂົ້າໃນທຸກການເຄື່ອນໄຫວວຽກງານຕົວຈິງ, ເຮັດໃຫ້ສະພາບແນວຄິດຂອງທຸກຄົນມີຄວາມອຸ່ນອ່ຽງທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ, ມີການຫັນປ່ຽນທີ່ຕັ້ງໜ້າກວ່າເກົ່າ, ມີສະຕິຕໍ່ການຈັດຕັ້ງ, ຫ້າວຫັນໃນການປະຕິບັດໜ້າທີ່ວຽກງານຢ່າງເປັນເຈົ້າການ ແລະມີຜົນສໍາເລັດ.

  ການນໍາພາວຽກງານວິຊາສະເພາະໃນ 5 ປີຜ່ານມາ ໄດ້ເອົາໃຈໃສ່ຕິດຕາມ, ກວດກາ ແລະຄຸ້ມຄອງໂຄງການລົງທຶນໃນຂອບເຂດຄວາມຮັບຜິດຊອບຂອງຕົນລວມມທັງໝົດ 88 ໂຄງການ, ມູນຄ່າ 6.139 ຕື້ກວ່າກີບ, ໃນນີ້ໂຄງການກໍ່ສ້າງ ແລະສໍາລະໜີສໍາເລັດແລ້ວ 100% ມີ 32 ໂຄງການມູນຄ່າ 1.467 ຕື້ກວ່າກີບ; ໂຄງ ການທີ່ກໍ່ສ້າງສໍາເລັດ ແລະ ຍັງສືບຕໍ່ສໍາລະໜີ 28 ໂຄງການມູນຄ່າ 475 ຕື້ກວ່າກີບ; ໂຄງການທີ່ຍັງສືບຕໍ່ກໍ່ສ້າງ ແລະ ສືບຕໍ່ສໍາລະສາສາງມີ 28 ໂຄງການມູນຄ່າ 4.196 ຕື້ກວ່າກີບ; ທົ່ວແຂວງມີເສັ້ນທາງທັງໝົດ 280 ເສັ້ນ, ຍາວ 2 ພັນກວ່າກິໂລແມັດໃນນັ້ນທາງປູອັດສະ ຟານ 5,8 ກິໂລແມັດ, ເສັ້ນທາງປູຢາງ 301 ກິໂລແມັດ, ເສັ້ນທາງປູແຮ-ດິນແດງ 967 ກິໂລແມັດ ແລະປູດິນທໍາມະຊາດ 732 ກິໂລແມັດ, ມີບ້ານທີ່ມີເສັ້ນທາງເຂົ້າເຖິງແລ້ວ 195 ບ້ານກວມເອົາ 98,98% ທຽວໄດ້ສອງລະດູລວມມີ 144 ບ້ານກວມເອົາ73,09%.

  ຂະນະດຽວກັນ, ກອງປະຊຸມຍັງໄດ້ຜ່ານມະຕິ, ທິດທາງ ແລະແຜນສູ້ຊົນໃນສະເພາະໜ້າ, ຈາກນັ້ນກໍໄດ້ດໍາເນີນການປ່ອນບັດຄັດເລືອກເອົາຄະນະພັກຊຸດໃໝ່ໂດຍເຫັນດີເລືອກເອົາ ສະຫາຍ ສຸດສະນະ ສີຫາວົງ ເປັນເລຂາຄະນະພັກຮາກຖານ, ສະຫາຍ ບຸນທະວີ ນະຄອນສິດ ເປັນຮອງ ເລຂາ, ສະຫາຍ ແກ້ວປະເສີດ ແກ້ວມະນີ ວົງ ເປັນປະທານກວດກາ, ສ່ວນສະຫາຍ ທອງເທບ ສຸລິໂຍ, ສະຫາຍ ໂສວັດ ສີດາວົງ, ສະຫາຍ ບົວລີ ສຸຂະວົງ ແລະສະຫາຍ ຄໍາເກັ່ງ ແກ້ວສຸວັນເປັນຄະນະ.

   ຕອນທ້າຍສະຫາຍ ເຫຼັກໄຫຼ ສີວິໄລ ກໍໄດ້ຕີລາຄາສູງຕໍ່ການຊີ້ນໍາໆພາຂອງໜ່ວຍພັກໃນໄລຍະຜ່ານມາ ແລະຮຽກຮ້ອງໃຫ້ສືບຕໍ່ເສີມຂະຫຍາຍຜົນງານທີ່ພົ້ນເດັ່ນເຂົ້າໃນການປະຕິບັດໜ້າທີ່ດ້ວຍ ຄວາມຮັບຜິດຊອບສູງ, ເອົາໃຈໃສ່ແກ້ ໄຂຈຸດອ່ອນ-ຂໍ້ຄົງຄ້າງ ແລະສະກັດກັ້ນທຸກບັນຫາບໍ່ໃຫ້ເກີດຂຶ້ນໃນກົມ; ພ້ອມນີ້ສະຫາຍຍັງໄດ້ໃຫ້ທິດຊີ້ນໍາຕໍ່ກອງປະຊຸມໃນຫຼາຍບັນຫາທັງນີ້ກໍເພື່ອໃຫ້ຄະນະພັກຮາກຖານຊຸດໃໝ່ ແລະສະມາຊິກພັກນໍາໄປຈັດຕັ້ງຜັນຂະຫຍາຍແນໃສ່ເຮັດສໍາເລັດໜ້າທີ່ການເມືອງຂອງຕົນດ້ວຍບາດກ້າວຫັນປ່ຽນໃໝ່ພາຍໃຕ້ແນວທາງຂອງພັກ ແລະລະບຽບກົດໝາຍຂອງລັດ.

  ໃນວັນດຽວກັນກໍໄດ້ມີພິທີມອບ-ຮັບໃບຢັ້ງຢືນເອົາ 3 ໜ່ວຍພັກຄື: ໜ່ວຍພັກຂະແໜງທາງບົກ-ທາງນໍ້າ; ໜ່ວຍພັກຂະແໜງແຜນການ, ງົບປະມານ-ສະຖິຕິບໍລິ ຫານ-ຈັດຕັ້ງ, ກວດກາ ແລະໜ່ວຍພັກຂະແໜງຂົນສົ່ງ, ຄຸ້ມຄອງພາຫະນະ, ເຄຫາ-ຜັງເມືອງ ແລະນໍ້າປະປາ ທີ່ຂຶ້ນກັບຄະນະພັກຮາກຖານພະແນກ ຍທຂ ເປັນ ໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2019.

___________

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์